IG پنجاب عبدالکریم کی زیرصدارت کرائم کنٹرول کے حوالے فالواَپ اجلاس

لاہور (اپنے سٹاف رپورٹر سے) انسپکٹر جنرل پولیس پنجاب عبدالکریم کی زیرصدارت کرائم کنٹرول کے حوالے سے اہم فالو اپ اجلاس سنٹرل پولیس آفس میں منعقد ہوا جس میں گزشتہ ہفتے وزیراعلیٰ پنجاب مریم نوازشریف کی زیرصدارت منعقدہ اجلاس میں دی گئی ہدایات کی روشنی میں تمام ریجنز اور اضلاع کی ہفتہ وار کارکردگی کا تفصیلی جائزہ لیا گیا۔ ڈی آئی جی انوسٹی گیشن پنجاب نے بریفنگ دیتے ہوئے بتایا کہ پنجاب بھر میں گزشتہ ہفتے کی نسبت رواں ہفتے کے دوران سنگین جرائم کی وارداتوں میں واضح کمی ریکارڈ کی گئی ہے۔ آئی جی پنجاب عبدالکریم نے تمام آر پی اوز اور ڈی پی اوز کو سنگین جرائم کی سرکوبی کے لیے کرائم ہاٹ سپاٹس کی نشاندہی کرکے فوری ایکشن لینے کی ہدایت کی۔ انہوں نے ڈکیتی، رابری مرڈر، بچوں اور خواتین سے زیادتی، تشدد اور آرگنائزڈ کرائم سمیت سنگین جرائم کی روک تھام پر خصوصی توجہ دینے کا حکم دیا۔ آئی جی پنجاب نے کہا کہ وزیراعلیٰ پنجاب مریم نواز شریف کی ہدایت پر جرائم کی صورتحال کا ہفتہ وار باقاعدگی سے جائزہ لیا جا رہا ہے تاکہ جرائم پر قابو پانے اور شہریوں کے جان و مال کے تحفظ کے لیے موثر اقدامات یقینی بنائے جاسکیں۔ انہوں نے سنگین جرائم میں ملوث ملزمان کو قرار واقعی سزا دلوانے کے لیے چالاننگ کی شرح بہتر بنانے کی ہدایت کرتے ہوئے کہا کہ خواتین اور بچوں سے زیادتی سمیت دیگر فوجداری مقدمات میں زیر التواء فرانزک رپورٹس کے حصول کے لیے روزانہ کی بنیاد پر فالو اَپ لیا جائے اور رپورٹس جلد حاصل کی جائیں۔ آئی جی پنجاب نے ڈکیتی، رابری مرڈر اور دیگر سنگین جرائم میں ملوث اشتہاری مجرمان کی گرفتاریوں میں تیزی لانے کی بھی ہدایت کی۔ اجلاس میں ایڈیشنل آئی جی انوسٹی گیشن پنجاب، ایڈیشنل آئی جی آپریشنز پنجاب، ڈی آئی جی انوسٹی گیشن پنجاب، اے آئی جی آپریشنز اور اے آئی جی ایڈمن اینڈ سکیورٹی نے شرکت کی جبکہ سی سی پی او لاہور، ایڈیشنل آئی جی سائوتھ پنجاب، تمام آر پی اوز، سی پی اوز، ڈی پی اوز، ڈی آئی جی آپریشنز لاہور اور ڈی آئی جی انوسٹی گیشن لاہور سمیت متعلقہ افسران نے بذریعہ ویڈیو لنک شرکت کی۔