پاکستان کسٹمز کا ای پی زیڈ رسالپور میں مبینہ فراڈ،درآمدی بے ضابطگیوں کا انکشاف

اسلام آباد(پ ر)پاکستان کسٹمز نے ایکسپورٹ پروسیسنگ زون (ای پی زیڈ) رسالپور میں قائم صنعتی یونٹ میسرز شپو پرائیویٹ لمیٹڈ کے خلاف مبینہ فراڈ، دھوکہ دہی، غیر مجاز اشیا کی درآمد اور سامان کی بھاری مقدار میں کمی سامنے آنے پر قانونی کارروائی شروع کر دی ہے۔ای پی زیڈ رسالپور میں قائم صنعتی یونٹس کے آڈٹ کے دوران کلکٹریٹ آف کسٹمز اپریزل، پشاور کو ڈائریکٹوریٹ آف ٹرانزٹ ٹریڈ، کراچی کی جانب سے اطلاع موصول ہوئی کہ میسرز شپو پرائیویٹ لمیٹڈ کی درآمد کردہ ایک کھیپ کو کراچی پورٹ پر ای پی زیڈ رسالپور کے لیے ٹرانس شپمنٹ پرمٹ (TP) کے اجرا سے قبل تفصیلی جانچ پڑتال کے لیے روک لیا گیا ہے۔ جانچ پڑتال کے دوران انکشاف ہوا کہ درآمد شدہ سامان یونٹ کے لائسنس کے تحت منظور شدہ اشیا سے مطابقت نہیں رکھتا تھا۔ اس سے مبینہ طور پر دھوکہ دہی کے ذریعے غیر مجاز اشیا درآمد کرنے اور کسٹمز قوانین کی خلاف ورزی کا معاملہ سامنے آیا۔ ان نتائج کی بنیاد پر ڈائریکٹوریٹ آف ٹرانزٹ ٹریڈ، کراچی نے متعلقہ قانونی دفعات کے تحت ایف آئی آر درج کر لی۔بعد ازاں، کلکٹریٹ آف کسٹمز اپریزل، پشاور نے مذکورہ صنعتی یونٹ کا خصوصی آڈٹ اور اسٹاک کی جانچ پڑتال کی، جس کے دوران درآمد شدہ سامان کی بھاری مقدار میں کمی سامنے آئی۔ ابتدائی نتائج کے مطابق اس کمی کے نتیجے میں کسٹمز ڈیوٹی اور ٹیکسوں کی ممکنہ چوری کا تخمینہ تقریبا 11 کروڑ 70 لاکھ روپے لگایا گیا ہے۔ ان بے ضابطگیوں سے مبینہ فراڈ، دھوکہ دہی اور محصولات کی ادائیگی سے بچنے کے لیے کسٹمز قوانین کی خلاف ورزی کے شواہد سامنے آئے۔ اس ضمن میں مزید قانونی کارروائی کرتے ہوئے 06 نومبر 2026 کو صنعتی یونٹ کے خلاف علیحدہ ایف آئی آر درج کر لی گئی۔دریں اثنا، 08 نومبر 2026 کو مذکورہ صنعتی یونٹ کے احاطے میں آتشزدگی کا واقعہ پیش آیا۔ واقعے کی وجوہات اور حالات کا تاحال تعین نہیں ہو سکا۔ متعلقہ زون اتھارٹی کی جانب سے مروجہ طریقہ کار کے مطابق واقعے کی تحقیقات اور وجوہات کا تعین متوقع ہے۔پاکستان کسٹمز نے واضح کیا ہے کہ فراڈ، دھوکہ دہی، غیر قانونی درآمدات اور سرکاری محصولات کی چوری کے خلاف قانون کے مطابق کارروائی جاری رکھی جائے گی۔ پاکستان کسٹمز کسٹمز قوانین کے مثر نفاذ، قومی خزانے کے تحفظ اور ایکسپورٹ پروسیسنگ زونز میں شفافیت اور جوابدہی یقینی بنانے کے لیے پرعزم ہے۔ اس معاملے میں تمام قانونی کارروائی متعلقہ قوانین اور ضوابط کے مطابق آگے بڑھائی جائے گی۔