اسلام آباد: سائفر کیس میں عمران خان کی درخواست ضمانت سماعت کے لیے مقرر کرلی گئی۔

چیئرمین پی ٹی آئی کے خلاف سائفر کیس پیش رفت ہوئی ہے، جس کے مطابق اسلام آباد ہائی کورٹ نے عمران خان کی ضمانت کی درخواست سماعت کے لیے مقرر کرلی۔ا س سلسلے میں رجسٹرار ہائی کورٹ نے آئندہ ہفتے کی کاز لسٹ جاری کردی ہے۔

 اسلام آباد: گلگت بلتستان کی حکومت نے سرکاری گاڑیوں پر ’’یہ گاڑی ٹیکس گزاروں کی ملکیت ہے‘‘ لکھنے کا حکم جاری کردیا۔

ایکسپریس نیوز کے مطابق گلگت بلتستان حکومت نے انقلابی اقدام اٹھالیا، چیف سیکریٹری محی الدین وانی نے سرکاری گاڑیوں سے متعلق بڑا فیصلہ کرلیا جس کے تحت سرکاری گاڑیوں پر ’’یہ گاڑی جی بی کے ٹیکس گزاروں کی ملکیت ہے‘‘ لکھا جائے گا۔

لندن: (خبریں ڈیجیٹل) مسلم لیگ ن کے صدر و سابق وزیر اعظم محمد شہباز شریف نے کہا ہے کہ نواز شریف 21 اکتوبر کو انشاء اللہ وطن واپس جا رہے ہیں، نواز شریف ملک میں سرمایہ کاری لائیں گے، نوجوانوں کو روزگار دلانے کے لیے دن رات کام کریں گے۔

لندن میں میڈیا سے گفتگو کرتے ہوئے شہباز شریف نے کہا کہ جھرلو الیکشن کے ذریعے نواز شریف کا مینڈیٹ چھین لیا گیا، پاکستان کے کروڑوں عوام کو ترقی کے سفر سے محروم کیا گیا۔

شہباز شریف نے کہا کہ نواز شریف ایک معمار بن کر دوبارہ ترقی کے سفر کو شروع کریں گے، انہوں نے کہا کہ میرے لندن آنے کی وجہ میٹنگ میں شرکت کرنا تھی۔

انہوں نے کہا کہ نوازشریف دور میں تین اعشاریہ 5 فیصد مہنگائی تھی، راتوں رات تو روم بھی دوبارہ تعمیر نہیں ہوا تھا، نواز شریف نے قوم سے کبھی غلط وعدے نہیں کیے۔

شہباز شریف نے کہا کہ نواز شریف نے 4 سال میں بجلی کے اندھیرے ختم کر کے دکھائے، اس کے بعد قوم میں زہر گھولا گیا، چیئرمین پی ٹی آئی نے ملک میں تقسیم پیدا کی، نواز شریف اس زہر کو ختم کرنے کے لیے آ رہا ہے۔

انہوں نے کہا کہ نواز شریف ملک میں سرمایہ کاری لائیں گے، ترقی کا سفر وہیں سے شروع ہو گا جہاں پر رُکا تھا۔

لاہور ہائی کورٹ نے پٹرولیم مصنوعات کی قیمتوں میں اضافے کے خلاف درخواست پر فریقین کو نوٹسز جاری کر دیئے۔

عدالتِ عالیہ میں پٹرولیم مصنوعات کی قیمتوں میں اضافے کے خلاف درخواست پر سماعت ہوئی۔

درخواست گزار کی جانب سے استدعا کی گئی ہے کہ عدالت پٹرولیم مصنوعات کی قیمتوں میں حالیہ اضافے کو کالعدم قرار دے۔

لاہور ہائی کورٹ نے فریقین کو نوٹسز جاری کرتے ہوئے ان سے جواب طلب کر لیا۔

یاد رہے کہ چند روز قبل جوڈیشل ایکٹوزیم پینل کے سربراہ اظہر صدیق ایڈووکیٹ نے لاہور ہائی کورٹ میں درخواست دائر کی تھی، جس میں نگران وفاقی حکومت سمیت دیگر کو فریق بنایا گیا تھا۔

واضح رہے کہ حکومت نے پٹرولیم مصنوعات کی قیمت میں ریکارڈ اضافہ کرتے ہوئے پٹرول فی لیٹر 26 روپے 2 پیسے اور ڈیزل 17 روپے 34 پیسے مزید مہنگا کیا ہے۔

