لاہور(نیوز ایجنسیاں ) لاہور ایک بار پھر دنیا کے آلودہ ترین بڑے شہروں کی فہرست میں پہلے نمبر پر رہا، جہاں فضائی آلودگی کی سطح انتہائی خطرناک ہوگئی ۔علاوہ ازیں ملک کے مختلف علاقوں میں بارش اور پہاڑوں پر برف باری کا سلسلہ شروع ہوگیا ہے جبکہ بارش برسانے والا نیا طاقتور مغربی سلسلہ ملک میں داخل ہوچکا ہے ۔آئی کیو ایئر کے مطابق لاہور کا ایئر کوالٹی انڈیکس 453ریکارڈ کیا گیا، جبکہ بھارتی دارالحکومت دہلی 224اے کیو آئی کے ساتھ دوسرے نمبر پر رہا۔آئی کیو ایئر کے مطابق لاہور کے سی ای آر پی آفس میں اے کیو آئی 706، علامہ اقبال ٹان میں 690 اور برکی روڈ پیراگون میں 639 تک پہنچ گیا۔ رائیونڈ میں 509 جبکہ کاہنہ نو میں 511 اے کیو آئی ریکارڈ کیا گیا، شہر کی مجموعی ریڈنگ ایک اور مقام پر 459 بھی رپورٹ ہوئی۔پنجاب ایئر کوالٹی مانیٹرنگ کے اعداد و شمار کے مطابق ملتان روڈ پر اے کیو آئی 500 کی انتہائی حد کے ساتھ پی ایم 2.5 کی مقدار 541.1 اور پی ایم 10 کی مقدار 1398.3 مائیکروگرام ریکارڈ کی گئی۔ سفاری پارک اور جی ٹی روڈ پر بھی اے کیو آئی 500 رہا، جبکہ کاہنہ نو میں 490، گلبرگ تھری میں 475 اور ایجرٹن روڈ پر 432ریکارڈ کیا گیا۔شاہدرہ اور ڈی ایچ اے فیز 6 میں اے کیو آئی 392، برکی روڈ پر 390، پنجاب یونیورسٹی میں 373 اور واہگہ بارڈر پر 256 ریکارڈ ہوا۔دوسری جانب لاہور کے علاوہ پنجاب کے دیگر شہروں میں بھی فضائی آلودگی کی صورتحال تشویشناک ہے۔ ملتان میں اے کیو آئی 828، گوجرانوالہ میں 565 اور کاہنہ نو میں 511 ریکارڈ کیا گیا۔انسداد اسموگ اقدامات کے باوجود لاہور کے متعدد علاقوں میں فضائی آلودگی خطرناک سطح پر برقرار ہے، جس سے شہریوں کی صحت کو سنگین خطرات لاحق ہیں۔ادھر خیبر پختونخوا کے مختلف اضلاع میںوقفے وقفے سے بارش اور پہاڑوں پر برفباری سے سردی کی شدت میں غیر معمولی اضافہ ہوگیا۔گزشتہ رات سے چترال بھر میں وقفے وقفے سے بارش اور پہاڑوں پر برفباری جاری ہے۔ لواری ٹنل، کالاش ویلیز، مڈک، لشٹ، گبور، بگوشٹ اور بالائی چترال کے کئی علاقوں میں ہلکی برفباری ہوئی۔دوسری جانب محکمہ موسمیات کے مطابق پاکستان میں بارش برسانے والا نیا طاقتور مغربی سلسلہ داخل ہوگیا، جس کے زیرِ اثر ملک کے بالائی و میدانی علاقوں میں بارش ، برفباری اور ژالہ باری کا سلسلہ شروع ہوگیا۔پی ڈی ایم اے کا کہنا ہے کہ طاقتور مغربی سلسلہ 14 نومبر تک جاری رہے گا۔ اس کے زیرِ اثر پنجاب، خیبر پختونخوا اور بلوچستان کے متعدد اضلاع میں گرج چمک، تیز ہواں اور ژالہ باری کی توقع ہے۔تاہم صوبہ سندھ اور کراچی میں موسم بنیادی طور پر گرم و خشک رہنے کا امکان ہے۔کراچی میں کم سے کم درجہ حرارت 20 ڈگری اور موجودہ 22 ڈگری سینٹی گریڈ ریکارڈ کیا گیا، ہوا میں نمی کا تناسب 86 فیصد ہے جبکہ 4 کلومیٹر فی گھنٹہ کی رفتار سے شمال مشرقی ہوائیں چل رہی ہیں۔شہرِ قائد میں آج زیادہ سے زیادہ درجہ حرارت 33 سے 35 ڈگری سینٹی گریڈ تک رہنے کی پیشگوئی کی گئی ہے۔دوسری جانب کاغان ویلی، بٹہ کنڈی، بیسر، بابوسر ٹاپ، جھیل سیف الملوک، جھیل لولو سر، چترال اور سیاحتی مقام بروغل کے پہاڑوں پر موسمِ سرما کی برفباری کے بعد ہر طرف سفیدی چھا گئی ۔محکمہ موسمیات کے مطابق بارش اور برفباری کا یہ سلسلہ اگلے 3 روز تک جاری رہنے کا امکان ہے، جس سے ملک میں درجہ حرارت 2 سے 4 ڈگری سینٹی گریڈ تک گر جائے گا۔بارش کے نتیجے میں پنجاب کے مختلف شہروں میں چھائی شدید اسموگ کی شدت میں کمی متوقع ہے، تاہم پہاڑی علاقوں میں لینڈ سلائیڈنگ اور میدانی علاقوں میں دھند چھانے کا خدشہ ہے۔
فضائی آلودگی
