کرسٹیانو رونالڈو نے کہا ہے کہ وہ اس وقت تک پرتگال کی قومی ٹیم کے لیے کھیلتے رہیں گے جب تک انہیں محسوس ہوگا کہ وہ ٹیم کے لیے اپنا کردار ادا کرسکتے ہیں۔
رونالڈو نے صحافیوں سے گفتگو کرتے ہوئے بتایا کہ انہوں نے 2026 ورلڈ کپ کے بعد بین الاقوامی فٹبال سے کنارہ کشی اختیار کرنے پر غور کیا تھا، تاہم پرتگال کے صدر پیڈرو پروینسا اور نئے ہیڈ کوچ جارج جیزس سے گفتگو کے بعد انہوں نے قومی ٹیم کے ساتھ کھیل جاری رکھنے کا فیصلہ کیا۔
41 سالہ رونالڈو کا کہنا تھا کہ انہیں اب بھی یقین ہے کہ وہ پرتگال کو اس کے اہداف حاصل کرنے میں مدد دے سکتے ہیں۔ ان کے مطابق ان کا کردار صرف گول کرنے تک محدود نہیں بلکہ وہ نوجوان کھلاڑیوں کی رہنمائی اور میدان سے باہر بھی ٹیم کی مدد کرسکتے ہیں۔
رونالڈو نے واضح کیا کہ اگر انہیں لگے کہ وہ ٹیم کے لیے کچھ نہیں کر رہے یا ان کی موجودگی ٹیم کے لیے فائدہ مند نہیں رہی تو وہ خود قومی ٹیم سے الگ ہوجائیں گے۔ انہوں نے کہا کہ اگر پرتگال کو ان کی ضرورت نہ رہی تو وہ ’’اپنا سوٹ کیس اٹھائیں گے اور چلے جائیں گے‘‘۔
رونالڈو اس وقت اپنے کیریئر کے 1000 گولز کے سنگِ میل کے قریب ہیں۔ رپورٹس کے مطابق انہوں نے کلب اور ملک کے لیے مجموعی طور پر 979 گولز کیے ہیں اور اس تاریخی ہدف سے 21 گولز دور ہیں۔
پرتگال کے نئے ہیڈ کوچ جارج جیزس نے بھی رونالڈو کو آئندہ میچ میں ویلز کے خلاف میدان میں اتارنے کی تصدیق کی ہے۔ یہ میچ پرتگال کی نیشنز لیگ مہم کا حصہ ہے۔
