موٹر سائیکلوں پر سائیڈ ویو مرر لازمی قرار دینے کے لیے دائر درخواست سی ٹی او کی رپورٹ پر نمٹا دی گئی

لاہور (کورٹ رپورٹر) لاہور ہائیکورٹ نے موٹر سائیکلوں پر سائیڈ ویو مرر لازمی قرار دینے کے لیے دائر درخواست سی ٹی او لاہور کی رپورٹ کی روشنی میں نمٹا دی۔ جسٹس اجمل زاہد نے نجی بس کمپنی کی درخواست پر سماعت کی، درخواست گزار کی جانب سے بیرسٹر مریم خان ایڈووکیٹ پیش ہوئیں۔ سی ٹی او لاہور کی رپورٹ میں بتایا گیا کہ موٹر سائیکلوں پر سائیڈ ویو مرر سے متعلق قانون سازی کے لیے مراسلہ لکھ دیا گیا ہے جبکہ پنجاب حکومت کو بھی قانون سازی کی تجویز ارسال کی جاچکی ہے۔ درخواست گزار کے وکیل نے موقف اختیار کیا کہ پنجاب موٹر وہیکل آرڈیننس کے قواعد میں موٹر سائیکلوں پر سائیڈ ویو مرر لازمی قرار دینے کی شق موجود نہیں جبکہ چار پہیوں والی گاڑیوں میں سائیڈ مرر لازمی ہیں۔ موٹر سائیکلوں پر سائیڈ ویو مرر نہ ہونے کے باعث حادثات پیش آتے ہیں، لہٰذا انسانی جانوں کے تحفظ کے لیے موٹر سائیکلوں پر بھی سائیڈ ویو مرر لازمی قرار دینے کا حکم دیا جائے۔