ورلڈ بینک وفد کی مشیر وزیراعلیٰ پنجاب علی ڈار سے ملاقات

لاہور ( اپنے سٹا ف رپورٹر)ورلڈ بینک گروپ کے ریجنل ڈائریکٹر برائے ڈیجیٹل و اے آئی مشیل روگی کی قیادت میں وفد نے آفس آف اے آئی اینڈاسپیشل انیشیٹوز پنجاب کا دورہ کیا اور مشیر وزیراعلیٰ پنجاب برائے اے آئی و خصوصی اقدامات علی ڈار سے ملاقات کی۔ ملاقات میں پنجاب کے اے آئی اور ڈیجیٹل ٹرانسفارمیشن ایجنڈے، عوامی خدمات میں ٹیکنالوجی کے استعمال اور ڈیٹا پر مبنی گورننس کے فروغ پر تفصیلی تبادلۂ خیال کیا گیا۔علی ڈار نے کہا کہ وزیراعلیٰ مریم نواز شریف کے وژن کے مطابق پنجاب میں جدید ٹیکنالوجی کو بہتر حکمرانی اور عوامی خدمت سے جوڑا جا رہا ہے۔ اے آئی اور ڈیجیٹل ٹیکنالوجی عوامی خدمات کی فراہمی کو مزید مؤثر، تیز اور عوام دوست بنانے میں اہم کردار ادا کر سکتی ہے۔انہوں نے کہا کہ پنجاب میں ڈیٹا پر مبنی گورننس کے ذریعے حکومتی فیصلہ سازی کو مزید مؤثر بنایا جا رہا ہے۔ اے آئی وژن 2029 پنجاب کے ڈیجیٹل مستقبل اور جدید طرز حکمرانی کا جامع روڈ میپ ہے، جس کے تحت اے آئی کو محض ٹیکنالوجی نہیں بلکہ عملی حکومتی نتائج کے حصول کے لیے استعمال کیا جا رہا ہے۔