حیدرآباد میں روٹی 25 سے بڑھ کر 35 روپے ہوگئی، مہنگائی کے ستائے عوام پریشان

حیدر آباد (این این آئی) ملک بھر میں بڑھتی ہوئی مہنگائی کے اثرات عوام کی روزمرہ زندگی پر نمایاں ہونے لگے، حیدر آباد میں روٹی کی قیمت 25 روپے سے بڑھا کر 35 روپے کر دی گئی، جس سے غریب اور متوسط طبقے کی مشکلات میں مزید اضافہ ہوگیا۔ شہر میں روٹی کی قیمت میں 10 روپے اضافے کے بعد شہریوں کے لیے بنیادی غذائی ضرورت پوری کرنا بھی مشکل ہوتا جا رہا ہے۔ پہلے ہی آٹا، دالیں اور دیگر اشیائے ضروریہ کی بڑھتی قیمتوں سے پریشان عوام اب روٹی مہنگی ہونے کے باعث گھریلو اخراجات پورے کرنے میں مزید مشکلات کا سامنا کر رہے ہیں۔ شہریوں کا کہنا ہے کہ مہنگائی نے پہلے ہی ان کے گھریلو بجٹ کو شدید متاثر کر رکھا ہے، جبکہ روزمرہ استعمال کی اشیاء کی قیمتوں میں مسلسل اضافے کے باعث آمدنی اور اخراجات میں توازن برقرار رکھنا مشکل ہوگیا ہے۔ ان کے مطابق روٹی جیسی بنیادی ضرورت مہنگی ہونے سے سب سے زیادہ متاثر کم آمدنی والے گھرانے ہوں گے۔ شہریوں نے حکومت سے مطالبہ کیا ہے کہ روٹی سمیت اشیائے خورو نوش کی قیمتوں میں اضافے کا فوری نوٹس لیا جائے، نرخوں کو قابو میں رکھنے کے لیے مؤثر اقدامات کیے جائیں اور عوام کو مہنگائی سے ریلیف فراہم کیا جائے تاکہ عام شہریوں کے لیے دو وقت کی روٹی کا حصول ممکن بنایا جا سکے۔