گوجرخان میں گراں فروشی بے قابو، انتظامیہ خاموش تماشائی

گوجرخان (بیورو رپورٹ)گوجرخان میں گراں فروشی نے تمام حدیں پار کر لیں، اشیائے خوردونوش کی قیمتوں میں من مانا اضافہ جاری ہے جبکہ سرکاری نرخ نامے محض کاغذی کارروائی بن کر رہ گئے ہیں۔ پھل، سبزیاں، گوشت، دودھ، دہی اور دیگر اشیائے ضروریہ سرکاری نرخوں کے بجائے دکانداروں کی مرضی کے مطابق فروخت ہونے لگی ہیں، جس سے شہری شدید پریشانی اور مالی مشکلات کا شکار ہیں۔شہریوں کا کہنا ہے کہ دکاندار سرکاری نرخ نامے کو خاطر میں نہیں لاتے اور صارفین سے منہ مانگے دام وصول کیے جا رہے ہیں۔ کئی مقامات پر نرخ نامہ آویزاں ہونے کے باوجود اس پر عملدرآمد نظر نہیں آتا، جبکہ خریدار زائد قیمتوں پر اشیا خریدنے پر مجبور ہیں۔دوسری جانب شہریوں نے انتظامیہ کی کارکردگی پر بھی شدید سوالات اٹھا دیے ہیں۔ ان کا کہنا ہے کہ اسسٹنٹ کمشنر، پرائس مجسٹریٹس اور متعلقہ انتظامی افسران کی جانب سے مارکیٹوں میں مثر اور مسلسل چیکنگ نہ ہونے کے باعث گراں فروشوں کو کھلی چھوٹ ملتی دکھائی دے رہی ہے۔شہریوں کا کہنا ہے کہ اگر روزانہ کی بنیاد پر مارکیٹوں کی نگرانی اور سرکاری نرخ نامے پر عملدرآمد یقینی بنایا جائے تو گراں فروشی پر قابو پایا جا سکتا ہے، تاہم موجودہ صورتحال میں عام آدمی مہنگائی کے ہاتھوں پس رہا ہے۔شہریوں نے وزیراعلی پنجاب، کمشنر راولپنڈی اور ڈپٹی کمشنر راولپنڈی سے فوری نوٹس لینے کا مطالبہ کرتے ہوئے کہا ہے کہ گوجرخان میں پرائس کنٹرول کے نظام کو فعال کیا جائے، فیلڈ میں مثر چیکنگ یقینی بنائی جائے اور سرکاری نرخ نامے کی خلاف ورزی کرنے والے دکانداروں کے خلاف بلاامتیاز قانونی کارروائی کی جائے۔