اسلام آباد (ویب ڈیسک)مسلم لیگ ن کے رہنما اور ممبر قومی اسمبلی احسن اقبال کا کہنا ہے کہ حکومت کے انتقامی ایجنڈے کی وجہ سے ہر کوئی ملک سے اپنا سرمایہ نکال رہا ہے۔قومی اسمبلی اجلاس میں اظہار خیال کرتے ہوئے احسن اقبال کا کہنا تھا کہ فردوس عاشق اعوان نے کہا ہے کہ ملک کے اندر کمر توڑ مہنگائی ہے، بجائے ہم کہتے ترجمان حکومت نے خود تسلیم کر لیا کہ کمر توڑ مہنگائی ہوئی ہے۔انہوں نے کہا کہ آج ملک میں مہنگائی 14 فیصد ہے، یہ بدترین اقتصادی بحران مین میڈ بحران ہے، موجودہ اقتصادی بحران حکومت کی نالائقی اور ناہلی کی وجہ سے ہے۔ان کا کہنا تھا کہ آج پاکستان میں ریکارڈ مہنگائی، بیروزگاری، غربت اور معاشی سست روی ہے جب کہ حکومت چینی اور آٹا مافیا کے ذریعے عوام کو دونوں ہاتھوں سے لوٹ رہی ہے۔سابق وزیر داخلہ نے کہا مشیر خزانہ نے کہا کہ آئی ایم ایف کے نمائندگان پر تنقید نہیں کرنی چاہیے، آئی ایف کے لوگ آسمان سے نہیں اترے کہ ان پر تنقید نہ کی جا سکے۔انہوں نے کہا کہ آئی ایم ایف کے پاس جانے پر اعتراض نہیں لیکن ملکی مفادات کو بھی مد نظر رکھا جانا چاہیے، آج کے دور میں معیشت گدھے کی رفتار سے نہیں الیکٹرک کی رفتار سے چلتی ہے، حکومت کو معلوم نہیں تھا کہ آئی ایم ایف کے ساتھ کس طرح مذاکرات ہوتے ہیں۔ان کا کہنا تھا معیشت صرف اعداد و شمار سے نہیں بلکہ اعتماد کے ساتھ چلتی ہے، حکومت کے انتقامی ایجنڈے کی وجہ سے ہر کوئی ملک سے اپنا سرمایہ نکال رہا ہے۔حکومت پر تنقید جاری رکھتے ہوئے احسن اقبال نے مزید کہا کہ یہ انگوٹھا چھاپ حکومت ہے جس کی وجہ سے آج بیروزگاری پیدا ہوئی ہے، انہوں نے آئی ایم کے سامنے قلم رکھ دیا کہ جو لکھنا چاہتے ہیں لکھ دیں، ان سے جو سوال کریں کہتے ہیں کہ آپ نے یہ کیا وہ کیا۔احسن اقبال نے کہا کہ یہاں 10، 20 سال پرانی حکومتوں کی بات نہیں ہو رہی، ہم نے غلط کیا تسلیم کرتے ہیں تو آپ بھی تسلیم کر لیں کہ آپ نے بھی غلط کیا ہے، ہم نے جو پانچ سال میں جو قرضہ لیا انہوں نے 18 ماہ میں اتنا قرضہ لے لیا، اگر قرضہ زہر تھا تو آپ نے 18 ماہ میں عوام کو کتنا زہر کھلایا۔انہوں نے کہا کہ حکومت کی معیشت کا نمونہ لنگر خانہ ہے، چندہ جمع کرنے میں اور ملک چلانے میں بہت فرق ہے۔رہنما ن لیگ نے کہا کہ پاکستان جس بحران میں پھنس چکا ہے اس کا حل اس حکومت کے پاس نہیں ہے، ملک کو اس دلدل سے نکالنے کے لیے آزاد اور منصفانہ انتخابات کی ضرورت ہے۔

