کوئٹہ : (ویب ڈیسک) اوکاڑہ سے تعلق رکھنے والا نوجوان پیدل فریضہ حج کی ادائیگی کے لیےکوئٹہ سے روانہ ہوگیا۔
عثمان ارشد پیدل فریضہ حج کی ادائیگی کےلیے اپنے سفر کا آغاز کوئٹہ سے کرتے ہوئے پہلے مستونگ، نوشکی، نوکنڈی، دالبندین اور تفتان سے ہوتے ہوئے ایران جائیں گے۔بعد ازاں عثمان ارشد ایران سے عراق اور کویت سے ہوتے ہوئے سعوی عرب پہنچیں گے، اس دوران عثمان ارشد کو 5400 کلومیٹر سفر پیدل طے کرنا ہوگا اور وہ تقریباً 6 ماہ میں مکہ مکرمہ پہنچیں گے۔
واضح رہے پیدل فریضہ حج کی ادائیگی کے لیے عثمان ارشد یکم اکتوبر کو اوکاڑہ سے روانہ ہوئے تھے، ویزے کےحصول کےلیےعثمان ارشد کو تقریباً ایک ماہ کوئٹہ میں قیام کرنا پڑا۔

اسلام آباد: (ویب ڈیسک) وزیراعظم شہبازشریف نے سندھ کے ثقافتی دن پرتمام سندھی بہن بھائیوں کو مبارکباد دی ہے ۔
سماجی رابطے کی ویب سائٹ ٹوئٹر پر پیغام میں وزیراعظم شہبازشریف نے کہا کہ ہزارہا برس سےسندھ کی تہذیب نہ صرف اس خطے بلکہ انسانیت کی تہذیب میں اپنی تقافت سےخوبصورتی کا رنگ بھرتی آرہی ہے.
ان کا کہنا تھا کہ آج باب الاسلام سندھ کا تقافتی دن،پاکستان میں وفاق کی ایک اکائی کی خوبصورتی اجاگر کرنے کا دن ہے. میں تمام سندھی بھائیوں اور بہنوں کو اس دن پر بے حد مبارکباد پیش کرتا ہوں.
واضح رہے کہ آج سندھ کی ثقافت کو اجاگر کرنے کا دن منایا جا رہا ہے، صوبہ سندھ میں ہر سال دسمبر کے پہلے اتوار کو “ثقافتی دن ” کے طور پر منایا جاتا ہے اور اس موقع پر خصوصی تقاریب کا انعقاد بھی کیا جاتا ہے۔

اسلام آباد: (ویب ڈیسک) سپریم کورٹ آف پاکستان نے فیصل واوڈا نااہلی کیس کا مختصر تحریری فیصلہ جاری کر دیا، 4 صفحات پر مشتمل فیصلہ چیف جسٹس پاکستان عمر عطاء بندیال نے تحریر کیا۔
سپریم کورٹ کی جانب سے جاری تحریری فیصلے میں کہا گیا ہے کہ فیصل واوڈا نے بتایا کہ 25 جون 2018 کو شہریت ترک کرنے کا سرٹیفکیٹ ملا، فیصل واوڈا نے تسلیم کیا کہ ان سے غلط بیانی ہوئی، فیصل واوڈا 2018 میں ممبر اسمبلی بننے کیلئے اہل نہیں تھے۔
عدالتی فیصلے میں مزید کہا گیا ہے کہ فیصل واوڈا کی جانب سے غلطی تسلیم کرنے پر آرٹیکل 63 ون سی کا اطلاق ہوتا ہے، فیصل واوڈا موجودہ اسمبلی کی مدت تک نااہل تصور ہوں گے، فیصل واوڈا آئندہ انتخابات لڑنے کیلئے اہل ہوں گے، سینیٹ کی نشست سے اپنا استعفیٰ ٰفوری چیئرمین سینیٹ کو بھجوائیں۔
سپریم کورٹ نے فیصلے میں مزیدکہا کہ الیکشن کمیشن کے پاس امیدوار کو الیکشن سے قبل نااہل کرنے کا اختیار نہیں، اسلام آباد ہائیکورٹ کا فیصلہ بھی قانون کی نظر میں برقرار نہیں رکھا جا سکتا، الیکشن کمیشن اور ہائی کورٹ کا تاحیات نااہلی کا فیصلہ کالعدم قرار دیا جاتا ہے۔

