اسلام آباد(خصوصی رپورٹ)وفاقی وزیر داخلہ چوہدری نثار علی خان کی زیر صدارت اعلیٰ سطح کے اجلاس میں تحریک انصاف کے دھرنے کی سیکیورٹی سمیت دیگر انتظامات کا جائزہ لیتے ہوئے تمام اہم عمارتوں اور تنصیبات کی سیکیورٹی کو فول پروف بنانے کا فیصلہ کیا گیا۔ ہفتہ کووفاقی وزیر داخلہ چوہدری نثار علی خان کی زیر صدارت تحریک انصاف کے دھرنے کے سیکیورٹی سمیت دیگر انتظامات کا جائزہ لینے کے لئے اجلاس ہوا جس میں اسلام آباد اور راولپنڈی کی انتظامیہ اور پولیس افسروں نے شرکت کی ، اجلاس میں تحریک انصاف کے دھرنے کی صورت میں جڑواں شہروں کے رہائشیوں کو درپیش مشکلات کا جائزہ لیا گیا ،وزیرداخلہ نے راولپنڈی اور اسلام آباد کی انتظامیہ کو سیکیورٹی سے متعلق ذمہ داریاں سونپتے ہوئے شہریوں کی مشکلات کو کم سے کم کرنے کی ہدایت کی ۔وزیرداخلہ کو اسلام آباد کے داخلی اور خارجی راستوں سے متعلق بھی بریفنگ دی گئی جبکہ اجلاس میں دھرنے کے شرکاءکو اسلام آبادمیں داخل ہونے سے روکنے کی حکمت عملی پر بھی تفصیلی تبادلہ خیال کیا گیااور تمام اہم عمارتوں اور تنصیبات کی سیکیورٹی کو فول پروف بنانے کا فیصلہ کیا گیا ،دھرنے کی صورت میں صوبوں سے طلب کی گئی نفری کے قیام وطعام سمیت تعیناتی پر بھی تبادلہ خیال گیا ۔

مکہ مکرمہ (خصوصی رپورٹ) سورج کے گرد زمین کی گردش کے دوران کبھی کبھار سورج عین خانہ کعبہ کے اوپر آ جاتا ہے۔ اگرچہ ایسا سال میں دو بار ہوتا ہے لیکن رواں سال یہ دوسرا موقع ہے جب آفتاب خانہ کعبہ کے عین اوپر جلوہ فگن ہوا ہے۔ سورج خانہ کعبہ کے عین اوپر نماز جمعہ کی اذان کے وقت آیا۔ یہ ایک دلفریب فلکیاتی منظر تھا۔ جب زمین پر اللہ کا گھر اور سورج ایک ہی قطار میں اوپر نیچے دکھائی دیئے۔ ماہرین فلکیات کے مطابق جمعہ کو سورج مکہ مکرمہ میں 90 درجے کے زاویے پر آیا، جو سعودی عرب کے معیاری وقت کے مطابق 12:27 پرعین خانہ کعبہ کے اوپر پہنچا۔ سورج سال میں دو بار خانہ کعبہ کے برابر آتا ہے۔ ایک بار موسم گرما اور دوسری بار موسم سرما میں برج جدی اور برج سرطان کے دوران آفتاب کی کرنیں عین خانہ کعبہ کے اوپر سے چمکتی ہیں۔ چونکہ خانہ کعبہ خط استوا اور برج سرطان کے مدار پر تعمیر کیا گیا ہے۔ اس لیے سورج اور زمین کی گردش سے بیت اللہ براہ راست مستفید ہوتا ہے۔
سایہ فگن

کراچی (خصوصی رپورٹ) ایم کیو ایم لندن کی سرگرمیوں پر مکمل پابندی لگانے کا فیصلہ کرلیا گیا ہے، اس ضمن میں وفاق اور صوبہ میں اتفاق رائے ہوگیا۔ اس سے قبل وفاق نے ملک دشمن عناصر کی سرگرمیوں پر تشویش کا اظہار کیا تھا جس کے بعد وفاق اور صوبے کے درمیان رابطے ہوئے اور طے ہوا کہ ملک دشمن سیاست پر کوئی سمجھوتہ نہیں ہوگا اور ملک کے خلاف نعرے لگانے والوں کے سا تھ کوئی رعایت نہیں کی جائیگی۔ یہ بھی طے ہوا ہے کہ الطاف حسین کو سیاست کی اجازت نہیں دی جائیگی۔ ذرائع نے بتایا ہے کہ وفاقی وزات داخلہ اور صوبائی محکمہ داخلہ کے درمیان طویل مشاورت کے بعد ایم کیو ایم لندن کو نکیل ڈالنے کا فیصلہ ہوا ہے۔ وفاقی اور صوبائی حکومتوں نے جمعرات کو نائن زیرو پر قابل اعتراض نعروں کا نوٹس بھی لیا تھا جبکہ پیپلز پارٹی سمیت مختلف سیاسی جماعتوں نے ایم کیو ایم پر پابندی کا مطالبہ کیا تھا اور اپیل کی تھی کہ ایم کیو ایم کی سیاسی سرگرمیاں بند کی جائیں۔ ذرائع نے بتایا ہے کہ صوبے اور وفاق نے اس ضمن میں اپوزیشن کو اعتماد میں لیا ہے نہ صرف وفاق اور صوبہ بلکہ حکومت اور اپوزیشن ایک صفحہ پر ہے اور یہ فیصلہ ہوا کہ پا کستان مخالف عناصر کو کھلے بندوں سرگرمیوں کی اجازت نہیں دی جائیگی اور ان کی سرکوبی کیلئے وفاق اور صوبہ رابطے میں رہیں گے۔