لاہور: (خبریں ڈیجیٹل) پاکستانی شوبز انڈسٹری کی جانی پہچانی اور خوبرو اداکارہ انمول بلوچ نے ڈراموں کے بعد فلمی دنیا میں قدم رکھنے کی تیاری کر لی۔

اپنے ایک حالیہ انٹرویو میں فلم انڈسٹری جوائن کرنے کے حوالے سے بات کرتے ہوئے اداکارہ انمول بلوچ نے کہا کہ پہلے اس سلسلے میں کچھ تذبذب کا شکار تھی لیکن اب ذہنی طور پر فلم کیلئے تیار ہوں، اب زیادہ انتظار نہیں کرنا پڑے گا۔

فلم میں آئٹم نمبر کے حوالے سے ان کا کہنا تھا کہ یہ میں کبھی بھی نہیں کروں گی کیونکہ ہمارے ملک میں اسے پسند نہیں کیا جاتا۔

انہوں نے مزید کہا کہ پاکستانی ڈراموں یا تو خواتین بہت رو رہی ہیں، یا پھر بہت ہی بری ہیں، اس وقت جتنے بھی سکرپٹ آرہے ہیں ان میں ایک ہی طرح کی کہانیاں ہیں، مصنفین کو چاہیے کہ وہ سکرپٹ کو ذرا تبدیل کریں۔

لاہور: (خبریں ڈیجیٹل) پاکستانی شوبز انڈسٹری کی خوبصورت جوڑی ایمن خان اور منیب بٹ کے ہاں دوسری بیٹی کی پیدائش ہوئی ہے جس کا نام بھی منظر عام پر آ گیا ہے۔

اداکارہ ایمن کی بہن منال خان نے فوٹو اینڈ ویڈیو شیئرنگ ایپ انسٹاگرام پر ایک سٹوری شیئر کی ہے جو گلابی بیک گراؤنڈ پر مبنی ایک پوسٹ پر مشتمل ہے۔

مذکورہ سٹوری میں منال خان نے ایمن خان کے گھر میں دوسری بیٹی کی آمد کی تصدیق کرتے ہوئے لکھا ہے کہ 7 اگست کی رات 3 بج کر 4 منٹ پر امل کی فیملی میں ایک نئے مہمان کا اضافہ ہوا ہے۔

انہوں نے مزید لکھا کہ ننھی پری کا نام مرال منیب رکھا ہے جس نے ہمارے دلوں کو خوشی اور پیار سے بھر دیا ہے۔

لاہور: (خبریں ڈیجیٹل) اداکارہ انمول بلوچ نے کہا ہے کہ میں واش روم میں جا کر روتی تھی، کہتی تھی کہ مجھے یہ کام نہیں کرنا لیکن اگلے دن خود ہی تیار ہو کر شوٹ پر چلی جاتی تھی کہ آج ڈانٹ نہیں پڑے گی، ایسے کرتے کرتے میں آخر سیکھ گئی۔

اپنے ایک انٹریو میں انمول بلوچ نے بتایا کہ میں نے اداکاری کی کوئی تربیت حاصل نہیں کی، نہ کبھی سکول یا کالج کے ڈرامے میں شریک ہوئی لیکن مجھے اداکاری کا شوق تھا۔

اداکارہ نے بتایا کہ میں نے فیس بک پر آئی ڈی بنائی اور اس پر ایکٹر کا عنوان دے کر کچھ سیلفیز لگا دیں لیکن اس وقت تک میرے پاس کوئی کام نہیں تھا، ڈائریکٹر محسن مرزا نے مجھے کال کی اور کہا کہ میرا ایک پراجیکٹ چل رہا ہے، اس میں ایک کردار ہے اور مجھے ایسا لگتا ہے کہ وہ آپ کرسکتی ہیں۔

اداکارہ کا کہنا تھا کہ میں نے سوچا پتا نہیں کون ہیں، مذاق کر رہے ہیں، میں نے پھر ان کی پروفائل دیکھی، انہوں نے کافی اچھے اچھے پراجیکٹس کیے ہوئے تھے، میں نے امی سے پوچھا تو انہوں نے کہا کہ نہیں نہیں، کیا ہو گیا ہے تمہیں۔

انمول نے بتایا کہ والدہ کی مخالفت کے باوجود میں نے محسن مرزا سے رابطہ کیا اور پوچھا کہ کہاں آنا ہے، جس پر جواب ملا کہ گھر آجائیں، میں تھوڑا نروس ہوئی کیونکہ شوٹ کیلئے تو آفس بلانا چاہیے تھا، اس پر محسن مرزا نے کہا کہ بیٹا میرے گھر میں شوٹ بھی ہوتا ہے اور آگے جو پراجیکٹ کر رہا ہوتا ہوں اس کی سکرپٹ ریڈنگ بھی ہوتی ہے، آپ یہاں آجاؤ۔

ان کا کہنا تھا کہ اس کے بعد میں والدہ کو لے کر ان کے گھر چلی گئی، بس وہاں سے یہ سلسلہ شروع ہوا اور محسن مرزا نے مجھے ایک کردار دیا، اس کے بعد میں نے عرفان اسلم کا ڈرامہ سیریل “کم بخت تنو” کیا، اس میں میرا چھوٹا کردار تھا۔

انہوں نے انکشاف کیا کہ جب کام شروع کیا تو بہت سارے ڈائریکٹرز سے بہت ساری ڈانٹ کھائی اور باتیں بھی سنیں کہ صرف اچھی شکل ہونے سے ایکٹر نہیں بن جاتے، ایکٹر کیلئے ایکٹنگ آنا بھی ضروری ہے، تم سے نہیں ہوگا۔

لاہور: (خبریں ڈیجیٹل) پاکستانی فلم انڈسٹری کی معروف اداکارہ میرا نے کہا ہے کہ میں ملک چھوڑ کر جانے والے لوگوں کو ناکام سمجھتی ہوں۔

ایک انٹرویو میں میزبان نے اداکارہ میرا سے سوال کیا کہ پاکستان کو مشکل حالات سے نکالنے کیلئے وہ کیا کریں گی؟، جس کے جواب میں میرا نے کہا کہ ملک کے حالات بہتر کرنا بہت آسان ہے، مگر ملک چھوڑنا اس کا حل نہیں ہے۔

انہوں نے بات جاری رکھتے ہوئے کہا کہ اگر یہی حل ہوتا ہے تو میں پہلے ہی ملک چھوڑ چکی ہوتی کیونکہ میرے پاس امریکہ کی شہریت بھی ہے۔

بالی ووڈ میں فلموں کے حوالے سے بات کرتے ہوئے میرا نے انکشاف کیا کہ شاہ رخ خان کی فلم ’جب تک ہے جان‘ کترینہ سے پہلے مجھے آفر ہوئی تھی تاہم لندن کا ویزا نہیں ملا اس لیے میں فلم نہ کر سکی۔