وفاقی حکومت نے سیاحت سے 40ارب روپے آمدن کا ہدف مقرر کر دیا

لاہور (این این آئی) وزیراعظم کے مشیر برائے سیاحت سردار یاسر الیاس خان نے کہا ہے کہ حکومت نے طویل المدتی منصوبہ سیاحت سے حاصل ہونے والی سالانہ آمدن کو40 ارب روپے تک پہنچانے کا ہدف مقرر کیا ہے، یہ ہدف آئندہ 10 سال میں حاصل کرنے کی کوشش کی جائے گی جس کے لیے بڑے اور معیاری فور اور فائیو سٹار ہوٹلز تعمیر کیے جائیں گے جن سے سیاحت کے شعبے کو بہت فائدہ پہنچے گا۔ ایک انٹرویو میں انہوں نے کہا کہ حکومت پبلک پرائیویٹ پارٹنر شپ کے تحت نئے سیاحتی منصوبوں کے آغاز کی کوشش کر رہی ہے، حکومت مختلف اراضی طویل المدتی لیز پر دینے کے لیے تیار ہے اور کوشش کی جارہی ہے کہ سرمایہ کاروں کو ایسی سہولیات فراہم کی جائیں جن سے سیاحت کے شعبے میں سرمایہ کاری آسان ہو سکے۔ انہوں نے کہا کہ پنجاب حکومت بھی سیاحت کے فروغ کو انتہائی اہمیت دے رہی ہے، مختلف ادوار میں مختلف منصوبوں پر زیادہ کام ہوتا ہے اور یہ تمام منصوبے دستیاب بجٹ کو مدنظر رکھتے ہوئے مکمل کیے جاتے ہیں۔ سردار یاسر الیاس خان نے کہا کہ اٹلی کا شہر روم چند سالوں میں نہیں بنا اور نہ ہی دبئی چند سالوں میں ترقی یافتہ شہر بنا ہے، ان کی تعمیر و ترقی میں کئی سال لگے، پاکستان بھی سیاحت کے شعبے میں بہت ترقی کر سکتا ہے۔