لاہور (کورٹ رپورٹر) سپریم کورٹ بار ایسوسی ایشن کے سالانہ انتخابات میں صدارتی نشست پر ووٹوں کی گنتی مکمل ہوگئی، غیر حتمی و غیر سرکاری نتائج کے مطابق انڈیپنڈنٹ گروپ کے امیدوار سید امجد علی شاہ نے کامیابی حاصل کرلی۔ انہوں نے لاہور کے پولنگ اسٹیشن سے 644 ووٹ حاصل کیے، جبکہ پروفیشنل گروپ کے امیدوار سردار امان خان 400 ووٹ حاصل کرسکے۔انتخابات کے دوران ملک بھر میں مجموعی طور پر 13 پولنگ اسٹیشن قائم کیے گئے، جہاں 4 ہزار 634 رجسٹرڈ ووٹرز نے اپنا حقِ رائے دہی استعمال کیا۔ پولنگ کا عمل مقررہ وقت کے مطابق جاری رہا، جبکہ لاہور سب سے بڑا پولنگ اسٹیشن رہا، جہاں 1,498 ووٹرز رجسٹرڈ تھے۔ راولپنڈی اور اسلام آباد کے مشترکہ پولنگ اسٹیشن پر 864 ووٹرز رجسٹرڈ تھے۔ ابتدائی غیر حتمی و غیر سرکاری نتائج کے مطابق بنوں میں سید امجد شاہ نے 33 ووٹ حاصل کیے، جبکہ سردار امان خان 12 ووٹ لے سکے۔ ڈیرہ اسماعیل خان میں سید امجد شاہ کو 37 ووٹ ملے، جبکہ سردار امان خان نے 7 ووٹ حاصل کیے۔ لاہور میں ابتدائی نتائج کے مطابق سید امجد شاہ 640 ووٹوں کے ساتھ برتری حاصل کیے ہوئے تھے، جبکہ سردار امان خان کو 410 ووٹ ملے۔ بعد ازاں موصول ہونے والے نتائج میں لاہور سے سید امجد شاہ کے ووٹوں کی تعداد 644 اور سردار امان خان کے ووٹوں کی تعداد 400 بتائی گئی۔ احسن بھون نے کامیابی پر وکلا برادری کو مبارکباد دیتے ہوئے تمام سیاسی جماعتوں کا شکریہ ادا کیا اور چوہدری پرویز الہی کا بھی خصوصی طور پر شکریہ ادا کیا۔ انہوں نے کہا کہ آئین اور قانون کے مطابق ہونے والی ترامیم کی حمایت کی جائے گی۔ نومنتخب صدر سید امجد شاہ نے بھاری مینڈیٹ دینے پر وکلا برادری کا شکریہ ادا کرتے ہوئے کہا کہ آئین اور قانون کی بالادستی پر کوئی سمجھوتہ نہیں کیا جائے گا۔ وکلا کی فلاح و بہبود ان کی اولین ترجیحات میں شامل ہے۔ سپریم کورٹ بار ایسوسی ایشن کے انتخابات کے حتمی اور سرکاری نتائج کا اعلان 3 نومبر 2026 کو متوقع ہے۔
