سان فرانسسکو: (ویب ڈیسک) اس وقت دنیا بھر میں مصنوعی ذہانت کے ایک طاقتور پلیٹ فارم چیٹ جی پی ٹی کی دھوم ہے۔ تاہم اب اس کی مرکزی کمپنی اوپن اے آئی نے چیٹ جی پی ٹی کی سبسکرپشن کا اعلان کرتے ہوئے ماہانہ 20 ڈالر فیس کا اعلان کیا ہے۔
کمپنی کے مطابق صارفین اس سے غیرمعمولی فوائد حاصل کرسکیں گے۔ اپنے اعلان کے بعد یہ سافٹ ویئر اب طلباوطالبات، صحافیوں اور سائنسدانوں تک میں تیزی سے مقبول ہورہا ہے۔ اس کا استعمال کم قیمت پر ایس ای او میں بھی مدد فراہم کرتا ہے۔
تاہم تجزیہ کاروں نے اب بھی خبردارکیا ہے کہ اس پر مکمل بھروسہ نہیں کیا جاسکتا کیونکہ یہ غلط معلومات اور مبہم نتائج بھی دکھاتا ہے۔ لیکن دوسری جانب بعض شعبوں پر اس نے غیرمعمولی معلومات اور تنائج بھی ظاہر کئے ہیں۔
چیٹ جی پی ٹی کی سبسکرپشن سروس فی الحال امریکہ میں فراہم کی جارہی ہے جو فیس ہونے کی بنا پر کئی سہولیات کی حامل ہوگی تاہم جلد اس کا دائرہ دیگر علاقوں تک وسیع کیا جاسکے گا۔

لندن: (ویب ڈیسک) ڈائٹ کرنے والے افراد زیادہ کاربوہائیڈریٹس ہونے کی وجہ سے بریڈ کھانے سے اجتناب کرتے ہیں لیکن سائنس دانوں نے ایک ایسی بریڈ بنانے کا دعویٰ کیا ہے جو لوگوں کو بھرے پیٹ کا احساس دلا کر ان کا وزن کم کرسکے گی۔
سائنس دانوں نے چنے سے ایک ایسا آٹا بنایا جس کو بریڈ کی صورت میں کھا کر لوگ عام بریڈ کی نسبت زیادہ مطمئن تھے۔
سائنس دانوں کا ماننا ہے کہ ڈائٹ کرنے والے افراد گندم کے آٹے کو چنے کے آٹے سے بدل کر زیادہ کھانے کے عمل کو محدود کر سکتے ہیں جس کے نتیجے میں یقینی طور پر موٹاپا کم ہوگا۔
تاہم، ماہرین نے خبردار کیا ہے کہ صرف آٹے کی تبدیلی کافی نہیں ، بہتر صحت کےلیے فعال رہنا اور صحت مند غذا انتہائی ضروری ہوتی ہے۔
ناروچ میں قائم ایک تحقیقی سینٹر کواڈرم انسٹیٹیوٹ اور کنگز کالج لندن کے محققین نے گندم کے آٹے کے بجائے خلیاتی چنے کے آٹے سے بریڈ بنایا۔
یہ تحقیق اپنی نوعیت کی پہلی تحقیق ہے جس میں اس نئے جزو کا معائنہ کیا گیا۔روایتی انداز سے پیسے جانے والے چنے، دالیں اور پھلیوں کے آٹےمیں صحت کے ضروری فائبر کے سانچے ٹوٹ جاتے ہیں۔ لیکن اس تحقیق میں استعمال کیا گیا چنے کاآٹا ایک نئے طریقے سے پیسا گیا جس سے اس کے فائبر اسٹرکچر محفوظ رہے۔
سائنس دانوں کے مطابق یہ طریقہ کار آٹے پر مشتمل اضافی صحت والی غذاؤں کی فراہمی کو یقینی بناتا ہے۔
مطالعے میں سائنس دانوں نے 18 سے 45 سال کے درمیان 20 افراد کو تین قسم کے بریڈ رول کھلائے۔ ایک بریڈ رول گندم کے سفید آٹے سے بنایا گیا جبکہ دوسری اور تیسری قسم میں چنے کے آٹے کی مقدار بالترتیب 30 اور 60 فی صد رکھی گئی۔
امیریکن جرنل آف کلینکل نیوٹریشن میں شائع ہونے والی تحقیق میں یہ بات سامنے آئی کہ جنہوں نے خصوصی چنے کے آٹے سے بنی بریڈ کھائی تھی ان کے خون میں اطمینان کے ہارمونز کی مقدار واضح طور پر زیادہ تھی۔
سائنس دانوں کے مطابق یہ ہارمون پیٹ سے دماغ کو سگنل بھیجتے ہیں جس سے لوگ بھرا پیٹ محسوس کرتے ہیں، جس کا مطلب ہے کہ تحقیق میں چنے کے آٹے سے بنے بریڈ کھا کر شرکاء نے کم بھوک محسوس کی۔