راولپنڈی(خصوصی رپورٹر)چیف ٹریفک آفیسر راولپنڈی فرحان اسلم کی ہدایات پر ڈی ایس پی ٹریفک ہیڈ کوارٹرز محمد کلیم اختر نے پولیس لائنز میں ٹریفک پولیس کی سرکاری گاڑیوں، موٹر سائیکلوں اور لفٹرز کی انسپکشن کی۔ڈی ایس پی ٹریفک نے سرکاری گاڑیوں کے مکینیکل و الیکٹرک سسٹم، انجن آئل اور مجموعی حالت کا تفصیلی جائزہ لیا۔ انسپکشن کے دوران مکینکلی ان فٹ ایک سرکاری گاڑی اور دو لفٹرز کو مرمت مکمل ہونے تک فیلڈ ڈیوٹی سے ہٹا کر ایم ٹی کلوز کر تے ہوئے ایم ٹی او کو ہدایت کی کہ خراب گاڑیوں اور لفٹرز کی فوری مرمت یقینی بنائی جائے تاکہ انہیں مکمل طور پر فٹ ہونے کے بعد ہی فیلڈ ڈیوٹی پر تعینات کیا جا سکے۔انہوں نے سرکاری گاڑیوں اور موٹر سائیکلوں کے انجن آئل کی بروقت تبدیلی اور ان کی باقاعدہ دیکھ بھال یقینی بنانے کی بھی ہدایت کی۔ صاف ستھری اور بہترین حالت میں سرکاری گاڑیاں و موٹر سائیکلیں رکھنے پر ڈرائیورز کی حوصلہ افزائی کرتے ہوئے انہیں شاباش بھی دی۔ڈی ایس پی ٹریفک محمد کلیم اختر کا کہنا تھا کہ سرکاری گاڑیوں، موٹر سائیکلوں اور لفٹرز کی مناسب دیکھ بھال، بروقت مرمت اور انہیں فٹ حالت میں رکھنا تمام متعلقہ ملازمین کی ذمہ داری ہے۔ سرکاری وسائل کی خرابی یا غفلت کے باعث نقصان کی صورت میں متعلقہ ڈرائیور کے خلاف محکمانہ کارروائی عمل میں لائی جائے گی۔
