خیبرپختونخوا میں امن و ترقی کیلئے وفاق کا تعاون ناگزیر : فیصل کریم کنڈی

پشاور(آئی این پی )خیبرپختونخوا میں سرمایہ کاری کے فروغ کیلئے ایس آئی ایف سی اور صوبائی حکومت کے درمیان اشتراک اور روابط جاری ہیں، اس سلسلے میں گورنر فیصل کریم کنڈی نے ایس آئی ایف سی کا دورہ کیا ہے۔گورنر خیبرپختونخوا فیصل کریم کنڈی نے دورے کے دوران اعلی حکام سے ملاقات کی، جس میں خیبرپختونخوا میں دستیاب کاروبار و سرمایہ کاری کے مواقع اور اسپیشل اکنامک زونز کی استعداد بہتر بنانے پر گفتگو ہوئی۔ملاقات میں وفد کو ایس آئی ایف سی کے تحت جاری ضابطہ جاتی اصلاحات اور کاروبار میں آسانی کے اقدامات سے بھی آگاہ کیا گیا۔ ایس آئی ایف سی صوبائی حکومتوں کے اشتراک سے سرمایہ کاروں کو ون ونڈو سہولت اور کاروباری آسانیاں فراہم کر رہی ہے۔