اسلام آباد : وزیر دفاع خواجہ آصف نے بھارتی وزیر دفاع راج ناتھ سنگھ کو کرارا جواب دیتے ہوئے کہا پنگا لیاتواللہ کےفضل سےہماری افواج پہلےسےزیادہ ذلت آمیزپھینٹی لگائیں گی۔

تفصیلات کے مطابق وزیر دفاع خواجہ آصف نے بھارتی وزیر دفاع راج ناتھ سنگھ کی جانب سے دی جانے والی “گیدڑ بھبکیوں” پر سخت ردِعمل دیتے ہوئے بھارت کو آئینہ دکھا دیا ہے۔

سوشل میڈیا پلیٹ فارم ‘ایکس’ پر اپنے بیان میں خواجہ آصف نے دو ٹوک الفاظ میں واضح کیا کہ اگر بھارت نے کسی مہم جوئی کی کوشش کی تو پاکستانی افواج پہلے سے زیادہ ذلت آمیز جواب دیں گی۔

وزیر دفاع کا کہنا تھا کہ پہلگام فالس فلیگ آپریشن کا دہرایا جانے والا بھارتی بیانیہ مایوسی کی عکاسی کرتا ہے، جو بین الاقوامی سطح پر بھی ثابت نہیں ہو سکا۔

انہوں نے کہا کہ بھارت ہمیشہ اپنے اندرونی بحرانوں اور کمزوریوں کو چھپانے کے لیے پاکستان پر گمراہ کن الزامات لگاتا ہے تاکہ مخصوص سیاسی مفادات حاصل کر سکے۔

خواجہ آصف نے راج ناتھ سنگھ کو مخاطب کرتے ہوئے کہا کہ “راج ناتھ جی اپنی اوقات کے مطابق بیان دیا کریں”۔ پنگا لیاتواللہ کےفضل سےہماری افواج پہلےسےزیادہ ذلت آمیزپھینٹی لگائیں گی.

انہوں نے خبردار کیا کہ دو ایٹمی طاقتوں کے درمیان جنگ کا تصور ہی انتہائی خطرناک نتائج کا حامل ہو سکتا ہے، بھارت کو چاہیے کہ وہ اپنی سفارتی اور اسٹریٹجک بے چینی کا سامنا کرنے کے بجائے امن کی راہ اختیار کرے۔

بھارت کے حجم پر بات کرتے ہوئے خواجہ آصف نے کہا کہ “بھارت پاکستان سے 5 سے 6 گنا بڑا ملک ہے اور وسائل بھی بے شمار ہیں، لیکن یہ الگ بات ہے کہ کروڑوں بھارتی آج بھی فٹ پاتھ پر بھوکے سوتے ہیں”۔

انہوں نے مزید کہا کہ آج پوری دنیا کی توجہ کا مرکز پاکستان ہے جبکہ بھارت کو کوئی منہ لگانے کو تیار نہیں۔

وزیر دفاع نے واضح کیا کہ معرکہِ حق (سرجیکل اسٹرائیک کا جواب) ہماری یادوں میں آج بھی زندہ ہے اور آئندہ بھی ہمارا ردِعمل تیز، متوازن اور فیصلہ کن ہوگا۔ پاکستان علاقائی امن کے لیے پرعزم ہے لیکن اپنی دفاعی تیاریوں میں کوئی کسر نہیں چھوڑی گئی۔

پٹرولیم مصنوعات کی قیمتوں میں ہوشربا اضافے کے بعد اوپن مارکیٹ میں بنیادی اشیائے ضروریہ کی قیمتوں میں مزید اضافے کا خدشہ پیدا ہو گیا ہے، جس سے مہنگائی کا بوجھ براہِ راست عوام، خصوصاً غریب طبقے پر پڑنے لگا ہے۔

مارکیٹ ذرائع کے مطابق راشن کی قیمتیں پہلے ہی عام آدمی کی پہنچ سے باہر ہوتی جا رہی ہیں۔

کراچی میں گھی ساز کمپنیوں نے گھی کی قیمتوں میں فی کارٹن 200 روپے تک اضافہ کر دیا ہے، جبکہ درجہ اول گھی اور آئل کی قیمت 590 روپے فی کلو تک پہنچ گئی ہے۔

