مری (ویب ڈیسک) پنجاب کے علاقے مری میں گاڑی کھائی میں گرنے کے افسوسناک حادثے میں خواتین اور بچوں سمیت 7 افراد جاں بحق جبکہ 8 زخمی ہو گئے۔ زخمیوں کو طبی امداد کے لیے ہولی فیملی ہسپتال راولپنڈی منتقل کر دیا گیا ہے، جہاں 2 زخمیوں کی حالت تشویشناک بتائی جا رہی ہے۔ حادثے میں معجزانہ طور پر محفوظ رہنے والی خاتون نگہت بی بی نے بتایا کہ حادثے کا شکار ہونے والی گاڑی میں 17 افراد سوار تھے، گاڑی اچانک بے قابو ہوئی اور کھائی میں جا گری۔نگہت بی بی کا کہنا تھا کہ گاڑی کھائی میں گرنے کے بعد سلنڈر پھٹنے سے آگ لگ گئی جس کے نتیجے میں جانی نقصان ہوا، خاتون کے مطابق حادثے میں جاں بحق ہونے والے بعض افراد کی میتیں ناقابل شناخت ہو گئی ہیں۔دوسری جانب حادثے میں 8افراد زخمی ہوئے، جنہیں ہولی فیملی ہسپتال راولپنڈی منتقل کیا گیا، جبکہ 2 زخمیوں کی حالت تشویشناک بتائی گئی ہے۔ وزیراعلی پنجاب مریم نواز شریف نے مری کے قریب سوزوکی وین کھائی میں گرنے سے قیمتی انسانی جانوں کے ضیاع پر گہرے دکھ اور افسوس کا اظہار کیاہے،وزیراعلی مریم نواز شریف نے سوگوار خاندانوں سے اظہارِ ہمدردی و تعزیت کیااور زخمیوں کی جلد صحت یابی کیلئے دعا کی ۔ وزیراعلی مریم نواز شریف نے زخمیوں کے بہترین علاج معالجہ کا حکم دیتے ہوئے ڈپٹی کمشنر مری کو ریسکیو اور ریلیف آپریشن کی مانیٹرنگ کی ہدایت کی ہے ـ
