لاہور: (ویب ڈیسک) پاکستانی ٹیلی ویژن کی معروف اداکارہ حبا بخاری نے کہا ہے کہ سسرال ہو یا والدین کا گھر، شادی شدہ زندگی میں رشتوں میں توازن برقرار رکھنا چاہیے۔
تفصیلات کے مطابق اداکارہ حبا بخاری نے ایک یوٹیوب چینل کو انٹرویو دیتے ہوئے کہا کہ والدین کا انسان کی زندگی میں ایک اہم مقام ہوتا ہے اور یہ کوئی دوسرا نہیں لے سکتا، اسی طرح شوہر کے حوالے سے جو رشتے بالخصوص ساس سسر وغیرہ کا اپنا ایک مرتبہ اور اہمیت ہوتی ہے، ہر رشتے اور تعلق کی ایک اہمیت ہے تاہم کوئی رشتہ دوسرے کی جگہ نہیں لے سکتا۔
حبا بخاری کا کہنا تھا کہ شادی شدہ زندگی میں اہم بات یہ ہے کہ آپ ان رشتوں میں توازن کو برقرار رکھیں۔
انہوں نے بتایا کہ انکی ساس نہایت ہی نفیس اور ساتھ دینے والی خاتون ہیں، ان کے اپنے والدین نے ہمیشہ اس بات پر زور دیا کہ خاندان کے ارکان کی اہمیت ہوتی ہے۔

لاہور: (ویب ڈیسک) پاکستانی اداکارہ انعمتا قریشی نے اپنے سسرالیوں پر ناروا سلوک کے الزامات عائد کر دیئے۔
انعمتا قریشی نے انسٹا گرام پر متعدد سٹوریز پوسٹ کیں جس میں انہوں نے انکشاف کیا کہ ان کے خاوند سارنگ کی والدہ اور بہن سمیت رشتے دار ان کے ساتھ نامناسب رویہ اختیار کرتے ہیں جسے وہ بارہا نظر انداز کردیتی ہیں۔
اداکارہ کی جانب سے اپنی ساس پر سنگین نوعیت کے لگاتے ہوئے کہا گیا ہے کہ ان کی ساس انہیں برا کہنے اور بے عزت کرنے کا کوئی موقع ہاتھ سے نہیں جانے دیتیں، ان کی ساس اس سوچ کی مالک ہیں جو اپنی بہوؤں پر حکمرانی کے خواب دیکھتی ہیں اور انہیں آزادانہ زندگی گزارنے کا حق نہیں دیتیں۔
انہوں نے یہ بھی بتایا کہ میری ساس مجھے گزشتہ کئی عرصے سے جسمانی و زبانی تشدد کا نشانہ بنارہی ہیں جب کہ ان کی بہن فرحین قاضی نے میری والدہ پر تشدد کیا جس سے ان کا پاؤں فریکچر ہو گیا۔
انعمتا قریشی نے انکشاف کیا کہ ان کے شوہر کام کے سلسلے میں گھر سے دور ہوتے ہیں اس دوران ان کی ساس ان پر ظلم و ستم ڈھاتی ہیں، یہاں تک کہ انہیں کھانے تک کو نہیں دیتیں اور ساس کی وجہ سے انہیں بھوکا رہنا پڑتا ہے، وہ راشن کی سب چیزیں ان سے چھپائے رکھتی ہیں۔
انسٹا گرام سٹوری پر اداکارہ نے کہا کہ ان کی ساس کا کہنا ہے کہ میں ایک اداکارہ ہوں اس لیے میرے ساتھ گھر نہیں بسایا جا سکتا۔
اپنے شوہر سے متعلق انعمتا نے کہا کہ سسرالیوں کے برے سلوک کے برعکس اس سارے معاملے میں شوہر ان کا ساتھ دیتے ہیں اور وہی ان کی طاقت بنے ہوئے ہیں۔