اسلام آباد (ویب ڈیسک)وزیر اعظم عمران خان کا کہنا ہے کہ عزت اور ذلت دینے والی ذات بھی اللہ کی ہے لہٰذا شام کو میڈیا پر آکر عمران خان سے متعلق جو مرضی کہو عزت اللہ دینے والا ہے۔اسلام آباد میں ‘نیشنل انکیوبیشن سینٹر اسٹارٹ اَپس’ کی تقریب سے خطاب کرتے ہوئے وزیر اعظم عمران خان نے کہا کہ ‘پوری دنیا میں جو بڑے کام ہوتے ہیں وہ آئیڈیاز کی بنیاد پر ہی ہوتے ہیں، اچھے سے اچھے آئیڈیاز والے لوگ اس لیے کامیاب نہیں ہوتے کیونکہ وہ راستے میں ہی ہار مان جاتے ہیں اور خوفزدہ ہوجاتے ہیں کہ لوگ کیا کہیں گے اور ناکامیوں سے ڈرتے ہیں۔’انہوں نے کہا کہ ‘کامیاب انسان وہ ہوتا ہے جو آئیڈیاز کے پیچھے کشتیاں جلا کر جاتا ہے اور واپس نہ جانے کا فیصلہ کر لیتا ہے، جب آپ ہار نہ مانتے ہوئے بار بار کوشش کرتے ہیں اور اپنی غلطیوں سے سیکھتے ہیں تو مضبوط ہوجاتے ہیں اور اپنے مشن کے قریب پہنچ جاتے ہیں۔’ان کا کہنا تھا کہ ‘یہ اسٹارٹ اَپس لانے والے وہ لوگ ہیں جن میں اپنے آئیڈیاز کے پیچھے جانے کا حوصلہ ہے اور وہ معاشرہ جو ایسے لوگوں کی مدد اور حوصلہ افزائی کرتا ہے وہ آگے بڑھتا ہے، زوال پذیر معاشرہ کبھی ایسے لوگوں کی حوصلہ افزائی نہیں کرتا۔’انہوں نے کہا کہ ‘اللہ نے انسان کو جو طاقت دی ہے وہ پوری زندگی میں اس طاقت کا 4 فیصد بھی استعمال نہیں کرتا اس لیے کیونکہ انسان ڈرتا ہے، تجربات اور ناکامیوں سے خوفزدہ ہوتا ہے، یہ خوف ہی ہوتا ہے جو انسان کو اس کی اصل طاقت کے استعمال سے روکتا ہے۔’وزیر اعظم نے کہا کہ ‘زندگی اور موت اللہ نے اپنے ہاتھ میں رکھی ہے، عزت اور ذلت دینے والی ذات بھی اللہ کی ہے لہٰذا شام کو میڈیا پر آکر عمران خان سے متعلق جو مرضی کہو عزت اللہ دینے والا ہے۔’انہوں نے کہا کہ ‘نئی چیز، نئے راستے اور نئی سوچ آزاد ذہن رکھنے والے رکھتے ہیں، غلام ذہن تو پیچھے پیچھے چلتا ہے، آزاد انسان اپنے راستے بناتا ہے اور بڑے کام کرتا ہے۔’

لاہور(ویب ڈیسک) مسلم لیگ (ن) نے حکومت کے ریلیف پیکیج کو جہانگیر ترین اور خسرو بختیار کے لیے ریلیف پیکج قرار دے دیا۔حکومت کے ریلیف پیکج پر رد عمل دیتے ہوئے مسلم لیگ (ن) کی ترجمان مریم اورنگزیب نے کہا کہ عمران مافیاکا 15 ارب کاپیکج عوام سےدھوکا، غریبوں کا مزیدمعاشی قتل عام ہے، یہ پیکج جہانگیر ترین اور خسرو بختیار کے لیے ’ریلیف پیکج‘ ہے، عوام کے لیے یہ ’تکلیف پیکج‘ ہے، جعلی پیکج سے آٹا، چینی، گھی، بجلی اور گیس مزیدمہنگی ہوگی۔انہوں نے کہا کہ مسئلہ اب پاکستان کا ہے، ملکی معیشت، سیکیورٹی ، سلامتی اور سا لمیت کا ہے، عمران صاحب لوگ ٹیکس نہیں دے رہے کیونکہ وزیراعظم چور ہے، چور اور کرپٹ مافیا کی وجہ سے ملک اور معیشت کو ناقابل تلافی نقصان ہورہا ہے۔مریم اورنگزیب کا کہنا تھا کہ عمران مافیا نے 18 ماہ میں 13 ہزار ارب کا تاریخی قرض لیا لیکن ایک نئی اینٹ نہیں لگائی، یہ چوری اور کرپشن نہیں ہے تو کیا ہے؟ عمران مافیا نے 35 فیصد روپیہ گرایا، ایکسپورٹ پھر بھی گر رہی ہیں، یہ کرپشن اور چوری نہیں ہے تو اور کیا ہے؟انہوں نے سوال کیا کہ عمران مافیا نے 18 ماہ میں گیس 300 فیصد اور بجلی 250 فیصد مہنگی کر دی، 18ہ ماہ میں دوائیاں 500 فیصد مہنگی کر دیں، 18ماہ میں ترقی کے شرح 5.8 سے 1.9 فیصد کر دی، ?18 ماہ میں مہنگائی 3 فیصد سے 15 فیصد کر دی، 23 غیر قانونی فارن فنڈنگ اکاو¿نٹس چھپا کر منی لانڈرنگ کی، ?پشاور میٹرو کے 150 ارب کے کھڈے کھود دیئے، یہ چوری اور کرپشن نہیں ہے تو اور کیا ہے ؟

