لاہور: (ویب ڈیسک) لاہور میں سادہ روٹی اور نان کی قیمت میں کمی کر دی گئی۔
ذرائع مارکیٹ لاہور کے مطابق گندم کی قیمت کم ہونے کے بعد سادہ روٹی کی قیمت 20 سے 15 روپے مقرر کر دی جبکہ سادہ نان 30 سے 25 روپے کا فروخت ہونے لگا، روغنی نان 70 سے 40 روپے پر آگیا۔
ضلعی انتظامیہ کا کہنا ہے کہ شہر بھر میں یہی قیمت ہوگی، بعض تندور مالکان زیادہ قیمت وصول کر رہے ہیں جن کے خلاف کارروائی کی جائے گی۔
واضح رہے کہ گندم کی قیمت کم ہونے کے بعد نان اور روٹی کی قیمتوں میں کمی کا فیصلہ کیا گیا ہے۔
ممبئی: (ویب ڈیسک) معروف بالی ووڈ ادکارہ نے تاپسی پنو نے کہا ہے کہ بالی ووڈ میں موجود کیمپس اور تعصب کے بارے میں سب جانتے ہیں۔
گزشتہ ایک دہائی سے زائد عرصہ بالی ووڈ میں پرفارم کرنے اور 2016 کی فلم پنک سے شہرت حاصل کرنے والی تاپسی نے مزید کہا کہ وہ کسی کے خلاف کوئی بغض و عناد نہیں رکھتیں، ہر کسی کو یہ حق حاصل ہونا چاہیے کہ اپنی مرضی کے لوگوں کے ساتھ کام یا پھر ان کی فلم کرے۔
35 سالہ تاپسی کا کہنا ہے کہ کیریئر کے بارے میں سوچنے والوں کو میں کوئی الزام نہیں دے سکتی، وہ جانتی ہیں کہ انڈسٹری میں ہر چیز درست نہیں ہوسکتی اور ایسا میرے آنے سے پہلے سے ہے تو یہاں شکایت والی کوئی بات نہیں ہے۔
تاپسی کے مطابق انہوں نے کبھی یہ نہیں کہا کہ یہاں سب ٹھیک ہے، ہاں یہ میں ہمیشہ سے جانتی ہوں کہ تعصب موجود ہے تو پھر اس کے لیے پریشان کیوں ہوں۔
انہوں نے کہا کہ میرے خیال میں رول آف گیم غیر منصفانہ ہے اب اگر اس کے باوجود بھی آپ یہ فیصلہ کریں کہ آپ کو اسی انڈسٹری کا حصہ بننا ہے تو پھر یہ آپ کی مرضی ہے اس پر شکایت کرنا بیکار ہے۔
ممبئی: (ویب ڈیسک) بالی ووڈ کوئین کنگنا رناوت نے شادی اور اپنی فیملی سے متعلق سوال کا جواب دے دیا۔
بھارتی میڈیا رپورٹ کے مطابق کنگنا رناوت نے شادی اور اپنے خاندان سے متعلق خواہش کا اظہار کردیا، وہ اس سے پہلے بھی اپنی ذاتی زندگی سے متعلق اظہار خیال کرچکی ہیں۔
ایک حالیہ انٹرویو میں بالی ووڈ کوئین نے کہا کہ میں شادی کرنا چاہتی ہوں لیکن وہ درست وقت پر ہوجائے گی، ہر چیز کا ایک وقت ہوتا ہے، اگر وہ وقت میری زندگی میں آنا ہے تو آجائے گا۔
لاہور: (ویب ڈیسک) پاکستانی دستاویزی فلم ’ہم سایہ‘ نے عالمی اعزاز اپنے نام کر لیا۔
سینٹر فار سوشل جسٹس کی تیار کردہ پاکستانی دستاویزی فلم ’ہم سایہ‘ کو وینس انٹر کلچرل فلم فیسٹیول 2023 میں انسانی حقوق پر مبنی بہترین مختصر دستاویزی فلم کے ایوارڈ سے نوازا گیا ہے۔