تاہم اداکارہ نے اپنی سٹوریز میں مداحوں سے اپنے مسائل حل ہونے کے لیے دعاؤں کی درخواست بھی کی۔
واضح رہے کہ انعمتا قریشی نے جنوری 2020 میں دیرینہ دوست سارنگ قاضی سے شادی کی تھی، ان کے ہاں شادی کے دو سال بعد جنوری 2022 میں بیٹے سائرس کی پیدائش ہوئی تھی۔

لاہور: (ویب ڈیسک) پاکستان کی معروف اداکارہ صباء قمر نے سپر ہٹ بالی ووڈ فلمیں ٹھکرانے کا انکشاف کیا ہے۔
پاکستانی فنکاروں کی صلاحیتوں کی ہر دور میں دنیا قدردان رہی ہے، ہمارا ڈرامہ ہو یا فلمیں، پاکستانی اداکاروں کی پرفارمنس کو ہر ملک میں پسند کیا جاتا ہے، یہ بات ریکارڈ پر موجود ہے کہ کئی بھارتی اداکار اعتراف کرتے ہیں کہ انہوں نے پاکستانی ڈراموں کو دیکھ کر ہی اداکاری سیکھی ہے۔
سرمائے کے حجم کے اعتبار سے بالی ووڈ کی انڈسٹری بہت بڑی ہے اور بیشتر بھارتی فلم ساز چاہتے ہیں کہ وہ پاکستان کے باصلاحیت اداکاروں کو اپنی فلموں میں کاسٹ کریں، تاہم پاکستانی فنکاروں نے جب بھی بھارتی فلموں میں کام کیا ہے تو انہوں نے اپنے قد کو اونچا رکھتے ہوئے ہی فلموں کا انتخاب کیا ہے۔
فن اور امن کے فروغ کے لیے پاکستانی فنکار ہمیشہ سرگرم رہتے ہیں، تاہم بہت سے پاکستانی فنکار ایسے ہیں جنہوں نے بالی ووڈ کی بڑی پیشکش چھوڑ دیں۔
پاکستانی فلموں اور ڈراموں کی سپر سٹار صباء قمر چھوٹی سکرین سے بڑے پردے تک بھرپور اداکاری کی صلاحیتیں دکھاتی آئی ہیں، صباء کی اداکاری میں جذبات اس قدر نمایاں دکھائی دیتے ہیں کہ ناظرین ان کے ہر کردار میں کھو جاتے ہیں۔
صباء کو ایک نہیں بلکہ متعدد بار بالی ووڈ فلموں کی پیشکش ہوئی، صبا قمر کو بھارتی اداکار سیف علی خان کے ساتھ فلم ’’لو آج کل‘‘، ابھیشیک بچن کے ساتھ فلم ’’دلی 6‘‘ اور ایکتا کپور کی فلم میں عمران ہاشمی کے ساتھ کام کرنے کی پیشکش کی گئی، تاہم صبا نے ان تمام فلموں کو ٹھکرا دیا تھا۔
معروف ادکارہ صباء قمر کا موقف تھا کہ ان کی پہلی ترجیح ہمیشہ پاکستانی شوبز انڈسٹری رہی ہے۔
صباء نے کہا ہے کہ ان کی سوچ یہی تھی کہ اگر انہیں بالی ووڈ کے سپرسٹارز جیسے کسی ’’خان‘‘ یا ’’کپور‘‘ کے ساتھ کام کی پیشکش کی جاتی تو وہ اسے قبول کرتیں۔
یاد رہے کہ 2017ء میں صبا نے بھارتی اداکار عرفان خان کے ساتھ فلم ’’ہندی میڈیم‘‘ میں شاندار اداکاری کی تھی، اس فلم میں صباء کی اداکاری کو اس قدر پسند کیا گیا کہ بھارت سے انہیں متعدد فلموں کی پیشکش ہوئی تاہم پاکستان اور بھارت کے درمیان حالات کو دیکھتے ہوئے صبا نے کسی بالی ووڈ فلم ساز کی پیشکش قبول نہیں کی۔