کراچی: ملک بھر میں سونے کی قیمت میں بڑی کمی دیکھی گئی ہے۔

آل پاکستان جیمز اینڈ جیولرز ایسوسی ایشن کے مطابق پاکستان میں فی تولہ سونے کی قیمت میں 7 ہزار 100 روپے کی کمی ہوئی ہے جس کے بعد فی تولہ سونا 4 لاکھ 86 ہزار 962 روپے کا ہوگیا ہے۔

ایسوسی ایشن کے مطابق اسی طرح 10 گرام سونے کا بھاؤ 6 ہزار 87 روپے کمی کے بعد 4 لاکھ 17 ہزار 491 روپے کا ہوگیا ہے۔

دوسری جانب عالمی بازار میں سونا 71 ڈالر کمی کے بعد 4642 فی اونس کا ہوگیا ہے۔

کراچی: ترجمان محکمہ موسمیات انجم نذیر نےکہا ہےکہ موسمیاتی پیرامیٹرز مغربی ہواؤں کے سسٹم کے زیراثر بارشوں کیلئے سازگار ماحول پیدا کررہے ہیں۔

انجم نذیر کے مطابق اب تک کراچی میں اپریل میں سب سے زیادہ بارش 1985 میں ریکارڈ ہوئی، 2 اپریل 1985 کو کراچی میں 37 ملی میٹر بارش دیکھی گئی۔

ترجمان محکمہ موسمیات نے بتایا کہ 6 سے 7 سال سے ملک میں موسمی پیٹرن بدل رہے ہیں، گزشتہ سال کراچی میں اپریل میں بارش نہیں ہوئی تھی۔

انہوں نے مزید کہا کہ عام طور پر مغربی ہواؤں کے سسٹم کے اثرات ملک کے شمالی علاقے میں زائد رہتے تھے، کچھ موسمیاتی پیرامیٹرز مغربی ہواؤں کے سسٹم کے زیراثر بارشوں کیلئے سازگار ماحول پیدا کررہے ہیں۔

تلنگانہ: بھارت کی ریاست تلنگانہ میں ’چکن شاپ آنرس ایسوسی ایشن‘ نے ریاست میں ہڑتال کا اعلان کرتے ہوئے چکن کی دکانیں بند کردی ہیں۔

بھارتی میڈیا رپورٹس کے مطابق پورے تلنگانہ میں تقریباً 50 ہزار سے زائد چکن کی دکانیں بند رہیں گی۔ پولٹری کمپنیوں کی جانب سے چکن کی فروخت پر منافع کا مارجن کم کرنے اور دکانداروں کو نقصان پہنچانے کے خلاف ہڑتال کا اعلان کیا گیا ہے۔

ایسوسی ایشن کے مطابق، کارپوریٹ آؤٹ لیٹس کو چھوڑ کر ریاست بھر میں چکن کی 50000 ریٹیل دکانیں بند رہیں گی۔ دکان مالکان کا کہنا ہے کہ فی کلو گرام چکن پر ملنے والا کمیشن کافی کم کر دیا گیا ہے۔

گزشتہ 2 دہائیوں سے پولٹری کمپنیاں خوردہ دکانداروں کے لیے 26 روپے فی کلو گرام منافع مارجن برقرار رکھتی تھیں۔ حالانکہ حال ہی میں اس مارجن کو گھٹا کر 16 روپے فی کلو گرام کر دیا گیا ہے، جس سے دکانداروں میں شدید غم و غصہ کی لہر دوڑ گئی ہے۔

ایسوسی ایشن کے صدر نیلوتلا شیکھر کا کہنا ہے کہ چکن کی قیمتوں میں 400-350 روپے کے اضافے سے بھی خوردہ فروشوں کو فائدہ نہیں ہوا۔

ایسوسی ایشن کے ایک نمائندے نے کہا کہ 16 روپے فی کلوگرام کے مارجن پر دکان چلانا جاری رکھنا ناممکن ہے۔ بجلی، کرایہ اور مزدوری کے اخراجات بڑھ رہے ہیں۔ ہم مطالبہ کر رہے ہیں کہ مارجن کو بڑھا کر 30 روپے فی کلوگرام کیا جائے تاکہ موجودہ معاشی حالات کا مقابلہ کیا جا سکے

ایسوسی ایشن کا کہنا ہے کہ جب تک پولٹری کمپنیاں بات چیت کے لیے آگے نہیں آتیں اور ان کے مطالبات پورے کرنے کے لیے کوئی ٹھوس قدم نہیں اٹھاتی ہیں، تب تک ہڑتال جاری رہے گی۔

صوبہ پنجاب بھر کے قبرستانوں میں قبروں کے غیر متوازن اور بڑھتے ہوئے ریٹس ایک نئے مسئلے کی صورت اختیار کر گئے ہیں، جس نے شہریوں کو شدید پریشانی میں مبتلا کر دیا ہے۔