اسلام آباد (ویب ڈیسک)وفاقی حکومت نے رواں سال سرکاری حج اخراجات 4 لاکھ 90 ہزار تک رکھنے کا فیصلہ کرلیا۔ وزیراعظم عمران خان کی زیرصدارت ہونے والے وفاقی کابینہ کے اجلاس میں حج پالیسی 2020 کی منظوری دی گئی جس کے بعد رواں سال سرکاری حج اسکیم کے تحت حج 4 لاکھ 80 ہزار سے 4 لاکھ 90 ہزار تک کا ہوگا۔اجلاس میں وزیراعظم نے ہدایت کی کہ ائیرلائنز کے کرائے اور ٹیکسز کو کم کیا جائے اور حجاج پر کم سے کم بوجھ ڈالا جائے۔بعد ازاں وزیراعظم عمران خان کی معاون خصوصی برائے اطلاعات ڈاکٹر فردوس عاشق اعوان کے ساتھ پریس کانفرنس کرتے ہوئے وفاقی وزیر برائے مذہبی امور نور الحق قادری کا کہنا تھا کہ سعودی عرب کی جانب سے پاکستان کو دیا گیا کوٹہ ایک لاکھ 79 ہزار 210 ہے۔انہوں نے کہا کہ حج کے عمل کو آسان بنانے کے لیے وزیراعظم نے خصوصی ہدایات دیں جس کے بعد گزشتہ ہفتے سعودی حکام سے اہم مذاکرات کیے۔ان کا کہنا ہے کہ پہلے حج اخراجات ساڑھے 5 لاکھ روپے بن رہے تھے لیکن اب حج کا خرچہ 4 لاکھ 90 ہزار روپے ہوگا۔وفاقی وزیر کا کہنا تھا کہ 70 سال سے زائد عمرکے شہریوں کے لیے 10 ہزار کا کوٹہ مقرر کیا گیا ہے، اوورسیز پاکستانیوں کے لیے ایک ہزار کا کوٹہ رکھا گیا ہے، کوئٹہ سے حجاج کے لیے براہ راست فلائٹس چلائی جائیں گی۔انہوں نے مزید بتایا کہ پاکستانی عازمین کی امیگریشن پاکستان میں ہی ہوگی، انہیں سعودی ائیرپورٹس پر لائنیں لگانا نہیں پڑیں گی جبکہ روڈ ٹو مکہ پروجیکٹ میں دیگر شہروں کی شمولیت سے متعلق بات چیت جاری ہے۔خیال رہے کہ حج پالیسی 2018 کے تحت شمالی ریجن سے جانے والے عازمین حج نے 2 لاکھ 80 ہزار روپے اور جنوبی ریجن سے تعلق رکھنے والے عازمین کو 2 لاکھ 70 ہزار روپے جمع کرائے تھے۔گزشتہ سال تحریک انصاف کی حکومت نے حج پالیسی 2019 کے تحت حج کے اخراجات کو دو زونز میں تقسیم کیا تھا، شمالی زون کے حج اخراجات 4 لاکھ 36 ہزار 975 روپے جبکہ جنوبی زون کے حج اخراجات 4 لاکھ 27 ہزار 975 روپے رکھے گئے تھے۔

اسلام آباد (ویب ڈیسک)پاکستان مسلم لیگ (ن) کے رہنما خواجہ آصف نے کہا ہے کہ اپوزیشن نے حکومت کا کچھ نہیں بگاڑا ہے لیکن حکومت کا پہلوان اپنے ہی بوجھ سے گِر رہا ہے۔قومی اسمبلی میں خطاب کرتے ہوئے خواجہ آصف کاکہنا تھا کہ کاش وزیراعظم کے فرمودات اسکرین پر چلا کر دکھائے جاتے، وہ کہتے تھے کہ جب مہنگائی ہو ٹیکس بڑھیں تب سمجھ لیں کرپشن ہو رہی ہے، 2014 میں عمران خان نے کہا تھا کہ بجلی کی قیمت 50 فیصد کم ہو سکتی ہے، اب بجلی کی قیمت بھی بڑھ گئی ہے اور کرپشن بھی بڑھ گئی ہے۔