کراچی: (ویب ڈیسک) سیلاب سے متاثرہ پاکستان ریلویزکے لئے بڑا ریلیف، ریلوے سیکشن کوٹری دادو ریلوے ٹریک کی مرمت کا کام مکمل کر لیا گیا۔
تفصیلات کے مطابق ساڑھے تین ماہ کی کوششوں کے بعد ٹریک کی مرمت سے آپریشنز کے قابل بنایا گیا، سیلاب اور شدید بارشوں کے بعد متاثرہ ٹریک پر ریلوے آپریشنز معطل تھے۔
ریلوے ذرائع کا کہنا ہے کہ ٹرائل ڈرائیو کے بعد جلد باقاعدہ آپریشنز بحال کئے جائیں گے، جام شورو، کوٹری اور سیہون اسٹیشن کے درمیان 100 کلومیٹر تک ریلوے ٹریک متاثر تھا، سیلابی پانی نے ٹریک پر جگہ جگہ شگاف ڈال دیئے تھے۔
ذرائع کے مطابق ٹریک کی بحالی کے بعد کراچی سے اندرون ملک مکمل ٹرین آپریشنز جلد بحال ہوں گے۔

اسلام آباد: (ویب ڈیسک) ترجمان دفتر خارجہ کا کہنا ہے کہ کالعدم تنظیم کی جانب سے کابل میں پاکستانی سفارتخانے پر حملے کی ذمہ داری قبول کرنے کی رپورٹس کا جائزہ لے رہے ہیں۔
موجودہ صورتحال پر اپنا رد عمل دیتے ہوئے ترجمان دفتر خارجہ نے کہا کہ افغان حکام کے ساتھ مشاورت سے رپورٹس کی سچائی کی تصدیق کر رہے ہیں۔
دفتر خارجہ کا کہنا تھا کہ حملہ ظاہر کرتا ہے کہ دہشت گردی سے افغانستان اور خطے میں امن کو خطرات لاحق ہیں، دہشت گردی کی لعنت کو شکست دینے کیلئے سب کو مل کر طاقت کے ساتھ کام کرنا ہوگا۔
دفتر خارجہ کے مطابق پاکستان دہشت گردی سے نمٹنے کے اپنے عزم پر ثابت قدم ہے۔

کوئٹہ: (ویب ڈیسک) متنازع ٹوئٹس کیس میں کوئٹہ کی جوڈیشل مجسٹریٹ عدالت نے تحریک انصاف کے سیینٹر اعظم سواتی کا پانچ روزہ جسمانی ریمانڈ منظور کرلیا۔
تحریک انصاف کے سینیٹر اعظم سواتی کو ضلع کچہری میں جوڈیشل مجسٹریٹ دہم کی عدالت میں پیش کیا گیا۔
عدالت میں پیشی کے وقت قاسم سوری سمیت دیگر قائدین بھی عدالت آئے جبکہ پی ٹی آئی کی جانب سے اقبال شاہ ایڈووکیٹ اور دیگر پیش ہوئے۔
پولیس کی جانب سے اعظم سواتی کے دس روزہ جسمانی ریمانڈ کی استدعا کی گئی تھی تاہم عدالت نے پانچ روزہ جسمانی ریمانڈ منظور کرتے ہوئے انہیں پولیس کے حوالے کر دیا۔
واضح رہے کہ سینیٹر اعظم سواتی کو تین روز قبل اسلام آباد سے گرفتار کر کے راہداری ریمانڈ پر کوئٹہ منتقل کیا گیا تھا۔

لاہور: (ویب ڈیسک) پاکستان تحریک انصاف کے مرکزی رہنما فواد چودھری نے کہا کہ عمران خان نے پارٹی ارکان اسمبلی کو فوری طور پر انتخابات کی تیاری کرنے کی ہدایت کر دی ہے۔
فواد چودھری کا کہنا تھا کہ چیئرمین پاکستان تحریک انصاف نے پارٹی ارکان اسمبلی کو ہدایات میں کہا کہ وہ حلقوں میں فوری واپس پہنچیں اور عوامی رابطوں میں تیزی لائیں۔
مرکزی رہنما تحریک انصاف نے کہا کہ پی ڈی ایم انتخابات سےایسے ہی بھاگتی رہی جیسے اب بھاگ رہی ہے تو ہم مزید وقت ضائع نہیں کریں گے۔
پی ٹی آئی وقت ضائع کئے بغیر پنجاب اور پختونخوا کےصوبائی انتخابات کیلئے جائے گی، قومی اسمبلی کے انتخابات بعد میں ہوں گے۔