دستاویزی فلم ’ہم سایہ‘ (Neighbour) کے ڈائریکٹر اور ایڈیٹر داؤد مراد نے لڑکیوں کے اغواء، جبری شادی، جبری تبدیلی مذہب جیسے معاشرتی مسائل پر مبنی کہانیوں کو شامل کر کے ان مسائل کو اجاگر کیا۔
دستاویزی فلم کی نمائش 16 جون کو آکسفورڈ یونیورسٹی میں جبکہ 23 جون کو وینس، اٹلی اور دنیا بھر کے دیگر مقامات پر پیش کی جائے گی۔
یہ فلم سی ایس جے کے مختلف تحقیقی اور وکالت کے کیسز پر مبنی ہے جو پاکستان میں انسانی حقوق، جمہوریت کی ترقی اور سماجی انصاف پر مرکوز ہے، دستاویزی فلم ”ہم سایہ“ میں لڑکیوں کے اغواء، جبری شادی، تبدیلی مذہب جیسی کہانیوں کو شامل کیا گیا ہے۔
لاہور: (ویب ڈیسک) دیکھتی آنکھوں کو ہر دلعزیز چہرہ دیکھے 3 برس بیت گئے، طارق عزیز کے چاہنے والے آج ان کی برسی منا رہے ہیں، نامور کمپیئر اور اداکار کا منفرد انداز آج بھی مداحوں کو یاد ہے۔
دیکھتی آنکھوں سنتے کانوں آپ کو طارق عزیز کا سلام، یہ سلام دنیا بھر میں گونجا، فن میں بے مثال، اداکار، صداکار، شاعر اور میزبان، خبرنامہ، میزبانی، انٹرویوز، تعلیمی و تفریحی ٹیلی ویژن شوز ان سب کی ابتداء طارق عزیز نے کی۔
نيلام گھر کا ميزبان اور پاکستان ٹيلی ويژن کے ابتدائی نيوز کاسٹر طارق عزيز اپنے فن میں بے مثال تھے۔
1936 کو جالندھر میں پیدا ہونے والے طارق عزیز نے کيریئر کا آغاز ريڈيو پاکستان لاہور سے کيا اور پھر پاکستان ٹیلی ويژن کے پہلے نيوز کاسٹر بنے، ان کا پروگرام نيلام گھر چار دہائيوں تک ٹيلی ويژن سکرين کی زينت بنا رہا اور مقبولیت کے ایسے ریکارڈ قائم کئے جو کسی اور پروگرام کے حصے میں نہیں آئے۔
اسی بنا پر نیلام گھر کو انہی کے نام ’’ طارق عزیزــ شو ‘‘ کے نام سے موسوم کر دیا گیا۔
طارق عزيز سلور سکرين پر بھی جلوہ گر ہوئے، ان کی مشہور فلموں ميں انسانیت، ہار گیا انسان، سالگرہ، قسم اس وقت کی اور چراغ کہاں روشنی کہاں شامل ہيں۔
انہوں نے شاعری اور سياست کے ميدان ميں بھی طبع آزمائی کی، 84 برس کی عمر پانے والے طارق عزیز کو پرائيڈ آف پرفارمنس سميت متعدد اعزازات سے نوازا گيا، وہ 17 جون 2020 کو اس عالم رنگ و بو کو خیر باد کہہ گئے۔
لاہور: (ویب ڈیسک) سانحہ 9 مئی کو ایک ماہ سے زائد کا عرصہ گزر گیا لیکن سیاسی جماعت سے وابستہ شرپسندوں کے اعترافات جاری ہیں۔
زمان پارک میں ہوئی سازش کو سیاسی جماعت کے اپنے کارکنان نے بے نقاب کر دیا۔
لاہور کے جناح ہاؤس شرانگیزی کی منصوبہ بندی چیئرمین پاکستان تحریک انصاف (پی ٹی آئی) کی گرفتاری سے ایک دن پہلے ہو چکی تھی۔
