سبزیاں مہنگے داموں فروخت؛ سرکاری نرخ نامہ نظر انداز، شہری پریشان

اسلام آباد (پ ،ر)وفاقی دارالحکومت پنڈوریاں اسلام آباد کے مختلف پرچون بازاروں اور اتوار بازاروں میں سبزیوں کی قیمتوں میں خود ساختہ اضافے اور سرکاری نرخ نامے پر عمل درآمد نہ ہونے کی شکایات شدت اختیار کر گئی ہیں۔ ضلعی
انتظامیہ کی جانب سے جاری کردہ نرخوں کے برعکس دکاندار من مانے دام وصول کر رہے ہیں، جس سے شہریوں کی قوتِ خرید بری طرح متاثر ہو رہی ہے۔مارکیٹ سروے کے مطابق اسلام آباد کے مختلف سیکٹرز اور نواحی علاقوں میں روزمرہ استعمال کی سبزیوں کی قیمتیں آسمان سے باتیں کر رہی ہیں۔ تازہ ترین صورتحال کے مطابق پرچون مارکیٹ میں پیاز 220 روپے، ٹماٹر 230 روپے، لہسن 460 روپے اور ادرک 420 روپے فی کلو تک فروخت ہو رہا ہے۔ اسی طرح شملہ مرچ 350 روپے، مٹر 300 روپے اور بھنڈی 220 روپے فی کلو میں دستیاب ہے۔دیگر سبزیوں میں بند گوبھی 180 روپے، پھول گوبھی 150 روپے جبکہ کھیرا اور گاجر 130 روپے فی کلو تک فروخت کیے جا رہے ہیں۔ دوسری جانب موسمی سبزیوں میں آلو 70 روپے، مولی 60 روپے اور ساگ 50 روپے فی کلو کے حساب سے دستیاب ہے۔سرکاری نرخ نامے اور مارکیٹ میں وصول کی جانے والی قیمتوں کے درمیان اس نمایاں فرق پر شہریوں نے شدید تشویش کا اظہار کیا ہے۔ شہریوں کا کہنا ہے کہ پرائس کنٹرول مجسٹریٹس کی عدم توجہی کے باعث ناجائز منافع خور بے لگام ہو چکے ہیں۔ عوام نے ضلعی انتظامیہ اسلام آباد سے مطالبہ کیا ہے کہ فوری طور پر گرانفروشوں کے خلاف سخت کارروائی عمل میں لائی جائے اور سرکاری نرخ نامے پر عمل درآمد کو یقینی بنایا جائے۔