علیمہ خان ،ڈرائیور کی نظر بندی پر سیکرٹری داخلہ سے رپورٹ طلب

لاہور( این این آئی)لاہور ہائیکورٹ نے بانی پی ٹی آئی کی ہمشیرہ علیمہ خانم اور ان کے ڈرائیور کی نظر بندیکے خلاف درخواست پر سیکرٹری داخلہ سے رپورٹ طلب کرتے ہوئے سماعت ملتوی کر دی ۔جسٹس عبہر گل خان نے علیمہ خان کے بیٹے شہریز خان کی درخواست پر سماعت کی۔ دوران سماعت درخواست گزار کے وکیل نے موقف اختیار کیا کہ علیمہ خانم اور ان کے ڈرائیور کو 30 روز کے لیے جیل میں نظر بند کیا گیا ہے ،علیمہ خانم کو ادویات بھی فراہم نہیں کی جا رہیں۔ جسٹس عبہر گل خان نے ادویات کی عدم فراہمی سے متعلق معاملے پر متفرق درخواست دائر کرنے کی ہدایت کردی۔حکومتی وکیل نے عدالت کو بتایا کہ درخواست گزار نے نظر بندی کے حکم کے خلاف ڈی سی لاہور کو نظرثانی کی درخواست نہیں دی۔ عدالت نے آئندہ سماعت پر سیکرٹری داخلہ سے رپورٹ طلب کرتے ہوئے سماعت ملتوی کردی۔