پی ٹی آئی کارکن کا کہنا ہے کہ یاسمین راشد اور اعجاز چودھری نے کارکنان کو جناح ہاؤس جانے کی ہدایت دی، چیئرمین پی ٹی آئی نے گرفتاری سے ایک دن پہلے میٹنگ بلا کر انتشار کا مکمل منصوبہ تیار کر لیا تھا۔
کارکن نے کہا کہ چیئرمین پی ٹی آئی نے گرفتاری سے پہلے ہی جناح ہاؤس پر حملے کا منصوبہ بنا لیا تھا، شرانگیزی کے بعد انہوں نے خود کو بچانے کیلئے ایجنسیوں پر الزام تراشی کی، وزارت عظمیٰ چھنتے ہی چیئرمین پی ٹی آئی نے افواج پاکستان کے خلاف زہر اُگلنا شروع کر دیا تھا۔
ان کا یہ بھی کہنا ہے کہ جناح ہاؤس میں جلاؤ گھیراؤ کے وقت پی ٹی آئی کے حسان نیازی بھی موجود تھے، انہوں نے کور کمانڈر کے یونیفارم کی بے حرمتی کی۔
ملتان: (ویب ڈیسک) پاکستان تحریک انصاف کے وائس چیئرمین شاہ محمود قریشی نے کہا ہے کہ وہ کسی توڑ پھوڑ میں شامل نہیں تھے اور نہ ہی اس کے حق میں ہیں تاہم جہاں تھا وہیں کھڑا ہوں۔
ملتان سیشن کورٹ کے باہر میڈیا سے گفتگو کرتے شاہ محمود قریشی نے کہا کہ مجھ پر ملتان میں پانچ کیسز درج کئے گئے، 9 مئی کے واقعات کی وجہ سے مجھ پر 13 دفعات لگائی گئیں جس میں سے ایک دفعہ بھی ثابت نہیں کی جاسکی۔
انہوں نے کہا کہ میں ملتان میں موجود ہی نہیں تھا اسلام آباد میں تھا، اسلام آباد میں گرفتار ہوا اور اڈیالہ جیل گیا، مقدمات ملتان میں درج ہو گئے، ان جھوٹے مقدمات سے انتظامیہ کی ساکھ متاثر ہوئی ہے۔
شاہ محمود قریشی کا مزید کہنا تھا کہ مجھے جیل میں تھری ایم پی او کے تحت بند کیا گیا، 9 مئی کے واقعات میں کسی توڑ پھوڑ میں شامل نہیں تھا اور نہ اس کے حق میں ہوں۔
اسلام آباد: (ویب ڈیسک) حکومت اور تحریک لبیک پاکستان کے درمیان معاملات خوش اسلوبی سے طے پاگئے، مذاکرات کی کامیابی کے بعد ٹی ایل پی نے پاکستان بچاؤ مارچ ختم کرنے کا اعلان کر دیا ہے۔
اسلام آباد میں ٹی ایل پی رہنما شفیق امینی کے ہمراہ پریس کانفرنس کرتے ہوئے وفاقی وزیر داخلہ رانا ثناء اللہ کا کہنا تھا کہ ناموس رسالت کا تحفظ ہر مسلمان کے ایمان کا حصہ ہے، ناموس رسالت کے تحفظ کیلئے مل کر طریقہ کار طے کیا ہے، توہین مذہب کی روک تھام کیلئے مشاورت سے ایک لائحہ عمل تک پہنچے ہیں۔
انہوں نے کہا کہ ہم نے ایک کمیٹی تشکیل دی ہے جس میں حکومت کے قانون نافذ کرنیوالے ادارے اور تحریک لبیک پاکستان (ٹی ایل پی) کے علماء ہوں گے جو ان چیزوں کا جائزہ لیں گے اور تحفظ ناموس رسالت کو یقینی بنائیں گے، اللہ اس مقدس کام میں ہمیں کامیابی عطا فرمائے۔
