مکہ مشترکہ دفاعی معاہدے کی بنیادی روح اور اصول بدستور برقرار : سردار مسعود

اسلام آباد(نامہ نگار خصوصی ) امریکہ، چین و اقوام متحدہ میں پاکستان کے سابق سفیر اور آزاد جموں و کشمیر کے سابق صدر سردار مسعود خان نے کہا ہے کہ مکہ مشترکہ دفاعی معاہدے کی بنیادی روح اور اصول بدستور برقرار ہیں اور حوثی حملوں کے باعث  پیدا ہونے والے پیچیدہ سکیورٹی اور سفارتی چیلنجز کے باوجود یہ اتحاد خطرے میں نہیں ہے۔الجزیرہ عربی میں شائع ہونے والے اپنے مضمون میں سردار مسعود خان نے کہا کہ پاکستان سعودی عرب کے ساتھ دو دفاعی معاہدوں کا پابند ہے، جن میں 2025 کا پاکستان سعودی عرب اسٹریٹجک باہمی دفاعی معاہدہ اور پاکستان، سعودی عرب و ترکیہ کے درمیان مکہ مشترکہ دفاعی معاہدہ شامل ہیں۔ دونوں معاہدوں میں اجتماعی دفاع کا اصول موجود ہے، جس کے تحت کسی ایک رکن ملک پر مسلح حملہ تمام فریقوں پر حملہ تصور کیا جاتا ہے۔انہوں نے کہا کہ سعودی عرب کی سرزمین، بحیرہ احمر اور باب المندب آبنائے کے اطراف حوثی حملوں کے بعد مکہ معاہدے کے عملی اطلاق کا سوال فوری اہمیت اختیار کر گیا ہے۔ اس صورتحال نے پاکستان کے لیے ایک مشکل سفارتی چیلنج پیدا کر دیا ہے، کیونکہ پاکستان ایک جانب سعودی عرب کے ساتھ اپنے قریبی تعلقات برقرار رکھے ہوئے ہے جبکہ دوسری جانب ایران اور امریکہ کے درمیان ثالثی کا کردار بھی ادا کر رہا ہے۔سردار مسعود خان نے واضح کیا کہ اتحاد کے بانیوں نے اس کے مقصد کو جارحانہ یا توسیع پسندانہ بندوبست کے بجائے اجتماعی بازداریت قرار دے کر اس حوالے سے بنیادی تصور واضح کر دیا تھا۔ معاہدے میں مشترکہ فوجی مشقوں، دفاعی افواج کے درمیان باہمی استعداد اور ہم آہنگی میں اضافے، دفاعی سازوسامان کی مشترکہ خریداری اور مشترکہ دفاعی پیداوار کا تصور شامل ہے۔انہوں نے کہا کہ مکہ اتحاد کسی مسلکی بلاک کے طور پر تشکیل نہیں دیا گیا، اس میں جوہری ہتھیاروں کا کوئی جزو شامل نہیں اور نہ ہی اسے کسی مخصوص ملک کے خلاف بنایا گیا ہے۔ معاہدے میں کسی دشمن یا مخالف ملک کا نام بھی درج نہیں کیا گیا۔تاہم سردار مسعود خان کے مطابق پاکستان کی ممکنہ فوجی مداخلت کے عین محرک اور اس کی حد کے حوالے سے تزویراتی ابہام بدستور موجود ہے۔ اتحاد ابھی تشکیل کے ابتدائی مرحلے میں ہے اور مکمل طور پر فعال ہونے سے قبل اس کے ادارہ جاتی ڈھانچے کو مستحکم کیا جا رہا ہے۔ اس کے باوجود پاکستان کئی دہائیوں سے سعودی عرب کی سکیورٹی کے لیے افرادی قوت، تربیت اور دفاعی تعاون سمیت مختلف شعبوں میں خدمات انجام دیتا آ رہا ہے۔انہوں نے کہا کہ سعودی عرب کے ساتھ موجودہ دفاعی انتظامات کے تحت پاکستان کے عوامی سطح پر کیے گئے عزم اور عملی تعیناتیوں کی بنیاد پر مکہ معاہدے کو جزوی طور پر، اگر مکمل طور پر نہیں، تو فعال تصور کیا جا سکتا ہے۔ ان کے بقول اجتماعی دفاع کا اصول محض رسمی یا نمائشی نوعیت کا نہیں بلکہ اتحاد کا بنیادی ستون رہے گا۔سردار مسعود خان نے کہا کہ حوثی حملوں نے علاقائی سفارت کاری کو مزید پیچیدہ بنا دیا ہے، خصوصا ایسے وقت میں جب سعودی عرب مختلف شراکت داروں سے تعاون حاصل کرنے کی کوشش کر رہا ہے جبکہ امریکہ حوثیوں کے ساتھ اپنی سفارتی بات چیت جاری رکھے ہوئے ہے۔ مکہ مکرمہ پر حملے سے متعلق متضاد اور متنازع دعووں نے بھی مسلم دنیا میں حساسیت مزید بڑھا دی ہے۔انہوں نے کہا کہ پاکستان کو اس صورتحال میں ایک مشکل سفارتی توازن برقرار رکھنا ہوگا، جس کے تحت اسے سعودی عرب کے ساتھ مضبوطی سے کھڑا ہونے کے ساتھ ساتھ ایران اور امریکہ، نیز ایران اور سعودی عرب کے درمیان کشیدگی کم کرنے اور مفاہمت کے لیے اپنی سفارتی کوششیں جاری رکھنا ہوں گی۔سردار مسعود خان نے کہا کہ حتمی مقصد مختلف محاذوں پر جاری تنازعات کا خاتمہ اور ریاض و تہران کے درمیان حقیقی مفاہمت ہونا چاہیے۔ انہوں نے کہا کہ جنگ کے میدان میں کوئی ملک فتح یاب نہیں ہوگا، جبکہ سفارت کاری تمام فریقوں کے لیے قابل قبول اور مفید حل فراہم کر سکتی ہے۔