وزیر مملکت برائے داخلہ طلال چوہدری نے کہا ہے کہ اسلام آباد آنے والے تمام 125 راستے کھلے ہیں اور فی الحال شہر میں کوئی سڑک بند نہیں کی گئی۔ انہوں نے کہا کہ حکومت عدالتی احکامات کی پاسداری کرے گی اور عوام کی جان و مال کے تحفظ کے لیے ضرورت کے مطابق اقدامات کیے جائیں گے۔
اسلام آباد میں پریس کانفرنس کے دوران طلال چوہدری نے کہا کہ آج دوپہر 12 بجے تک کوئی سڑک بند نہیں تھی۔ ان کا کہنا تھا کہ سڑکوں کی بندش سے متعلق بعض گردش کرنے والی اطلاعات پرانی صورتحال سے متعلق ہیں۔
انہوں نے مزید کہا کہ عدالت کے احکامات پر عملدرآمد کیا جائے گا، جبکہ کسی بھی حملے یا پرتشدد کارروائی کی اجازت نہیں دی جا سکتی۔ یہ بیان ایسے وقت میں سامنے آیا ہے جب 27 ستمبر کو تحریک انصاف کے ممکنہ احتجاج کے باعث اسلام آباد اور اس کے اطراف میں سکیورٹی انتظامات سخت کیے جا رہے ہیں۔
