لاہور(اپنے سٹا ف رپورٹر سے) پنجاب اسمبلی نے ڈرامیٹک اینڈ تھیٹریکل پرفارمنسز ایکٹ 2026
منظور کر لیا۔ وزیر اطلاعات و ثقافت پنجاب عظمیٰ بخاری نے ایوان میں بل پیش کیا۔ نئے قانون کا مقصد تھیٹر کو منظم، معیاری اور خاندانی تفریح کے لیے موزوں بنانا، فنکاروں کے حقوق کا تحفظ اور فحاشی و غیر اخلاقی مواد کی روک تھام ہے۔وزیر اطلاعات و ثقافت پنجاب عظمیٰ بخاری نے ایوان میں اظہار خیال کرتے ہوئے کہا کہ نئے تھیٹر ایکٹ کے تحت فنکاروں کی رجسٹریشن فیس ختم کر دی گئی ہے، تاہم ہر فنکار کے لیے رجسٹریشن لازمی ہوگی۔ کسی بھی تھیٹر میں غیر رجسٹرڈ فنکار سے پرفارمنس کروانے کی صورت میں تھیٹر سیل کر دیا جائے گا۔ تھیٹرز میں ہراسانی یا فنکاروں کو کم از کم اجرت ادا نہ کرنے پر متعلقہ تھیٹر کا لائسنس منسوخ کیا جا سکے گا، جبکہ فحش اور بیہودہ پرفارمنسز پر مکمل پابندی ہوگی۔عظمیٰ بخاری نے کہا کہ یہ قانون ثقافت، فن یا ڈرامے پر پابندی لگانے کے لیے نہیں بلکہ تھیٹر کو ضابطے میں لانے اور اس کے ماحول کو بہتر بنانے کے لیے متعارف کروایا گیا ہے۔ موجودہ کمرشل تھیٹرز میں ہونے والی سرگرمیاں معاشرے کی اخلاقی اقدار سے مطابقت نہیں رکھتیں۔ اپوزیشن کی گفتگو سے یوں محسوس ہوتا ہے جیسے تھیٹر میں سب کچھ مثالی چل رہا تھا اور حکومت نے اچانک پابندیاں عائد کرنے کا فیصلہ کر لیا ہے، حالانکہ حقیقت اس کے برعکس ہے۔انہوں نے کہا کہ تھیٹر کو ایک مخصوص طبقے تک محدود کر دیا گیا ہے، حالانکہ عام شہری اور خاندان بھی معیاری اور صاف ستھرا تھیٹر دیکھنے کے خواہش مند ہیں۔ وزیراعلیٰ پنجاب مریم نواز شریف کا وڑن ہے کہ تھیٹر کو خاندانوں کے لیے ایک محفوظ اور معیاری تفریحی ذریعہ بنایا جائے۔ الحمراء میں تین تھیٹر ڈرامے پیش کیے گئے جنہیں انہوں نے اپنی بیٹی کے ہمراہ دیکھا، جبکہ وزیراعظم کی فیملی نے بھی ان ڈراموں میں شرکت کی۔ یہ اس بات کا ثبوت ہے کہ معیاری تھیٹر پورے خاندان کے لیے قابل قبول اور قابلِ توجہ تفریح بن سکتا ہے۔وزیر اطلاعات و ثقافت نے کہا کہ پنجاب میں ایک وقت ایسا بھی تھا جب بہترین تھیٹر پیش کیا جاتا تھا اور اس میں کوئی نہ کوئی سماجی سبق ضرور ہوتا تھا۔ آج کے تھیٹر کے ماحول پر خود سوالات اٹھ رہے ہیں۔ سہیل احمد، خالد عباس ڈار اور وسیم عباس جیسے نامور فنکاروں نے تھیٹر کیوں چھوڑا؟ ظاہر ہے کہ جس نوعیت کا تھیٹر آج پیش کیا جا رہا ہے، وہ ایسے فنکاروں کے معیار اور تخلیقی اقدار سے مطابقت نہیں رکھتا۔عظمیٰ بخاری نے تھیٹر سے وابستہ خواتین فنکاروں کو درپیش مسائل کا ذکر کرتے ہوئے کہا کہ ان کے پاس خواتین آرٹسٹ آتی ہیں اور ایسے واقعات بیان کرتی ہیں جو انتہائی تشویش ناک ہیں۔ بعض پروڈیوسرز مبینہ طور پر انہیں نامناسب لباس پہننے اور غیر اخلاقی حرکات پر مجبور کرتے ہیں۔ حتیٰ کہ انہیں مخصوص نشستوں پر زیادہ قیمت کے ٹکٹ خریدنے والے تماشائیوں کو متوجہ کرنے کے لیے نامناسب اقدامات کرنے کا بھی کہا جاتا ہے۔ تھیٹرز سے متعلق بعض شکایات اور واقعات اس قدر سنگین ہیں کہ انہیں بیان کرنا بھی مشکل ہے۔انہوں نے مزید کہا کہ وزیراعلیٰ پنجاب نے فنکار برادری کے لیے آرٹسٹ کالونی بنانے کا اعلان بھی کیا ہے، جو فنکاروں کی فلاح و بہبود کے لیے حکومت کے عزم کا اظہار ہے۔ پنجاب حکومت تھیٹر پر پابندی نہیں لگانا چاہتی بلکہ اسے منظم، مانیٹر اور معیاری بنانا چاہتی ہے تاکہ فنکاروں کو باعزت ماحول میسر آئے اور عوام کو معیاری تفریح فراہم کی جا سکے۔وزیر اطلاعات و ثقافت پنجاب نے واضح کیا کہ ڈرامیٹک اینڈ تھیٹریکل پرفارمنسز ایکٹ 2026 کا بنیادی مقصد پنجاب کے شاندار تھیٹر کلچر کی بحالی، فنکاروں کے حقوق کا تحفظ، غیر اخلاقی سرگرمیوں کا خاتمہ اور خاندانوں کے لیے ایک مثبت، محفوظ اور صحت مند تفریحی ماحول فراہم کرنا ہے۔
ایکٹ منظور
پنجاب اسمبلی نے ڈرامیٹک اینڈ تھیٹریکل پرفارمنسز ایکٹ 2026 منظور کرلیا

