راولپنڈی(عرفان چوہان سے)چکلالہ کینٹونمنٹ بورڈ کے شعبہ ریونیو اور سائن بورڈ برانچ میں مبینہ بے ضابطگیوں، سائن بورڈ کمپنیوں کو کنٹریکٹ میں مبینہ غیر قانونی توسیع اور ریکوری میں سالانہ کروڑوں روپے کے مبینہ نقصان کا انکشاف ہوا ہے، جبکہ متعلقہ ریکارڈ بھی مبینہ طور پر دستیاب نہیں۔ ذرائع کے مطابق سائن بورڈ برانچ کے انچارج سعد اللہ کافی عرصے سے ریونیو اور سائن بورڈ کے معاملات دیکھ رہے ہیں، جس کے باعث ان کے زیر نگرانی معاملات کے حوالے سے بھی سوالات اٹھائے جا رہے ہیں۔ ذرائع کا دعوی ہے کہ برانچ میں مبینہ بے ضابطگیوں کے باوجود مثر نگرانی اور احتساب نہ ہونے کے باعث معاملات بدستور جاری ہیں اور متعلقہ افسران و اہلکاروں سے مبینہ طور پر کوئی مثر بازپرس نہیں کی جا رہی۔ ذرائع کے مطابق بھاری بھرکم گی سائن بورڈز لگانے والی بعض کمپنیوں کے کنٹریکٹ کی مدت ختم ہونے کے باوجود نہ تو سائن بورڈز اتارے جاتے ہیں اور نہ ہی نئے کنٹریکٹ کا شفاف عمل مکمل کیا جاتا ہے بلکہ مبینہ طور پر سابقہ کنٹریکٹ کو ہی غیر قانونی طریقے سے جاری رکھا جاتا ہے۔ کچہری راولپنڈی، پرانا ایئرپورٹ روڈ، راول روڈ، ٹیپو روڈ، رحیم آباد، سکیم تھری، گلستان کالونی، جی ٹی روڈ، جھنڈا چیچی، بوستان خان روڈ، لال کرتی روڈ، ڈھیری حسن آباد روڈ، لالہ زار روڈ، تلسہ روڈ، خواجہ کارپوریشن روڈ اور ڈیفنس روڈ پر روزانہ، 10 روزہ، 15 روزہ اور ماہانہ بنیادوں پر لگائے جانے والے ڈیجیٹل سائن بورڈ، ایل ای ڈی سائن بورڈ، وال سائن بورڈ، روف ٹاپ سائن بورڈ، بل بورڈ، ہولڈنگ سائن بورڈ، پینا فلیکس، الیکٹرک بورڈ اور ٹاور سائن بورڈز کی ریکوری اور اجازت ناموں کا مکمل ریکارڈ مبینہ طور پر موجود نہیں۔ انتہائی ذمہ دار ذرائع کے مطابق مالی سال 2025-26 کے دوران ان معاملات میں مبینہ طور پر کروڑوں روپے کی بے ضابطگیاں کی گئی ہیں، جبکہ بعض اہلکاروں پر کمپنیوں سے مبینہ ملی بھگت اور کمیشن وصول کرنے کے الزامات بھی سامنے آئے ہیں۔ ذرائع کا دعوی ہے کہ اگر ریونیو اور سائن بورڈ برانچ کا مکمل ریکارڈ قبضے میں لے کر خصوصی آڈٹ کرایا جائے تو اصل صورتحال سامنے آ سکتی ہے اور کینٹونمنٹ بورڈ کو ہونے والے مبینہ مالی نقصان کا تعین بھی ممکن ہو گا۔ ذرائع کے مطابق مبینہ طور پر ریکارڈ کی عدم دستیابی بھی معاملے کو مزید مشکوک بناتی ہے۔ شہری و سماجی حلقوں نے ڈی جی ملٹری لینڈ اینڈ کنٹونمنٹس اور اسٹیشن کمانڈر راولپنڈی سے مطالبہ کیا ہے کہ سائن بورڈ انچارج سعد اللہ سمیت متعلقہ افسران و اہلکاروں کے زیر نگرانی ہونے والے معاملات کی مکمل انکوائری، ریکارڈ کی جانچ پڑتال اور ریونیو و سائن بورڈ برانچ کا خصوصی آڈٹ کرایا جائے تاکہ مبینہ بے ضابطگیوں کے ذمہ داروں کا تعین اور حقائق سامنے لائے جا سکیں۔
