عقیدہ ختم نبوت ہماری پہچان’زندگی کا حقیقی وقار:رہنما مجلس

لاہور (پ ر) عالمی مجلس تحفظ ختم نبوت کی دعوت پر علما کا اجلاس ادارہ الفرقان شادی پورہ بند روڈ لاہور میں منعقد ہوا۔ اجلاس میں ختم نبوت رابطہ کمیٹی کے اراکین مولانا عزیزالرحمان ثانی، قاری محمد حنیف کمبوہ، مولانا قاری علیم الدین شاکر، مولانا خالد محمود، مولانا قاری ظہورالحق، ڈاکٹر عبدالواحد قریشی، مولانا عبدالنعیم،مولانا سعید وقار، مولانا محمد میاں، مولانا سید عبداللہ شاہ، مولانا زبیرجمیل، مولانا غلام مصطفی، مولانا شیر احمد، مولانا زاہد مدثر، مفتی نظام الدین اشرفی، مولانا ظہیر احمد قمر، مفتی محمد فاروق، مولانا سمیع اللہ،حافظ اخلاق احمد حامد بلوچ سمیت کئی علما کرام نے شرکت کی۔ اجلاس سے خطاب کرتے ہوئے علما نے کہا کہ عقیدہ ختم نبوت اور ناموس رسالت کا تحفظ کرنے والے حضور ۖ کی ذات اقدس کے چوکیدار ہیں۔ عقیدہ ختم نبوت اور ناموس رسالت کا ہر قیمت پر تحفظ کریں گے۔ عقیدہ ختم نبوت ہمارے ایمان کا بنیادی حصہ، ہماری پہچان، ہمارا فخر اور ہماری زندگی کا حقیقی وقار ہے۔ اس عقیدے کی حفاظت ہمارے لیے صرف ایک ذمہ داری نہیں بلکہ ایمان کی امانت ہے۔ قادیانیت کا فتنہ اسلام کے نام پر دھوکہ ہے، تمام علما اور کارکنان 18 نومبر ختم نبوت ٹیچرز کنونشن کی تیاری بھرپور اندازمیں کریں’ کنونشن کو کامیاب بنانا تمام مسلمانوں کی ذمہ داری ہے۔ اجلاس میں ختم نبوت ٹیچرز کنونشن کو کامیاب بنانے کے لئے مقامی طور پر مختلف کمیٹیاں تشکیل دی گئیں۔