باکو( خبریں نیوز)وفاقی وزیر مواصلات عبدالعلیم خان نے باکو میں منعقدہ آذربائیجان انٹرنیشنل انویسٹمنٹ فورم کے ایک اعلی سطحی پینل
ڈسکشن میں شرکت کی اور علاقائی معاشی استحکام، تجارتی روابط اور انفراسٹرکچر کی ترقی پر پاکستان کا حکمت عملی پر مبنی موقف تفصیل سے پیش کیا۔ عالمی مندوبین سے خطاب کرتے ہوئے وفاقی وزیر مواصلات نے عالمی معاشی چیلنجز، ایندھن اور بحری مال برداری کی قیمتوں میں اضافے اور روایتی تجارتی راہداریوں کو متاثر کرنے والے جیو پولیٹیکل حالات کا ذکر کیا۔ انہوں نے زور دیا کہ پاکستان نے عالمی عدم استحکام کے دوران قومی معیشت کو مستحکم رکھنے کے لیے سرکاری اخراجات میں کمی اور سخت مالیاتی نظم و ضبط کے لیے پیشگی اقدامات کیے ہیں۔ مزید برآں، وفاقی وزیر مواصلات نے اس بات پر بھی زور دیا کہ پاکستان علاقائی تنازعات کے دوران کشیدگی کم کرنے اور طویل المدتی تجارتی تسلسل کو یقینی بنانے کے لیے خود کو ایک غیر جانبدار سفارتی مرکز اور مثبت ثالث کے طور پر پیش کر رہا ہے۔ وفاقی وزیر مواصلات عبدالعلیم خان نے واضح کیا کہ پاکستان اپنی منفرد جغرافیائی اور معاشی اہمیت کے باعث خطے میں حالیہ کشیدگی کے دوران تجارتی سرگرمیوں کے لیے ایک محفوظ اور موثر راہداری بن رہا ہے۔ انہوں نے بتایا کہ کراچی، پورٹ قاسم اور گوادر کی بندرگاہیں عالمی سپلائی چین کی روانی برقرار رکھنے کے لیے مکمل طور پر فعال ہیں، اور کراچی پورٹ ٹرسٹ نے گزشتہ مالی سال کے دوران 54.68 ملین میٹرک ٹن سے زائد کارگو ک کامیابی سے ترسیل ممکن بنائی۔ وسطی ایشیائی ریاستوں کے لیے سمندری گیٹ وے کے طور پر پاکستان کے اہم کردار کو اجاگر کرتے ہوئے انہوں نے بتایا کہ دوطرفہ تجارت میں نمایاں اضافہ ہوا ہے، جس میں قازقستان کے لیے برآمدات 240 ملین ڈالر اور ازبکستان کے لیے 118 ملین ڈالر سے تجاوز کر چکی ہیں۔ ملکی انفراسٹرکچر کی جدید کاری پر بات کرتے ہوئے وفاقی وزیر نے ایم-6 موٹروے، ایم-10 اور ایم این جے سی شاہراہوں جیسے اہم موٹروے منصوبوں کا ذکر کیا جو وسطی ایشیا اور مغربی چین کے لیے تیز ترین اور موثر تجارتی راستے فراہم کرتے ہیں۔ انہوں نے آذربائیجان کے ساتھ سالانہ 1500 روڈ پرمٹس کے تبادلے کا ذکر کیا جو پاکستانی بندرگاہوں کو جنوبی قفقاز اور ٹرانس کاسپین کوریڈور سے براہ راست جوڑتے ہیں۔ خطاب کے اختتام پر وفاقی وزیر مواصلات نے پبلک پرائیویٹ پارٹنرشپ، پیپر لیس کسٹمز سسٹمز اور سی پیک (CPEC) کو ای سی او، کیریک (CAREC) اور ایس سی او نیٹ ورکس سے جوڑنے کے عزم کا اعادہ کیا تاکہ ایشیا اور یورپ کے درمیان ایک پائیدار معاشی پل قائم کیا جا سکے۔پینل ڈسکشن میں آذربائیجان کے وزیر اقتصادیات میکائیل جباروف اور ترکیہ کے وزیر خزانہ و مالیات محمد شمشیک نے بھی شرکت کی۔ اس کے علاوہ ازبکستان، شمالی مقدونیہ، شام، تاجکستان اور مونٹی نیگرو کے وزرا اور نائب وزرائے اعظم بھی اس اہم مکالمے کا حصہ تھے۔