لاہور: (خبریں ڈیجیٹل) پاکستان مسلم لیگ ن کی سینئر نائب صدر و چیف آرگنائزر مریم نواز شریف نے کہا ہے کہ پاکستان کے عوام اپنے قائد میاں نوازشریف کا استقبال کرنے کے لئے بے تاب ہیں، نوازشریف کے استقبال میں ہر طبقے کے لوگ موجود ہوں گے۔

مسلم لیگ (ن) وکلاء ونگ کا پارٹی قائد میاں نواز شریف کی واپسی کے حوالے سے ماڈل ٹاؤن میں اہم اجلاس ہوا، اجلاس میں مریم نواز نے ویڈیو لنک کے ذریعے خصوصی شرکت کی، اجلاس میں سابق وزیر قانون اعظم نذیر تارڑ اور پنجاب کے صدر رانا ثناءاللہ بھی شریک ہوئے۔

نصیر بھٹہ،عطا اللہ تارڑ، محسن رانجھا، انوشہ رحمان، عظمیٰ بخاری، رانا ارشد سمیت صدر لائرز ونگ رانا ظفر اقبال ، جنرل سیکرٹری عنصر بلوچ، خاور اکرام بھٹی، رفاقت ڈوگر، صفدر جٹ، ملک شہباز نٹھر، امتیاز الٰہی، ناصر چوہان، ملک ذیشان اعوان اور پنجاب بھر سے آئے ڈویژن اور ڈسٹرکٹ کے عہدیدار بھی اجلاس میں شریک ہوئے۔

اجلاس سے خطاب کرتے ہوئے مریم نواز نے کہا کہ پاکستان کے وکلاء نواز شریف کے فرنٹ لائن سولجرز ہیں، وکلاء برادری نے ہر موقع پر نواز شریف کا ساتھ دیا، سیکڑوں عدالتی پیشیاں ہوں، کوٹ لکھپت ہو یا اڈیالہ جیل کی قید ہر جگہ وکلاء نوازشریف کے ساتھ کھڑے رہے۔

مسلم لیگ ن کے رہنما اعظم نذیر تارڑ نے کہا کہ وکلاء نے ہمیشہ نواز شریف کی آواز پر لبیک کہا ہے، وکلاء تحریک اس کا واضح ثبوت ہے نواز شریف جب باہر نکلتا ہے تو عوام ان کے ساتھ شانہ بشانہ کھڑے ہوتے ہیں۔

اعظم نذیر تارڑ نے مزید کہا کہ پاکستان کی جمہوریت پسند وکلا برادری نے ہمیشہ نواز شریف کو ہی سپورٹ کیا ہے، “یہ جو کالا کوٹ ہے میاں تیرا ووٹ ہے” نعرہ اٹل حقیقت ہے۔

اس موقع پر سابق وزیر داخلہ رانا ثنا اللہ نے کہا کہ قائد نواز شریف کے تاریخی استقبال کے لیے بھرپور تیاریاں جاری ہیں، 21 اکتوبر کو پاکستان کے مستقبل کا فیصلہ ہو گا، جمہوریت کی بحالی اور سویلین بالا دستی کے لیے وکلاء کی جدوجہد اہمیت کی حامل ہے۔

رانا ثناءاللہ نے کہا کہ نواز شریف واپس آئیں پاکستان کی وکلاء برادری ان کے استقبال کے لیے فرنٹ لائن میں کھڑی ہوگی، نواز شریف کا بیانیہ واضح اور دو ٹوک ہے، جمہوریت کی کامیابی، آئین کی بالادستی اور اداروں کا استحکام ہی مضبوط پاکستان کی ضمانت ہے۔

اجلاس سے عطا اللہ تارڑ نے بھی خطاب کیا اور وکلا کی قربانیوں اور آئین اور جمہوریت کی خاطر ہونے والی تحریکوں پر خراج تحسین پیش کیا۔

نگران وزیراعظم انوار الحق کاکڑ نے اقوام متحدہ کی جنرل اسمبلی سے خطاب  میں کہا ہے کہ تمام ممالک سے اچھے تعلقات چاہتے ہیں، پاکستان اور بھارت کے درمیان امن کیلئے مسئلہ کشمیر کا حل ہونا ضروری ہے۔

اپنے خطاب میں انوار الحق کاکڑ کا کہنا تھاکہ موسمیاتی تبدیلی اور کورونا کی وجہ سے معاشی بحران پیدا ہوا، پاکستان کو خوراک، تیل اور معاشی چیلنجوں کا سامنا ہے، موسمیاتی تبدیلی کی وجہ سے پاکستان سب سے زیادہ متاثر ہوا ہے، حکومت معیشت کو ٹھیک کرنے میں سنجیدہ ہے۔