رانا ثنا اللہ نے کہا کہ ڈاکٹر عافیہ صدیقی کے معاملے پر ہر پاکستانی غمزدہ ہے، ایک بے گناہ خاتون کو نہ صرف غلط سزا دی گئی اور قید میں بھی رکھا گیا ہے، پاکستان کے حالات پر کانگریس ارکان کو خط لکھنے والے ڈاکٹر عافیہ کا معاملہ بھی دیکھیں، ڈاکٹر عافیہ صدیقی کو بنیادی حقوق سے محروم رکھا گیا ہے، حکومت ڈاکٹر عافیہ صدیقی کے معاملے پر خط بھی لکھے گی۔
وزیر داخلہ کا کہنا تھا کہ ٹی ایل پی کا ایک مطالبہ پٹرولیم مصنوعات کی قیمتوں میں کمی کا بھی تھا، پٹرول کی قیمتوں سے متعلق طریقہ کار ٹی ایل پی کے سامنے رکھا، اسحاق ڈار نے یقین دلایا ہے کہ پٹرول کی قیمتوں میں واضح کمی آئے گی، ٹی ایل پی اور حکومت کے درمیان معاملات خوش اسلوبی سے طے پاگئے ہیں۔
انہوں نے کہا کہ یہ ٹی ایل پی کے دوستوں کا تدبر ہے کہ انہوں نے ہمارے مؤقف کو سمجھا اور ان معاملات کر پُرامن طریقے سے حل کرنے کی اور اپنے احتجاج کو ختم کرنے کی حامی بھری، ہم نے خلوص دل سے کوشش کی کہ ان کے جذبات کو سمجھیں۔
حکومت نے ہمارے مطالبات مان لئے ہیں: شفیق امینی
اس موقع پر ٹی ایل پی رہنما شفیق امینی کا کہنا تھا کہ حکومت نے ہمارے مطالبات مان لئے ہیں، ہمارے مطالبات میں تحفظ ناموس رسالت، مہنگائی کا خاتمہ اور ڈاکٹرعافیہ کا معاملہ شامل تھا، ہم نے اپنے مطالبات کیلئے پرامن مارچ کیا۔
انہوں نے کہا کہ رانا ثنا اللہ کا شکریہ کہ انہوں نے لاکھوں لوگوں کے جذبات کی قدر کی اور ہمارے مطالبات مانے گئے، غریبوں کی زندگی آسان کرنا ٹی ایل پی کا منشور ہے، ہمیں امید ہے کہ اس معاملے پر ہم آگے بڑھیں گے۔
ٹی ایل پی رہنما کا کہنا تھا کہ امید ہے ماضی کے تلخ تجربات دہرائے نہیں جائیں گے اور جو مطالبات تسلیم کئے گئے ہیں ان پر عملدرآمد کیا جائے گا۔
خیال رہے کہ تحریک لبیک پاکستان کا مطالبات کے حق میں کراچی تا اسلام آباد لانگ مارچ جاری تھا جو کہ حکومت نے جہلم کے قریب روک رکھا تھا۔
لاہور: (ویب ڈیسک) سابق وزیر اعلیٰ چودھری پرویز الہٰی سے پنجاب اسمبلی کا سٹاف واپس لے لیا گیا۔
ذرائع پنجاب اسمبلی کے مطابق سٹاف میں سکیورٹی اہلکار، ڈرائیور، باورچی سمیت 60 ملازم شامل تھے۔
واضح رہے کہ یکم جون کو چودھری پرویز الہٰی کو لاہور میں ان کے گھر کے قریب سے گرفتار کیا گیا تھا، انہیں اینٹی کرپشن پولیس نے گرفتار کیا تھا۔
پاکستان تحریک انصاف (پی ٹی آئی) کے صدر پرویز الہٰی کے خلاف اینٹی کرپشن میں سرکاری ٹھیکوں میں کمیشن لینے کے الزام پر مقدمہ درج ہے، ان کے خلاف لاہور کے تھانے میں کار سرکار میں مداخلت اور پولیس پر تشدد کا مقدمہ بھی درج ہے۔
ایتھنز : (ویب ڈیسک) جنوبی یونان کے ساحل پر تارکین وطن کی کشتی ڈوبنے کے حادثے میں 298 پاکستانیوں کے جاں بحق ہونے کا خدشہ ظاہر کیا جارہا ہے جبکہ 12 افراد کو زندہ بچا لیا گیاہے ۔