اسلام آباد ہائیکورٹ نے 190 ملین پاؤنڈ کیس میں بانی پی ٹی آئی اور بشریٰ بی بی کی سزا معطلی کی درخواستوں پر تحریری حکم نامہ جاری کر دیا۔
اسلام آباد ہائیکورٹ کے چیف جسٹس سرفراز ڈوگر اور جسٹس محمد آصف نے حکم نامہ جاری کیا۔
حکم نامہ کے مطابق نیب کے اسپیشل پراسیکیوٹر نے کہا کہ وہ مرکزی اپیلوں پر دلائل کے لیے تیار ہیں،بانی اور بشریٰ بی بی کے وکیل سلمان صفدر نے ہدایات لینے کے لیے کچھ وقت مانگاہے۔

  تحریری حکم نامے کے مطابق کیس کی مزید سماعت 6 اپریل تک ملتوی کی جاتی ہے۔

کراچی: عالمی سطح پر جاری جنگی صورتحال کے پیش نظر جیٹ فیول کی قیمتوں میں 40 روپے فی لیٹر اضافہ کردیا گیا۔

تفصیلات کے مطابق جیٹ فیول کی نئی قیمت 517 روپے17 پیسے فی لیٹر کی نئی ریکارڈ سطح پر پہنچ گئی ہے، یکم مارچ سے اب تک جیٹ فیول کی قیمت میں مجموعی طور پر 329 روپے 17 پیسے کا اضافہ ہوچکا ہے۔

رپورٹس کے مطابق قیمت بڑھنے سے ڈومیسٹک اور انٹرنیشنل فلائٹس کے کرایوں میں مزید اضافے کا امکان ہے۔

جیٹ فیول کی قیمت بڑھنے کے سبب غیر ملکی سفر بھی انتہائی مہنگا ہو چکا ہے، ٹورنٹو، پیرس اور مانچسٹر کے لیے اکنامی کلاس کا ایک ٹکٹ اب 3 لاکھ سے 7 لاکھ روپے کے درمیان فروخت ہو رہا ہے۔ جس کی قیمت مزید بڑھنے کا امکان ہے۔

ایئرلائن ذرائع کا کہنا ہے کہ ایندھن کی بڑھتی ہوئی قیمتوں اور آپریشنل اخراجات کے باعث کرایوں میں اضافہ ناگزیر ہے، صورتحال سے مسافروں، خاص طور پر بیرون ملک مقیم پاکستانیوں اور کاروباری طبقے کو شدید مشکلات کا سامنا ہے۔

ڈی جی ایل ڈی اے طاہر فاروق کی ہدایت پر لاہور ڈویلپمنٹ اتھارٹی کا ٹاؤن پلاننگ ونگ غیرقانونی کمرشل عمارتوں کے خلاف متحرک ہو گیا۔

ایل ڈی اے ٹیموں  نے شادمان، گارڈن ٹاؤن، آرکیٹیکٹ سوسائٹی اور علامہ اقبال ٹاؤن میں آپریشن کرتے ہوئے مجموعی طور پر 91 املاک کو سربمہر کر دیا۔

تفصیلات کے مطابق غیرقانونی کمرشل استعمال اور کمرشل فیس کی عدم ادائیگی پر شادمان میں 12 املاک جبکہ شیر شاہ اور اورنگزیب بلاک نیو گارڈن ٹاؤن میں 14 املاک سیل کی گئیں، اسی طرح آرکیٹیکٹ سوسائٹی میں 41 املاک کو بھی غیرقانونی استعمال پر بند کر دیا گیا۔

سیل کی جانے والی املاک میں شادی ہال، مارکیز، نجی سکول، بیکریاں، فارمیسیز، کلینکس، گراسری سٹورز، ریسٹورنٹس، فوڈ پوائنٹس، پراپرٹی آفسز، بیوٹی سیلونز، کپڑوں کی دکانیں اور دیگر تجارتی دفاتر شامل ہیں۔