انہوں نے کہا کہ آٹا اور چینی بحران سے فائدہ اٹھانے والے موجودہ حکومت کے کفیل ہیں، ملک میں مہنگائی کئی گنا بڑھ گئی ہے، ایف آئی اے کو یہ حکم دیا کہ موجودہ چینی بحران پر رپورٹ تیار کی جائے، ایف آئی اے نے چینی بحران پر رپورٹ جمع کرائی ہے۔خواجہ آصف نے کہا کہ یہ حکمران خود اپنے دشمن ہیں، آٹے اور چینی کا بحران پیدا کرنے والے حکومت میں بیٹھے ہیں، حکومت نے ملک کو چینی اور آٹا مافیا کی پناہ گاہیں بنادیا ہے، اسٹاک مارکیٹ میں ایک دن میں 143 ارب روپے کا نقصان ہوا۔خواجہ آصف کا کہنا تھا کہ حکومت کی تبدیلی میں آئینی تقاضے پورے کیے جائیں، ہم نہ کوئی سازش کریں گے اورنہ ڈیل کریں گے، اگر تبدیلی آتی ہے تو کسی سازش کا حصہ نہیں بنیں گے۔انہوں نے کہا کہ ہم انتظارکریں گے کہ یہ حکومت مہنگائی اور اپنی کرپشن کے نتیجے میں انجام تک پہنچے، حکومت کا پہلوان اپنے بوجھ سے گِر رہا ہے، اپوزیشن نے حکومت کا کچھ نہیں بگاڑا۔خیال رہے کہ اپوزیشن جماعت مسلم لیگ (ن) کے ارکان پارلیمنٹ نے مہنگائی کے خلاف ایوان کے باہر احتجاج بھی کیا۔پارلیمنٹ ہاو¿س کے باہر مہنگائی کے خلاف ہونے والے احتجاج میں ارکان قومی اسمبلی اور سینیٹ نے پلے کارڈ اٹھا رکھے تھے جن پر مہنگائی کے خلاف نعرے درج تھے۔ خیال رہے کہ ملک میں مہنگائی کا جن بے قابو ہوگیا ہے اور رواں سال کے پہلے مہینے میں مہنگائی کی شرح 14.6 فیصد رہی جو کہ پاکستان تحریک انصاف (پی ٹی ا?ئی) حکومت میں سب سے زیادہ ہے۔ادارہ شماریات پاکستان کی ماہانہ رپورٹ کے مطابق دسمبر 2019 میں مہنگائی کی شرح 12.6 فیصد تھی جو جنوری 2020 میں بڑھ کر 14 اعشاریہ 6 فیصد ہو گئی جب کہ جنوری 2019 میں یہ شرح 5.6 فیصد تھی۔دوسری جانب وفاقی کابینہ کے اجلاس میں اشیائے خورونوش کی قیمتوں میں کمی کی منظوری دی گئی جس کے بعد یوٹیلٹی اسٹورز پر آٹا، گھی، دالیں، چینی اور چاول مارکیٹ سے 10 سے 25 فیصد کم ریٹ پر ملیں گے۔وفاقی کابینہ نے 5 ماہ میں یوٹیلٹی اسٹورز کو 10 ارب روپے جاری کرنے کی بھی منظوری دی، اس کے علاوہ ماہ رمضان میں یوٹیلٹی اسٹورز کو 5 ارب روپے الگ سے ملیں گے۔

لاہور (ویب ڈیسک)لاہور میں بچوں کو اغواءکے بعد فروخت کرنے والی سرگرم خواتین کا گروہ پکڑا گیا۔لاہور میں گلشن اقبال انویسٹی گیشن پولیس نے کارروائی کرتے ہوئے بچوں کو اغوائ کے بعد فروخت کرنے والے لیڈیز گینگ کی 2خواتین کو گرفتار کیا۔ڈی آئی جی انویسٹی گیشن ڈاکٹر انعام وحید نے بتایاکہ ملزم خواتین نے چند دن پہلے 10سالہ عبدالرزاق کو کراچی میں فروخت کے لیے اغواءکیا تھا۔ڈاکٹر انعام وحید کے مطابق اغوائ کاروں نے مغوی بچے سے مختلف مقامات پر 2 روز تک بھیک بھی منگوائی اور آج بچے کو اسمگل کرنے کی کوشش میں پکڑے گئے۔ تحقیقات کے مطابق گروہ کی سرغنہ اللہ معافی عرف سونیا عرف جگو لڑکوں کے بھیس میں بچےاغوائ کرتی تھی۔پولیس کا کہنا ہے کہ مغوی عبدالرزاق کو مصطفیٰ ٹاو¿ن کے علاقے سے بازیاب کرایا گیا ہے، گروہ کی دوسری رکن کانام سمیرا ہے جب کہ دونوں خواتین سے اہم انکشافات کی توقع ہے۔

