شیخوپورہ (بیورو رپورٹ) پاکستان مسلم لیگ (ن) کے سینئر رہنماءاور سابق وفاقی وزیر اطلاعات پرویز رشید نے کہا ہے کہ عوام اپنے ووٹ کے تقدس اور احترام کیلئے نواز شریف کے ساتھ ہیں،نواز شریف نے ملک کو اندھیروں سے نکال کر روشن ،مسلم لیگ کو ڈرائنگ روم سے نکال عوامی پذیرائی بخشی۔رہنماءمسلم لیگ (ن) پرویز رشید نے یہ بات ہفتہ کو میڈیا سے گفتگوکرتے ہوئے کہی ۔ انہوں نے کہا کہ (آج) کا مسلم لیگ (ن )کا جلسہ شیخوپورہ کی تاریخ کا سب سے بڑا جلسہ ثابت ہو گا۔ انہوں نے کہا کہ جلسے کی جگہ کو تین گنا بڑھایا جا چکا ہے، انہوں نے کہا کہ محمد نواز شریف نے وزارت عظمیٰ کے منصب کو عزت اور توقیر دی،ملک کو اندھیروں سے نکال کر روشن کیااور مسلم لیگ کو ڈرائنگ روم سے نکال عوامی پذیرائی بخشی۔ انہوں نے کہا کہ محمد نواز شریف کی شخصیت کسی عہدے کی محتاج نہیں۔ انہوں نے ملک کو ایٹمی قوت بنایا۔ انہوں نے کہا کہ عوام اپنے ووٹ کے تقدس اور احترام کیلئے نواز شریف کے ساتھ ہیں،وہ ایسا پاکستان چاہتے ہیں جہاں عوام کی حکمرانی ہو۔ انہوں نے کہا کہ پہلی بار پاکستانی عوام نے نواز شریف کےخلاف سازش پر مزاحمت کی ہے۔ انہوں نے کہا کہ عوام شیخوپورہ میں بھی نواز شریف کےساتھ بھرپور یکجہتی کا اظہار کرینگے ۔ اس موقع پر لیگی رہنماءمیاں جاوید لطیف نے کہا کہ پاکستانی عوام نے جمہوریت کےلئے سب سے زیادہ جدوجہد کی۔ دوسرے شہروں کی طرح شیخوپورہ کے عوام نواز شریف کا بھرپور استقبال کریں گے۔