یہ آپریشن چیف ٹاؤن پلانر ون اسد الزمان اور چیف ٹاؤن پلانر ٹو اظہر علی کی نگرانی میں کیا گیا۔

ڈی جی ایل ڈی اے کا کہنا ہے کہ غیرقانونی کمرشل عمارتوں اور کمرشل فیس نادہندگان کے خلاف بلا امتیاز کارروائیاں جاری رہیں گی اور شہر میں قوانین کی عملداری ہر صورت یقینی بنائی جائے گی۔

لاہور(2 اپریل 2026): چوہنگ میں رشتہ نہ دینے پر ملزمان نے نویں جماعت کی طالبہ پر تیزاب پھینک دیا۔

صوبائی دارالحکومت کے علاقے چوہنگ میں رشتہ نہ دینے کی رنجش پر نویں جماعت کی طالبہ پر تیزاب پھینکنے کا سنگین واقعہ پیش آیا ہے، جس کے نتیجے میں طالبہ کا چہرہ، سر اور کندھے بری طرح جھلس گئے ہیں۔

پولیس کے مطابق طالبہ اکیڈمی سے باہر نکلی تو موٹر سائیکل سوار ملزم ساجد نے اس پر تیزاب پھینک دیا اور اپنے ساتھی کے ہمراہ فرار ہو گیا۔ زخمی طالبہ کو فوری طور پر اسپتال منتقل کیا گیا جہاں اس کا علاج جاری ہے۔ تھانہ چوہنگ پولیس نے طالبہ کے والد کی مدعیت میں مقدمہ درج کر لیا ہے۔

واقعے کا نوٹس لیتے ہوئے ڈی آئی جی آپریشنز نے ایس پی صدر کو ملزمان کی فوری گرفتاری کا ٹاسک دیا، جس کے بعد شہر بھر میں ناکہ بندی کر کے خصوصی ٹیمیں تشکیل دی گئیں۔ گرین ٹاؤن کے علاقے میں پولیس نے جب مشکوک موٹر سائیکل سواروں کو رکنے کا اشارہ کیا تو ملزمان نے اندھا دھند فائرنگ کر دی۔

پولیس کے ساتھ مقابلے اور تعاقب کے بعد مرکزی ملزم ساجد کو زخمی حالت میں گرفتار کر لیا گیا ہے، جبکہ اس کا دوسرا ساتھی فائرنگ کرتا ہوا فرار ہونے میں کامیاب ہو گیا۔

پولیس کا کہنا ہے کہ ملزم نے رشتہ نہ دینے کی رنجش پر طالبہ کو نشانہ بنایا، مفرور ملزم کی تلاش کے لیے چھاپے مارے جا رہے ہیں۔

آئل مارکیٹنگ کمپنیوں کی فروخت  مارچ میں 13 فیصد تک بڑھ گئی،ذرائع

کفایت شعاری مہم کے باوجود ملک میں پیٹرولیم مصنوعات کی فروخت میں اضافہ ہوگیا۔ آئل مارکیٹنگ کمپنیوں کی فروخت  مارچ میں 13 فیصد تک بڑھ گئی۔

ذرائع کے مطابق مارچ میں پیٹرولیم مصنوعات کی فروخت 1.44 ملین ٹن ہوگئی،سالانہ بنیادوں پر 19 فیصد اضافہ ہوگیا۔ رواں مالی سال کے 9 ماہ میں او ایم سیز فروخت 12.40 ملین ٹن رہیں، آئل مارکیٹنگ کمپنیوں کی مجموعی سیلز میں 5 فیصد سالانہ اضافہ رہا۔

پیٹرول کی فروخت 0.67 ملین ٹن، 16 فیصد سالانہ اضافہ رہا، ڈیزل کی فروخت 0.62 ملین ٹن رہی، 21 فیصد اضافہ ریکارڈ کیا گیا، فرنس آئل کی فروخت میں 98 فیصد ماہانہ کا بڑا اضافہ ریکارڈ کیا گیا۔ پی ایس او کی سیلز 0.63 ملین ٹن،اٹک پیٹرولیم کی 0.11 ملین ٹن رہی۔