بنگلہ دیش پاکستان کیساتھ دوطرفہ تجارت کوفروغ دینے کا خواہشمند

کراچی (این این آئی) بنگلہ دیش کے ڈپٹی ہائی کمشنر ثاقب صداقت نے پاکستان کے ساتھ دوطرفہ تجارت کو فروغ دینے اور باہمی روابط کو مزید مستحکم بنانے پر زور دیتے ہوئے کہا ہے کہ پاکستانی تاجر بنگلہ دیش کا دورہ کریں اور نمائشوں میں شرکت کریں۔ اس ضمن میں بنگلہ دیشی قونصلیٹ نہ صرف سہولتیں فراہم کرے گا بلکہ بنگلہ دیشی تاجروں کے
ساتھ بزنس ٹو بزنس ملاقاتوں کے انعقاد میں بھی مدد کرے گا۔ یہ بات انہوں نے پاکستان کیمیکلز اینڈ ڈائز مرچنٹس ایسوسی ایشن (پی سی ڈی ایم اے) کے چیئرمین محمد سلیم مکاتی کی سربراہی میں ملاقات کرنے والے وفد سے تبادلہ خیال کرتے ہوئے کہی۔ وفد میں پی سی ڈی ایم اے کے سینئر وائس چیئرمین شاہد بشیر، وائس چیئرمین محمد عامر بھٹی، سابق چیئرمین سلیم ولی محمد، سابق چیئرمین محمود سلام اور وقار احمد شامل تھے۔ ڈپٹی ہائی کمشنر ثاقب صداقت نے پی سی ڈی ایم اے وفدکی تجویز سے اتفاق کرتے ہوئے اپنے ہر ممکن تعاون کا یقین دلاتے ہوئے کہا کہ وہ ایک سال کے ملٹی پل ویزے کے اجرا کے حوالے سے ضرور غور کریں گے اور پی سی ڈی ایم اے کی ویزا سفارشات کو بھی ترجیح دی جائے گی۔ پی سی ڈی ایم اے کے چیئرمین محمد سلیم مکاتی نے ڈپٹی ہائی کمشنر کو بتایا کہ کیمیکلز کے شعبے میں پاکستانی تاجروں کی بنگلہ دیش کے ساتھ تجارت بہت زیادہ ہے، لہٰذا پی سی ڈی ایم اے کو کیمیکلز اور ڈائز کے شعبوں سے وابستہ تاجروں کی رابطہ تفصیلات فراہم کی جائیں تاکہ ان دونوں شعبوں میں تجارت کو مزید فروغ دیا جا سکے، جس سے یقینی طور پر پاکستان اور بنگلہ دیش کا باہمی تجارتی حجم بڑھے گا۔پی سی ڈی ایم اے کے وفد نے ڈپٹی ہائی کمشنر کو ویزے سے متعلق بعض مشکلات سے بھی آگاہ کیا اور درخواست کی کہ پاکستانی تاجروں کو ایک سال کا ملٹی پل ویزا جاری کیا جائے تاکہ وہ بلا رکاوٹ بنگلہ دیش کا دورہ کر سکیں، وہاں کی مارکیٹوں کا جائزہ لے سکیں اور بزنس ٹو بزنس ملاقاتوں کا بھی اہتمام کر سکیں، کیونکہ سنگل انٹری ویزے کے باعث پاکستانی تاجروں کو اکثر پریشانی کا سامنا کرنا پڑتا ہے۔ وفد کا کہنا تھا کہ اس اقدام سے یقینی طور پر نہ صرف دونوں ملکوں کی برآمدات میں اضافہ ہوگا بلکہ دونوں معیشتوں پر بھی خوشگوار اثرات مرتب ہوں گے۔