ذرائع کے مطابق لاہور سمیت صوبے کے 41 اضلاع کی 256 تحصیلوں میں قائم 18 ہزار 637 قبرستانوں کی حالت زار تاحال بہتر نہ ہو سکی، جبکہ شہر خاموشاں اتھارٹی بھی قبرستانوں کی تزئین و آرائش میں خاطر خواہ بہتری لانے میں ناکام رہی ہے۔

مختلف ڈویژنز جن میں لاہور، گوجرانوالہ، گجرات، ساہیوال، ڈی جی خان، راولپنڈی اور فیصل آباد شامل ہیں، وہاں قبروں کے نرخ 25 ہزار سے لے کر ایک لاکھ روپے تک وصول کئے جا رہے ہیں، ذرائع کا کہنا ہے کہ بعض مقامات پر سرکاری فیس کے مقابلے میں دو ہزار گنا زیادہ رقم طلب کی جا رہی ہے۔

اعداد و شمار کے مطابق شہر کے 83 فیصد قبرستانوں میں قبر کی قیمت 25 سے 40 ہزار روپے تک پہنچ چکی ہے، جبکہ سرکاری قبرستانوں میں کچے کھاتے کی قبر کا سرکاری ریٹ تقریباً 10 ہزار 500 روپے مقرر ہے۔

پرائیویٹ قبرستانوں میں پسند کی جگہ پر قبر حاصل کرنے کیلئے 25 ہزار سے 50 ہزار روپے تک وصول کئے جا رہے ہیں، جبکہ گورکن کی اجرت بمعہ مواد سرکاری سطح پر 10 ہزار روپے اور نجی قبرستانوں میں 10 ہزار سے 50 ہزار روپے تک لی جا رہی ہے۔

مختلف قبرستانوں کے ریٹس بھی نمایاں طور پر مختلف ہیں، میانی صاحب قبرستان میں پکے کھاتے کی قبر کا ریٹ 10 ہزار 500 روپے ہے، جبکہ بی بی پاکدامن قبرستان میں یہی قیمت 50 ہزار روپے تک پہنچ چکی ہے، اسی طرح شاہ جمال قبرستان میں 10 ہزار، میاں میر قبرستان میں 30 ہزار، اقبال ٹاؤن راوی بلاک شہنشاہ قبرستان میں 40 ہزار، ساندہ قبرستان میں 30 ہزار جبکہ کاہنہ قبرستان میں 10 ہزار روپے تک قبر کی قیمت بتائی جاتی ہے۔

ذرائع کے مطابق شہر خاموشاں کمیٹی تاحال قبرستانوں میں قبروں کے نرخوں کا باقاعدہ تعین کرنے میں ناکام رہی ہے، جبکہ بعض قبرستان کمیٹیوں پر سرکاری فیس کی مد میں کروڑوں روپے خردبرد کرنے کے الزامات بھی سامنے آئے ہیں۔

عام انتخابات کے بعد یہ آثار تو سامنے آ چکے ہیں کہ مسلم لیگ ن وفاق اور پنجاب میں حکومت بنانے جا رہی ہے۔ پارٹی کی طرف سے وزیراعظم اور وزیراعلٰی پنجاب کے لیے شہباز شریف اور مریم نواز کی نامزدگی بھی کر دی گئی ہے۔

تاہم پارٹی قیادت میں متحرک رہنے والے اور ماضی میں نواز شریف کے جانشین سمجھے جانے والے حمزہ شہباز موجودہ صورت حال میں مکمل طور پر خاموش

حالیہ سیاسی منظر نامے سے بات مکمل طور پر واضح ہو چکی ہے کہ نواز شریف کی سیاسی جانشین اب صرف مریم نواز ہیں۔ ایسے میں سیاسی مبصرین یہ سوال اُٹھا رہے ہیں کہ حمزہ شہباز کا سیاسی مستقبل کیا ہو گا؟

ماضی میں حمزہ شہباز پنجاب کے وزیراعلٰی اور اپوزیشن لیڈر بھی رہے ہیں۔ پارٹی کے اندر بھی ان کی گرفت پنجاب خاص طور پر لاہور کی حد تک بہت مضبوط رہی ہے تاہم اب ایسی صورت حال آ چکی ہے کہ ان کے قریبی رفقا کے مطابق وہ صورت حال سے زیادہ خوش نہیں ہیں۔