اسلام آباد (ویب ڈیسک)پاکستان پیپلزپارٹی (پی پی پی) کے چیئرمین بلاول بھٹو زرداری حکومتی اقدامات کو عوام کا معاشی قتل قرار دیتے ہوئے کہا ہے کہ گزشتہ ایک دہائی میں سب سے زیادہ مہنگائی گزشتہ ایک برس میں ہوئی ہے، وزیراعظم بتائیں کہ ان کی کون سی کرپشن کی وجہ سے مہنگائی ہوئی ہے۔قومی اسمبلی کے اجلاس میں خطاب کرتے ہوئے بلاول بھٹو نے کہا کہ موجودہ دور حکومت میں مہنگائی اور غربت مزید بڑھ گئی ہے اور ہرطبقہ پریشان ہے۔ان کا کہنا تھا کہ بےبس پارلیمنٹ میں مہنگائی پربحث ہورہی ہے، حکومت کی خالی نشستوں سے بحث کی اہمیت کا اندازہ ہورہا ہے کہ وہ کتنی اہمیت دے رہے ہیں، انہوں نے تو اپنے سینئر وزرا کو بھی نہیں بھیجا، یہاں وزرائے مملکت، سائنس اور پوسٹ کا وزیر موجود ہے لیکن اصل وزیر نہیں ہیں۔چیئرمین پی پی پی نے کہا کہ عوامی نمائندے معاشی قتل پر خاموش نہیں رہ سکتے، عوام کو ریلیف دو ورنہ گھر جانا پڑے گا۔بلاول بھٹوزرداری نے کہا کہ وزیراعظم بتائیں ان کی کون سی کرپشن کی وجہ سے مہنگائی ہوئی، وزیراعظم مان لیں کہ وہ نالائق، نااہل اور سلیکٹڈ ہیں۔پاکستان تحریک انصاف (پی ٹی آئی) کی حکومت کو تنقید کا نشانہ بناتے ہوئے انہوں نے کہا کہ حکومت اپنے ٹیکس اہداف بھی پورے نہیں کرپا رہی اور غریب عوام کو لاوارث چھوڑ دیا گیا ہے۔انہوں نے کہا کہ حکومت کی پالیسیاں عوام دشمن ہیں، حکومت کا بجٹ عوامی نہیں بلکہ پی ٹی آئی ایم ایف ہے جبکہ حکومت بینظیرانکم سپورٹ پروگرام کو ختم کرناچاہتی ہے۔ان کا کہنا تھا کہ امید ہے کہ ایک دن یہ پارلیمان اپنے وزیر خزانہ کو بھی دیکھا گا اور سوال بھی پوچھے گا، یہ حکومت مانے یا نہ مانے اب مہنگائی بہت بڑھ گئی ہے۔بلاول بھٹو کا کہنا تھا کہ ‘جب یہ حکومت آئی تو مہنگائی اور بے روزگاری تھی لیکن اب بہت بڑھ گئی ہے یہ حقیقت ہے، حکومتی ادارے ایف بی ا?ر، اسٹیٹ بینک، بیورو آف اسٹیٹکس کیا کہہ رہا ہے’۔انہوں نے کہا کہ ‘پچھلی دہائی میں مہنگائی اتنی تیزی سے نہیں بڑھی جتنی پچھلے ایک سال میں بڑھی، گزشتہ جنوی میں مہنگائی کی شرح اعشاریہ فیصد تھی اور اب 14 اعشاریہ 5 فیصد تک پہنچ گئی ہے’۔ان کا کہنا تھا کہ خوراک کی مہنگائی 25 فیصد تک پہنچ گئی ہے اور حیران کن بات یہ ہے کہ جلد خراب ہونے والے غذائی اجناس کی مہنگائی 78 فیصد ہوگئی ہے۔پاکستان مسلم لیگ (ن) کے پارلیمانی رہنما خواجہ آصف ن اپنی تقریر میں کہا کہ ملک میں غلطیوں کا انبار لگا ہوا ہے۔ان کا کہنا تھا کہ وقت بدل رہا ہے، ہوا بدل رہی ہے، اپوزیشن نے حکومت کا کچھ نہیں بگاڑا بلکہ یہ حکومت اپنے بوجھ سے خود گر رہی ہے۔خواجہ آصف نے کہا کہ ہمیں ملک میں جمہوریت کی جڑیں مضبوط کرنی ہیں۔