وزیراعظم شہباز شریف نے کہا ہے کہ یو اے ای نے پاکستان کو دو ارب ڈالر قرضہ رول اوور کرنے سے متعلق آگاہ کیا ہے۔

یہ بات وزیراعظم شہباز شریف نے اپنے زیر صدارت وفاقی کابینہ کے اجلاس سے خطاب میں کہی۔ اجلاس میں کابینہ نے ملکی مجموعی امن و امان اور معاشی صورتحال کا جائزہ لے لیا۔

اجلاس سے خطاب کرتے ہوئے وزیراعظم نے کابینہ کو بتایا کہ متحدہ عرب امارات نے پاکستان کی جانب سے 2 ارب امریکی ڈالرز کی ادائیگی، جو کہ اس سال جنوری میں واجب الادا تھی اسے مؤخر کرنے کا فیصلہ کیا ہے جو کہ ہماری معیشت کے لئے انتہائی خوش آئند ہے، یو اے ای کے صدر نے پاکستان میں سرمایہ کاری کے حوالے سے اپنے عزم کا اعادہ کیا ہے۔

ایف بی آر انفرااسٹرکچر کو کریٹیکل انفرااسٹرکچر قرار دینے کی منظوری

اجلاس میں وفاقی کابینہ نے ریوینیو ڈویژن کی سفارش پر فیڈرل بورڈ آف ریونیو کے انفرااسٹرکچر کو پریوینشن آف الیکٹرانک کرائمز ایکٹ (PECA) 2016 کے تحت کریٹیکل انفرااسٹرکچر قرار دینے کی منظوری دے دی۔ اس اقدام کا مقصد فیڈرل بورڈ آف ریونیو کے انتہائی حساس ڈیٹا کو سائبر حملوں جیسا کہ ہیکنگ اور کسی بھی غیرقانونی مداخلت سے بچانا ہے۔ اس اقدام سے ایف بی آر کا حساس ڈیٹا مزید محفوظ بنانے میں مدد ملے گی۔

فلائی دبئی کی لاہور اسلام آباد پروازوں کے اجازت نامے میں توسیع

وفاقی کابینہ نے ہوا بازی ڈویژن کی سفارش پر بین الاقوامی ائیر لائن فلائی دبئی (Fly Dubai) کی لاہور اور اسلام آباد سے دبئی اور دبئی سے لاہور اور اسلام آباد پروازوں کی ہفتہ وار فریکوئینسیز کے عارضی اجازت نامے میں 4 جنوری 2025 سے 3 فروری 2025 تک توسیع کی منظوری دے دی۔

پبلک سیکٹر کی درآمدات و برآمدات کا 60 فیصد حصہ گوادر بندرگاہ پر بھیجنے کی ہدایت

وفاقی کابینہ کو وزارت بحری امور کی جانب سے 11 وفاقی وزارتوں /ڈویژنز کی گوادر بندرگاہ سے مارچ 2024 سے اب تک کے دوران پبلک سیکٹر درآمدات و برآمدات پر بریفنگ دی گئی-

وزیراعظم نے ہدایت کی کہ تمام متعلقہ وزارتوں کی رپورٹس کو بریفنگ کا حصہ بنا کر ایک جامع رپورٹ پیش کی جائے۔ وزیراعظم نے ہدایت کی کہ درآمدات و برآمدات میں کسی بھی قسم کی تخصیص کے بغیر پبلک سیکٹر کی تمام درآمدات و برآمدات کا 60 فیصد حصہ گوادر بندرگاہ سے کیا جائے۔

یکم جنوری سے وفاقی اداروں کے مابین کاغذ کا استعمال ترک کر دیا گیا

وفاقی کابینہ کو وزارت انفارمیشن ٹیکنالوجی و ٹیلی کمیونی کیشنز کی جانب سے وفاقی وزارتوں اور ڈویژنز میں ای آفس کے نفاذ کے حوالے سے پیش رفت پر بریفنگ دی گئی-