انہوں نے کہا کہ موسمیاتی تبدیلیوں کی وجہ سے پاکستان کو 30 ارب ڈالر کا نقصان ہوا، سی پیک کے ذریعے پاکستان مستحکم ہوگا۔

مقبوضہ کشمیر کے حوالے سے نگران وزیر اعظم کا کہنا تھاکہ جنوبی ایشیا میں امن کی کنجی کشمیر ہے، بھارت نے مقبوضہ کشمیر میں 9 لاکھ فوجی تعینات کر رکھے ہیں، بھارتی افواج مقبوضہ کشمیر میں کشمیریوں کی نسل کشی کر رہی ہیں۔

انہوں نے کہا کہ پاکستان اور بھارت کے درمیان امن کیلئے مسئلہ کشمیر کا حل ہونا ضروری ہے، بھارت سمیت خطے کے تمام ممالک سے اچھے تعلقات چاہتے ہیں، اقوام متحدہ کو مسئلہ کشمیر کے حل کیلئے اپنی قراردادوں پر عمل کرنا چاہیے،  بھارت خطے میں انتہاپسندی کو فروغ دے رہا ہے، دنیا کو دہشتگردی بشمول بھارت جیسی ریاستی دہشتگری کو ختم کرنا ہوگا، ہندوتوا جیسے نظریات نے ہی اسلاموفوبیا کو دنیا میں بڑھایا ہے۔

ان کا کہنا تھاکہ ترقی کیلئے امن لازم ہے، افغانستان کے امن سے خطے کا امن جڑا ہوا ہے،  افغانستان سے کالعدم تحریک طالبان پاکستان (ٹی ٹی پی) اور داعش پاکستان میں دہشت گرد حملے کر رہے ہیں۔

ان کہنا ہے کہ افغانستان میں عالمی امداد کا سلسلہ جاری رہنا چاہیے۔

نگران وزیراعظم کا کہنا تھاکہ اسلاموفوبیا کی وجہ سے مسلمانوں پر حملے کیے جا رہے ہیں، چیلنجز سے نمٹنے کیلئے دنیا کو مل کر کام کرنا ہوگا۔

اسلام آباد: (خبریں ڈیجیٹل)  پاکستان تحریک انصاف کے صدر پرویزالٰہی کا کہا ہے کہ ملک کے جو حالات ہیں تمام سیاستدانوں کو انتخابات سے قبل حفاظتی ضمانت کرالینی چاہیے۔

اسلام آباد کی انسداد دہشتگردی عدالت میں پیشی کے موقع پر صحافیوں سے غیر رسمی گفتگو کرتے ہوئے پرویز الٰہی نے بتایا کہ جیل کا کھانا دیا جاتا ہے جس سے طبیعت ناساز رہتی ہے، پہلے ڈاکٹر کی سہولت میسر تھی، اب ان کو اس میں بھی مسائل نظر آنے لگے۔

مہنگائی پر بات کرتے ہوئے سابق وزیراعلیٰ نے کہا کہ آج مہنگائی سے عام آدمی ختم ہوچکا ہے جب کہ بجلی مہنگی ہونے کے اصل ذمہ دار نواز شریف اور شہباز شریف ہیں۔

پی ٹی آئی صدر کا کہنا تھا کہ عام انتخابات نہ ہونے سے ملک کا نظام رکا ہوا ہے، جو حالات ہیں تمام سیاستدانوں کو انتخابات سے قبل حفاظتی ضمانت کرالینی چاہیے۔

ایک صحافی نے سابق وزیر اعلیٰ پنجاب سے انتخابات سے قبل ان کی رہائی کے حوالے سے پوچھا جس پر پرویزالٰہی نے کہا کہ میری رہائی کی بات اللہ ہی بہتر جانتا ہے۔

انہوں نے مزید کہا کہ چیئرمین پی ٹی آئی سے بیک ڈور مذاکرات پرکچھ نہیں کہہ سکتا، چوہدری شجاعت سے دوبارہ ملاقات ہوئی۔

ایک سوال کے جواب میں پرویز الٰہی کا کہنا تھا کہ سننے میں یہ بھی آرہا ہے کہ نوازشریف کی ملک واپسی کی تاریخ بدل رہی ہے، نوازشریف تو خود بھی بدل سا گیا ہے۔