شہر میں 2 مختلف حادثات کے دوران 3 افراد جاں بحق’ایک زخمی

لاہور (کرائم رپورٹر) شہر میں دو مختلف ٹریفک حادثات کے دوران تین افراد جاں بحق جبکہ ایک شخص شدید زخمی ہوگیا۔ ترجمان ٹریفک پولیس کے مطابق سگیاں ٹول پلازہ سے راوی پل کی جانب جاتے ہوئے تیز رفتار لوڈر رکشہ بے قابو ہوکر کھڑے ٹریلر سے ٹکرا گیا، جس کے نتیجے میں رکشے پر سوار عثمان اور ارسلان موقع پر جاں بحق ہوگئے۔ دوسرے حادثے میں کلمہ فلائی اوور سے موڑ ماڈل ٹائون انڈر پاس سے قبل تیز رفتاری کے باعث موٹرسائیکل بے قابو ہوکر پول سے ٹکرا گئی۔ موٹرسائیکل پر سوار تین افراد میں سے ایک موقع پر جاں بحق جبکہ ایک شدید زخمی ہوگیا جسے ریسکیو1122 نے ہسپتال منتقل کر دیا۔ دونوں حادثات کے متعلقہ افراد اور گاڑیاں مزید قانونی کارروائی کے لیے پولیس کے حوالے کر دی گئیں۔ سی ٹی او لاہور نے سگیاں حادثے کا نوٹس لیتے ہوئے ایس ایس پی سٹی زون سے رپورٹ طلب کرلی اور ٹریلر ڈرائیور کے خلاف قانونی کارروائی کا حکم دیا۔