اجلاس کو بتایا گیا کہ پہلی مرتبہ حکومت کی جانب سے ای-آفس کو اس بڑے پیمانے پر نافذ کیا جا رہا ہے۔ اجلاس کو مزید بتایا گیا کہ یکم جنوری 2025 سے تمام وفاقی وزارتوں اور ڈویژنز کے مابین رابطے کے لئے کاغذ کا استعمال ترک کر دیا گیا اور تمام فائلز موومنٹ اور دیگر خط و کتابت صرف ای-آفس استعمال کیا جا رہا ہے۔ اجلاس کو مزید بتایا گیا کہ 21 وزارتوں/ڈویژنز میں ای- آفس کا نفاذ سو فیصد کر دیا گیا ہے۔

ای آفس کے نفاذ سے نہ صرف وقت کی بچت ہوگی بلکہ اسٹیشنری اور پیٹرول کی مد میں قومی خزانے کو فائدہ بھی پہنچے گا۔ ای-آفس کے نفاذ سے وزیر اعظم آفس میں سمری کی پراسیسنگ کا دورانیہ اب زیادہ سے زیادہ صرف تین دن تک محیط ہو چکا ہے۔

ری فربشڈ گوگل کروم بکس خریدنے کی منظوری

وفاقی کابینہ نے کابینہ ڈویژن کی سفارش پر اسکولوں اور کالجوں کے لئے ری فربشڈ گوگل کروم بکس کی خریداری/ حصول کو پبلک پروکیورمنٹ ریگولیٹری اتھارٹی آرڈینینس کے سیکشن 21ـ اے کے تحت استثنیٰ دے دیا- وزیر اعظم نے ہدایت کی کہ ان کروم بکس کی خریداری کا تھرڈ پارٹی آڈٹ لازمی کروایا جائے۔

چائنا کہ تعاون سے ٹیکسٹائل پارک

وفاقی کابینہ نے سرمایہ کاری بورڈ اور شینڈونگ روئی (Shandong Ruyi) گروپ چائینہ کے درمیان ٹیکسٹائل پارکس کے قیام کے حوالے سے تعاون کی مفاہمتی یادداشت پر دستخط کی منظوری دے دی۔

سربیا اور پاکستان کے درمیان فارن سروس معاہدہ

وفاقی کابینہ نے وزارت خارجہ کی سفارش پر ڈپلومیٹک اکیڈیمی، وزارت خارجہ جمہوریہ سربیا اور فارن سروس اکیڈیمی، وزارت خارجہ اسلامی جمہوریہ پاکستان نے درمیان مفاہمتی یادداشت پر دستخط کی منظوری دے دی۔

حج 2025ء کے انتظامات موجودہ 46 منتظمین کریں گے

وفاقی کابینہ کو کابینہ کمیٹی برائے پرائیویٹ حج آپریٹرز کورٹ کیسز کی سفارشات پیش کی گئیں۔ کمیٹی نے سفارش کی ہے حج 2025 کے انتظامات موجودہ 46 منتظمین کریں گے۔کمیٹی نے مزید سفارش کی ہے کہ آئندہ آنے والے سالوں کے لئے نئی حج پالیسی بنائی جائے۔ وفاقی کابینہ نے مذکورہ کمیٹی کی سفارشات منظور کر لیں۔ کابینہ نے ہدایت کی کہ پرائیویٹ حج آپریٹرز کے حوالے سے تمام کورٹ کیسز کو منطقی انجام تک پہنچانے کے حوالے سے اقدامات اٹھائے جائیں۔

*وفاقی کابینہ نے کابینہ کمیٹی برائے لیجسلیٹو کیسز کے 31 دسمبر 2024 اور یکم جنوری 2025 کے اجلاس میں لئے گئے فیصلوں کی توثیق کردی-

بڑھتی ہوئی آبادی اور کاروباری مراکز، کی تعمیر نے لاہور سے بہت ساری تاریخی اور سیاسی جماعتوں کے مسکن کو ختم کر کے رکھ دیا ہے انہی میں سے ایک لاہور ریلوے اسٹیشن کے قریب نکسن روڈ پر بابائے جمہوریت نواب زادہ نصراللہ خان کی رہائش گاہ بھی شامل ہے۔ 

