لاہور (این این آئی)غیر قانونی طور پر مقیم افغان باشندوں کے انخلاء کی مہم کے تحت محکمہ داخلہ پنجاب کے فارن نیشنل سکیورٹی ونگ کی کارروائیاں جاری ہیں، اب تک ملک بھر سے مجموعی طور پر 28لاکھ 7ہزار 250جبکہ پنجاب سے ایک لاکھ 43ہزار 474غیر قانونی مقیم افغان باشندوں کو وطن واپس بھجوایا جا چکا ہے۔محکمہ داخلہ پنجاب کے مطابقحکومت پاکستان کی واضح پالیسی کے تحت قابل قبول ویزا کے بغیر افغان شہریوں کا پاکستان میں قیام غیر قانونی ہے۔ ایسے افراد کو گرفتار کرکے ہولڈنگ سینٹرز منتقل کیا جاتا ہے، جہاں ان کی عارضی رہائش، رجسٹریشن اور وطن واپسی کے انتظامات کیے جاتے ہیں۔ اب تک پاکستان سے مجموعی طور پر 28لاکھ 7ہزار 250افغان باشندے وطن واپس بھجوائے گئے،پنجاب سے 1لاکھ 43ہزار 474غیر قانونی مقیم افغان باشندوں کو واپس بھجوایا گیا ۔ترجمان محکمہ داخلہ پنجاب کے مطابق پنجاب میں اس وقت 39ہولڈنگ سینٹرز فعال ہیں جن میں 153افغان شہری موجود ہیں ، ہولڈنگ سینٹرز میں غیر قانونی افغان باشندوں کی عارضی رہائش، رجسٹریشن اور وطن واپسی کے انتظامات کیے گئے ہیں ، غیر قانونی طور پر مقیم افغان باشندوں کو طورخم بارڈر پر افغان حکام کے حوالے کیا جاتا ہے۔ کریک ڈائون کے دوران صوبہ بھر میں رہائشی علاقوں اور مارکیٹس میں 4لاکھ سے زائد سرچ آپریشن کیے گئے۔
