لاہور(خبریں ڈیجیٹل)لاہور میں سبزیوں اور پھلوں کی قیمتوں میں اضافے اور سرکاری نرخ نامے پر عمل درآمد نہ ہونے کے باعث شہریوں کو مشکلات کا سامنا ہے۔ مارکیٹ میں کئی سبزیاں اور پھل سرکاری نرخوں سے کہیں زیادہ قیمت پر فروخت کیے جا رہے ہیں، جس سے گھریلو بجٹ متاثر ہو رہا ہے۔تفصیلات کے مطابق لاہور میں ٹماٹر کی سرکاری قیمت 170 سے 200 روپے فی کلو مقرر ہونے کے باوجود اوپن مارکیٹ میں 280 سے 320 روپے فی کلو فروخت ہو رہے ہیں۔ پیاز کی سرکاری قیمت 160 سے 170 روپے ہے جبکہ دکانوں پر 180 سے 220 روپے فی کلو فروخت کیے جا رہے ہیں۔لہسن دیسی کی سرکاری قیمت 225 سے 235 روپے فی کلو ہے، تاہم اوپن مارکیٹ میں 300 سے 320 روپے وصول کیے جا رہے ہیں۔ چینی لہسن تقریبا 700 روپے فی کلو فروخت ہو رہا ہے۔ مقامی توری کی قیمت 300 روپے جبکہ پھلیاں 200 سے 300 روپے فی کلو تک فروخت ہو رہی ہیں۔پھلوں کی قیمتوں کی صورتحال بھی مختلف نہیں۔ کیلے سرکاری نرخوں سے زائد قیمت پر فروخت ہو رہے ہیں جبکہ کھجور کی سرکاری قیمت 310 سے 435 روپے فی کلو ہونے کے باوجود اوپن مارکیٹ میں 800 سے 2400 روپے تک وصول کیے جا رہے ہیں۔اسی طرح انگور گولا 400 سے 500 روپے فی کلو جبکہ سندرخانی انگور 800 سے 1000 روپے فی کلو فروخت ہو رہے ہیں۔ توفی انگور کی قیمت بھی تقریبا 800 روپے فی کلو تک پہنچ گئی ہے۔دوسری جانب لاہور کی منڈی کے دستیاب تازہ تھوک نرخوں کے مطابق آلو 46 روپے، پیاز 165 روپے، ٹماٹر 150 روپے، مٹر 186 روپے، پالک 37 روپے اور گوبھی تقریبا 93 روپے فی کلو ریکارڈ کی گئی ہے۔ شہریوں نے متعلقہ انتظامیہ سے مطالبہ کیا ہے کہ سرکاری نرخ نامے پر سختی سے عمل درآمد یقینی بنایا جائے اور ناجائز منافع خوری کرنے والے دکانداروں کے خلاف کارروائی کی جائے تاکہ عوام کو مناسب قیمتوں پر اشیائے خورونوش دستیاب ہو سکیں۔
لاہور میں سبزیاں اور پھل مہنگے داموں فروخت سرکاری نرخ نامے اور اوپن مارکیٹ قیمتوں میں نمایاں فرق شہری مہنگائی سے پریشان