بابائے جمہوریت نواب زادہ نصراللہ خان  کی رہائش گاہ پر کبھی ہوٹربجاتی ہوئی گاڑیاں  آتی تھیں پولیس اور ٹریفک وارڈن کی دوڑیں لگتی تھی، ٹریفک روک کر صدر اصف زرداری وزیراعظم متحرمہ بے نظیر بھٹو نواز شریف ، چوہدری شجاعت حسین، نواب اکبر خان  بگٹی، مشاہد حسین، مولانا فضل الرحمان،  شیخ رشید احمد،  مخدوم امین فہم سمیت دیگر وزرا اراکین اسمبلی نواب زادہ نصراللہ خان سے مشاورت کے لیے 32 نکسن روڈ آیا کرتے تھے۔

 یہ ایک طرح کا سیاست کا مرکز بن چکا تھا، بڑے بڑے کالم نگاروں، صحافیوں اور سیاسی جماعتوں کے کارکنوں کی تربیت گاہ بھی تھی،  نکسن روڈ پر صبح شام رات سادہ لباس میں مختلف قانون نافذ کرنیوالوں کی ڈیوٹی بھی لگی رہتی تھی۔

جنرل ضیاء الحق سے لیکر جنرل مشرف کے مارشل لاء دور میں جمہوریت کی بحالی آئین و قانون کی بالادستی، عدلیہ کی ازادی سمیت دیگر معاملات پر مشاورت اور سیاسی جدوجہد کے لیے تحریکوں کا آغاز نواب زادہ نصراللہ خان کی رہائش گاہ سے ہی ہوتا تھا۔

اسی رہائش گاہ سے گرمیوں کے موسم میں نواب زادہ نصراللہ خان کی طرف سے آم  کے تحائف بھی بھجوائے جاتے تھے لیکن آج ان کی رہائش گاہ جو ریلوے اسٹیشن کے بالکل قریب ہے، حجاج کرام کے حج کیمپ کے سامنے اب وہاں پر لنڈے کے پرانے اور نئے کپڑے جوتوں اور مختلف بیگوں کا کام ہو رہا ہے۔

اس کے بالکل سامنے اورنج لائن ٹرین کا اسٹاپ بن چکا  ہے، شاید ہی کسی کو معلوم ہو کہ یہ وہ جگہ ہے جو نواب زادہ نصراللہ  کی زیر نگرانی سیاسی مرکز کا کردار ادا کیا کرتی تھی،  نوابزادہ نصراللہ خان کی وفات کے بعد اس گھر کو گرا کر یہاں پر بڑا پلازہ بنا دیا گیا ہے، جہاں پر کئی دکانیں کھل چکی ہیں۔

صرف نوابزاہ کے نام کی ایک روڈ کی تختی لگی ہوئی ہے جو یہ بتا رہی ہے کہ یہاں پر  بابائے جمہوریت نواب زادہ نصراللہ خان  کی رہائش کا ہوا کرتی تھی، شاید آنے والی نسلوں کو یہ بھی نہ پتہ ہو کہ نوابزادہ نصراللہ  خان کون تھے، کیا کرتے تھے اور ان کا  سیاست میں کیا کردار تھا۔

بہرحال ان کی 32 نکسن روڈ جو عظیم سیاسی مرکز ہوا کرتی تھی آج مختلف کاروباری مراکز میں ڈھل چکی ہے، یہاں پر صبح سے شام بلکہ رات گئے تک پرانے نئے کپڑوں جوتوں کھانے پینے کی اشیاء کی فروخت کا کاروبار عروج پر ہوتا ہے۔

یہاں پر خریداری کے لیے آنے والوں کو تک کو یہ معلوم نہیں بلکہ جو یہاں پر دکانیں لے کر اپنا کاروبار کر رہے ہیں ان کو بھی نہیں معلوم یہاں پر پہلے کیا ہوتا تھا، یہ جگہ جہاں پر وہ بیٹھ کر اپنے لیے دو وقت کی روٹی کما رہے ہیں یہاں پر کس عظیم  شخصیت کا بسیرا ہوا کرتا تھا۔