ملتان(سجادبخاری)40 سال سے پاکستان پیپلزپارٹی میں کھڑے ہیں اچھے اوربرے دن بھی دیکھے ہیں مگرجماعت نہیں چھوڑی۔ پتھراپنی جگہ پر بھاری ہوتا ہے تین ،تین مرتبہ جماعتیں بدلنے والے اپنی سیاسی قدرومنزلت کھو جاتے ہیں۔ عوام اور سیاسی جماعتوں کی نظروں میں انکاشمار لوٹوں میں ہوتا ہے۔ الحمدللہ میرے خاندان میں کوئی لوٹانہیں بنا اورنہ ہی بنے گا۔ اپنی جماعت کے ہرفیصلے کاپابند ہوں سینٹ کاالیکشن لڑنا یالڑانا پاکستان پیپلزپارٹی کے چیئرمین کافیصلہ حتمی ہوگا۔ مخدوم شاہ محمود قریشی کیلئے دعاگو ہوں کہ اللہ پاک ان کیلئے آسانیاں پیدا کرے ۔ پاکستان پیپلزپارٹی نے سات کیا اگرد س مرتبہ گورنرراج اورایمرجنسی لگائے ہیں تووہ سب کے سب آئینی قانونی تھے اورخیبرپختونخواہ میں گورنرراج بھی آئین کے مطابق لگایاہے۔ جمہوریت کیلئے اپنی جانوں کے نذرانے پیش کرنیوالے غیرجمہوری کام نہیں کرتے۔ ان خیالات کااظہار سابق وزیراعظم اورچیئرمین سینٹ سید یوسف رضاگیلانی نے ”خبریں” سے خصوصی گفتگو کرتے ہوئے کیا۔ انہوں نے سینٹ الیکشن لڑنے کے سوال پرجواب دیتے ہوئے کہاکہ میں جس جماعت میں گزشتہ40 سال سے کھڑا ہوں اس کی قیادت کافیصلہ حتمی ہوگا۔ میں نے ہمیشہ پارٹی قیادت کے ہرفیصلے کی تعمیل کی ہے۔ مجھ پراچھے برے دن آئے مگر میں نے کبھی جماعت چھوڑنے کا تصوربھی نہیں کیا کیونکہ میرے نزدیک جماعتیں بدلنے والے سیاستدانوں کی نہ کوئی عزت ہوتی ہے اور نہ ہی انکاکوئی مستقبل اور عوام اورقیادت کی نظروں میں جماعتیں بدلنے والوں کی حیثیت ایک ”لوٹے” کی سی ہوتی ہے ۔الحمدللہ میرے خاندان میں نہ کوئی لوٹا ہے اور نہ ہی بنے گا۔ اپنے سیاسی مخالف مخدوم شاہ محمود قریشی کے مقدمات کے سوال پرسیدیوسف رضا گیلانی نے ”خبریں” کوبتایا کہ میں ہمیشہ انکی صحت وسلامتی کیلئے دعاگورہتا ہوں اور اب بھی میں اللہ پاک سے دعاکرتاہوں کہ انکی مصیبتیں ختم ہوں۔ ملتان میں ترقیاتی کام کے حوالے سے انہوں نے کہاکہ میری ذات نے پورے جنوبی پنجاب میں جتنے ترقیاتی کام کرائے ہیں وہ آج تک کوئی بھی نہیں کراسکا آئندہ بھی مجھے جب موقع ملے گا میں سرائیکی خطے کیلئے بہت کچھ کروںگا۔ صوبوں کے حوالے سے سیدیوسف رضاگیلانی نے کہاکہ اب یہ موضوع پرانا ہوچکاہے۔ میں سومرتبہ کہہ چکا ہوں کہ جنوبی پنجاب کوسب سے پہلے صوبہ بنایاجائے باقی جوصوبائی اسمبلی دوتہائی کی اکثریت سے قرارداد منظور کرے وہاں پر بھی صوبہ بنایا جائے۔ خیبرپختونخواہ میں گورنر راج کی بابت سیدیوسف رضا گیلانی نے کہاکہ وہ آئین اورقانون کے مطابق ہے خیبرپختونخواہ کے حالات وواقعات اس بات کے متقاضی تھے کہ وہاں پر گورنرراج لگایا جائے۔
سید یوسف رضا گیلانی
