لاہور ہائیکورٹ میں ڈی جی ایف آئی اے کیخلاف توہین عدالت کی درخواست پر سماعت نہ ہوسکی

لاہور (کورٹ رپورٹر) لاہور ہائیکورٹ میں ڈی جی ایف آئی اے کے خلاف توہین عدالت کی درخواست پر سماعت نہ ہوسکی۔ چیف جسٹس عالیہ نیلم نے کاز لسٹ منسوخ کر دی۔ عدالت نے نیشنل سائبر کرائم انویسٹی گیشن ایجنسی (این سی سی آئی اے) کے قیام کے حوالے سے ڈی جی سے تفصیلی رپورٹ طلب کرتے ہوئے انہیں ذاتی حیثیت میں پیش ہونے کا حکم دے رکھا تھا۔ عدالت نے ڈی جی ڈاکٹر عثمان ڈار سے کیس کی سماعت کے دوران تعینات ہونے والے ڈائریکٹرز کے نام بھی طلب کر رکھے ہیں۔ درخواست گزار ملزم اسماعیل نے موقف اختیار کیا ہے کہ عدالتی حکم کے باوجود ان کے کیس کی تفتیش مکمل نہیں کی گئی۔ درخواست میں استدعا کی گئی ہے کہ عدالتی احکامات پر عملدرآمد نہ کرنے کے ذمہ داران کے خلاف توہین عدالت کی کارروائی عمل میں لائی جائے۔