 نے حمزہ شہباز کے بہت قریبی ساتھیوں سے اس حوالے بات چیت کی ہے۔ ان میں سے ایک نے نام ظاہر نہ کرنے کی شرط پر بتایا کہ ’حمزہ شہباز اپنے آپ کو لیفٹ الون محسوس کرتے ہیں اور وہ اگلے سیاسی منظر نامے میں پنجاب میں اپنا کوئی کردار نہیں دیکھ رہے ہیں۔ ہم نے انہیں مشورہ دیا ہے کہ وہ وفاقی حکومت میں اپنے لیے کوئی راستہ نکالیں کیونکہ وہ اپنے والد کے ساتھ کام کرنے میں اب بہتر محسوس کرتے ہیں۔‘

خیال رہے کہ حمزہ شہباز نے لاہور سے قومی اور صوبائی اسمبلی کی دونوں نشستیں جیتی ہیں۔ ان کے قریبی دوست نے بات جاری رکھتے ہوئے بتایا کہ حمزہ شہباز کا مزاج جارحانہ نہیں ہے لیکن انہوں نے پارٹی کے لیے ماضی میں بہت محنت کی ہے۔ جس کے ثمرات ہر کسی کو پتا ہیں۔

’ہمیں تو اب بھی لگتا ہے کہ ان انتخابات میں اگر پولنگ ڈے کی ذمہ داری ان کے پاس ہوتی تو ن لیگ کا وہ ووٹر جو نکل نہیں سکا اس کو نکالنا آسان ہوتا۔ بہرحال اب جو ہونا تھا ہو گیا ہے لیکن ایک بات طے ہے کہ حمزہ شہباز پنجاب کی بننے والی حکومت میں اپنے لیے کسی قسم کی وزارت یا کسی دوسرے کردار میں دلچسپی نہیں رکھتے۔‘

یاد رہے کہ پنجاب میں عثمان بزدار دور میں حمزہ شہباز اپوزیشن لیڈر تھے اور ان کا زیادہ تر وقت جیل میں گزرا اسمبلی اجلاسوں میں شرکت کے لیے اس وقت کے سپیکر پرویزالٰہی ان کو اجازت نامہ جاری کرتے تھے۔

ہیں

 گرین ٹاؤن کے علاقے میں مبینہ پولیس مقابلہ، زخمی ملزم ہسپتال میں دم توڑ گیا۔

گرین ٹاؤن میں پولیس نے مشکوک موٹر سائیکل سواروں کو رکنے کا اشارہ کیا تو ملزمان نے اندھا دھند فائرنگ شروع کر دی، جس سے پولیس گاڑی بھی گولیوں کی زد میں آئی۔

پولیس نے بروقت کارروائی کرتے ہوئے تعاقب کے بعد ایک ملزم کو زخمی حالت میں گرفتار کر لیا، جس کی شناخت ساجد کے نام سے ہوئی۔ ملزم اپنے ہی ساتھی کی فائرنگ سے زخمی ہوا تھا۔

ذرائع نے مزید بتایا کہ زخمی ملزم کو علاج کے لیے جناح ہسپتال منتقل کیا گیا، تاہم وہ زخموں کی تاب نہ لاتے ہوئے دم توڑ گیا جبکہ دوسرا ملزم فائرنگ کرتے ہوئے فرار ہو گیا، جس کی گرفتاری کے لیے پولیس کے چھاپے جاری ہیں۔

لاہور ہائیکورٹ نے اسموگ پر قابوپانے کے لیے حکومت کو سنجیدہ اقدامات کی ہدایت کردی۔

لاہور ہائیکورٹ میں اسموگ تدارک کے لیے دائر درخواستوں پر سماعت ہوئی جس میں مختلف سرکاری محکموں نے اپنی رپورٹس عدالت میں پیش کیں جب کہ پی ایچ اے نے درختوں کی ٹرانسپلانٹیشن سے متعلق قواعد عدالت میں پیش کردیے۔

لاہور ہائیکورٹ نے حکم دیا کہ جوڈیشل واٹر کمیشن رولز کا جائزہ لے کر ضروری ترامیم کرے۔

جسٹس شاہد کریم نے کہا کہ غیر مقامی درخت لاہور کے ماحول کو نقصان پہنچا رہے ہیں، سارے سال کا اسموگ ایک ماہ میں آجاتاہے اور  سارے سال کی محنت ایک ماہ میں ضائع ہوجاتی ہے۔

اس پر جوڈیشل واٹر کمیشن نے کہا کہ 11 ہزار درخت کاٹنے کا منصوبہ روک دیا گیا ہے۔

لاہور ہائیکورٹ نے کہا کہ ملک میں فضائی آلودگی خطرناک حد تک بڑھ چکی ہے، ڈبلیو ڈبلیو ایف کی سفارشات بھی حاصل کی جائیں۔

عدالت نے اسموگ پر قابوپانے کے لیے حکومت کو سنجیدہ اقدامات کی ہدایت کی اور آئندہ سماعت پر سرکاری محکموں سے عملدرآمد رپورٹس طلب کرلیں۔