چودھری سالک کا بیان سمجھ سے باہر خواجہ آصف معافی مانگیں عظمی بخاری جواب دونگا چودھری سالک

اہور (اپنے سٹاف رپورٹر سے ) وزیر اطلاعات پنجاب عظمیٰ بخاری نے کہا ہے کہ چودھری سالک حسین کرپشن کے الزامات بارے ثبوت پیش کریں یا معافی مانگیں۔ وزیر دفاع خواجہ آصف کا کہنا ہے کہ چودھری سالک کا بیان سمجھ سے باہر ہے جبکہ وفاقی وزیر چودھری سالک کا کہنا ہے کہ ابھی نوٹس نہیں ملا، بیان پر قائم ہوں، جواب دوں گا۔ وزیر اطلاعات پنجاب عظمیٰ بخاری نے وفاقی وزیر چوہدری سالک حسین کے وزیراعلیٰ پنجاب مریم نواز سے متعلق بیان پر ردعمل دیتے ہوئے کہا ہے کہ سالک حسین وزیراعلیٰ پنجاب کے نوٹس کا جواب دیں، کرپشن کے ثبوت پیش کریں یا معافی مانگیں۔صوبائی دارالحکومت سے جاری اپنے بیان میں عظمیٰ بخاری کا کہنا تھا کہ وفاقی وزیر اور حکومت کا حصہ ہونے کے باوجود ثبوت کے بغیر بے بنیاد الزامات لگانا انہیں زیب نہیں دیتا۔انہوں نے کہا کہ سالک حسین نے گزشتہ روز ڈپٹی کمشنر گجرات کی تعیناتی کی سفارش کرنے کا خود اعتراف کیا تھا، تاہم آج وہ اپنے موقف سے پیچھے ہٹ رہے ہیں، سرکاری عہدے کا فائدہ بھی اٹھانا اور ساتھ ہی الزام تراشی کرنا قابل قبول نہیں، ایسا نہیں چلے گا۔وزیر اطلاعات پنجاب کا کہنا تھا کہ سالک حسین کے بھائی بھی گزشتہ روز ان کے الزامات کو مسترد کر چکے ہیں، اس لیے اب انہیں اپنے الزامات کا جواب دینا ہوگا، یوٹرن لینے سے کام نہیں چلے گا۔عظمی بخاری نے کہا کہ وزیراعلی مریم نواز نے دو سال کے دوران کھربوں روپے کے منصوبے شروع کیے اور مکمل کیے ہیں، کوئی ناقد بھی ان منصوبوں میں ایک دھیلے کی کرپشن کا الزام نہیں لگا سکا۔انہوں نے سوال اٹھایا کہ سالک حسین خود کہہ چکے ہیں کہ ان کے پاس شواہد نہیں، لیکن دوسری جانب انہوں نے الماریاں بھرنے کے الزامات لگائے ہیں، اب انہیں اس کا جواب دینا ہوگا۔ ادھر وزیر دفاع خواجہ آصف نے اتحادی جماعت پاکستان مسلم لیگ (ق) کے رہنما اور وفاقی وزیر چوہدری سالک حسین کی جانب سے پنجاب میں کرپشن کے حوالے سے عائد کیے الزامات پر ردعمل میں کہا ہے کہ ان کا بیان میری سیاسی سمجھ سے باہر ہے لیکن اگر یہ مستقبل کے کسی سیاسی ایجنڈے کا حصہ ہے تو سمجھ میں آتا ہے۔سماجی رابطے کی ویب سائٹ ایکس پر جاری بیان میں وزیر دفاع خواجہ آصف نے کہا کہ چوہدری سالک میرے لیے بہت محترم ہیں، ان کے بزرگوں کا مجھے اپنے بزرگوں جیسا احترام ہے لیکن ان کا پنجاب میں کرپشن سے متعلق بیان میری ناقص سیاسی سمجھ سے باہر ہے۔انہوں نے کہا کہ کرپشن ہمارے معاشرہ کا سب سے بڑا مسئلہ ہے اور یہ تمام مرکزی اور صوبائی سیاسی قیادت کی مشترکہ ذمہ داری ہے کہ ملک کو اس لعنت سے پاک کیا جائے۔خواجہ آصف نے کہا کہ چوہدری صاحب ماشا اللہ مرکزی اور صوبائی دونوں حکومتوں کا حصہ ہیں، دونوں حکومتوں کی قیادت پاکستان مسلم لیگ (ن) کے پاس ہے، مل کر جہاد کرتے ہیں۔ان کا کہنا تھا کہ اگر یہ بیان مستقبل کے کسی سیاسی ایجنڈے کا حصہ ہے کہ مریم نواز کی حکومت کو ٹارگٹ کرکے پنجاب و وفاق میں اپنے لیے جگہ بنائی جائے اور سیاسی مستقبل محفوظ کیا جائے تو پھر سمجھ آتا ہے۔وزیردفاع نے کہا کہ مریم نواز جس طرح پنجاب کے شہروں اور دیہات کی خدمت کر رہی ہیں اور حکومت پنجاب خدمت کے جو نئے معیار قائم کررہی ہے، اس سے مخالفین کے لیے چیلنج بہت مشکل ہوگا۔ادھر وفاقی وزیر چوہدری سالک حسین کی پارلیمنٹ میں صحافیوں سے گفتگو کے دوران بتایا کہ وزیر اعلی پنجاب کی طرف سے لیگل نوٹس کا ابھی سنا ہی ہے مل جائے تو پھر دیکھ لیتے ہیں اور ان شااللہ لیگل نوٹس کا بھرپور جواب دیں گے۔انہوں نے کہا کہ ڈی سی تعیناتی سے متعلق الزام بالکل من گھڑت ہے، کرپشن سے متعلق بیان میرا ذاتی ہے، میں نے اپنے بھائی سے انٹرویو دینے سے پہلے یا بعد میں کوئی بات نہیں کی۔چوہدری سالک حسین نے کہا کہ دو دن پہلے ان کا بیان نکال لیں انہوں نے خود تسلیم کیا ہے کہ پنجاب میں کرپشن ہو رہی ہے۔
عظمیٰ بخاری