تفصیلات کے مطابق جنوبی یونان کے ساحل کے قریب تارکین وطن کی لیبیا سے اٹلی جانے والی کشتی میں 78 افراد ہلاک ہوچکے ہیں ، کشتی میں 310 پاکستانیوں کے بھی سوار ہونے کی اطلاعات ہیں جن میں سے 298 کی موت کا خدشہ بتایا جارہا ہے تاہم یونان میں پاکستانی سفارت خانے نے تصدیق کی ہے کہ اب تک 12 شہریوں کو زندہ بچا لیا گیا ہے۔
پاکستانی سفارتخانے کی جانب سے بتایا گیا ہے کہ یونانی حکام نے چوتھے روز بھی سرچ آپریشن جاری رکھتے ہوئے 78 لاشیں نکالی ہیں ، تاہم جاں بحق ہونے والوں کی شہریت کا علم نہیں، اس حوالے سے یونانی حکام نے اپیل کی ہے کہ لاپتہ افراد کی تلاش کے لیے صرف والدین یا بچوں کا ڈی این اے سیمپل بھیجا جائے ، ڈی این اے رپورٹ، لاپتہ افراد کا شناختی کارڈ، پاسپورٹ اور رابطہ نمبر info@pakistanembassy.gr پر بھیجی جاسکتی ہیں ۔
یونان میں پاکستانی سفارت خانہ کے حکام نے کشتی حادثے میں زندہ بچ جانے والے 12 پاکستانیوں سے بھی ملاقات کی ہے ۔
یونانی حکام نے جن پاکستانیوں کو بچایا ہے ان میں سے محمد عدنان بشیر اور حسیب الرحمن کا تعلق ضلع کوٹلی سے ہے باقی افراد میں محمد حمزہ (گوجرانوالہ)، عظمت خان (گجرات)، محمد سنی (شیخوپورہ)، زاہد اکبر (شیخوپورہ)، مہتاب علی (منڈی بہاؤالدین)، رانا حسنین (سیالکوٹ)، عثمان صدیقی (گجرات)، ذیشان سرور (گوجرانوالہ) جبکہ عرفان احمد اور عمران آرائیں ہسپتال میں زِیرعلاج ہیں۔
اس کشتی میں پاکستان بالخصوص آزاد کشمیر سے تعلق رکھنے والے 130 افراد سوار تھے جن میں 43 نوجوان بھی شامل ہیں ۔
اس حوالے سے اقوام متحدہ کے انسانی حقوق کے دفتر نے کہا ہے کہ یونان میں تارکین وطن کی کشتی الٹنے کے بعد 500 سے زائد افراد تاحال لاپتہ ہے۔
خیال رہے کہ یونانی کوسٹ گارڈز کے مطابق یہ واقعہ منگل اور بدھ کی درمیانی شب پیرلوس کے جنوب مغرب میں پیش آیا، اب بھی حادثہ کا شکار ہونے والے سینکروں افراد کی تلاش جاری ہے۔
حکام کے مطابق 65 سے 100 فٹ لمبی کشتی میں ممکنہ طورپر750 افراد سوار تھے، کشتی میں سوار افراد کی حتمی تعداد ابھی معلوم نہیں ہوسکی ہے تاہم کشتی میں بیشترتارکین وطن کا تعلق مصر، شام، افغانستان اور پاکستان سے ہے۔
حکام کے مطابق یونانی کوسٹ گارڈز اور نیوی کی کشتیاں، جہاز اور ہیلی کاپٹرز ریسکیو آپریشن میں شریک ہیں۔
یونان کی عبوری حکومت نے کشتی کے اس بڑے حادثے کے پیش نظر ملک میں تین دن سوگ کا اعلان کیا ہے اور ہر طرح کی تقریبات منسوخ کر دی ہیں۔
