اسلام آباد: (ویب ڈیسک) وزیر داخلہ رانا ثنا اللہ نے چیئرمین پی ٹی آئی کو مشورہ دیتے ہوئے کہا ہے کہ عمران خان ایک ماہ جیل میں رہ کر دیکھ لیں پھر فیصلہ کریں جیل بھرنی ہے یا خالی کرنی ہے۔ان کا کہنا تھا کہ عمران خان نے جتنے پروپیگنڈے کیےکسی ایک کا ثبوت نہیں دیا، عمران خان نے امریکی خط کے معاملے پر بھی جھوٹ بولا، اب عمران خان اپنے قتل کی سازش کا الزام لگا رہے ہیں۔
نجی ٹی وی کے پروگرام میں بات کرتے ہوئے راناثنا اللہ نے کہا کہ ان کی کوشش ہے کہ عمران خان کو اسی جیل میں رکھیں جس میں انہیں رکھا گیا تھا، جن کو ضرورت ہے ان کو جیل میں رکھیں گے تاکہ ان کو پتا چلے کہ جیل ہوتی کیا ہے، جن کو ہمیں جیل میں رکھنا ہے ان کورکھیں گے۔ وزیر داخلہ کا کہنا تھا اعظم سواتی نے ٹوئٹ کیا جس پر ان کے خلاف مقدمہ درج کیا گیا، شیخ رشید کے خلاف جعلی مقدمہ درج نہیں کیا گیا، جو شیخ رشید نےکہا اس پر ان کے خلاف مقدمہ درج کیا گیا، شیخ رشید حوصلہ پیدا کریں۔

پشاور: (ویب ڈیسک) چیف سیکرٹری خیبرپختونخوا امداد اللہ بوسال نے تمام ڈپٹی کمشنرز کو اپنے اضلاع میں ضمنی اور عام انتخابات کے لیے اقدامات یقینی بنانے کی ہدایت کر دی۔
نئے تعینات چیف سیکرٹری خیبرپختونخوا امداد اللہ بوسال کے زیرصدارت اجلاس ہوا، اجلاس میں امن و امان کے قیام اور ضمنی و عام انتخابات کے لئے تیاری زیر غور لائی گئی، انتظامی سیکرٹریز، ڈویژنل کمشنرز اور ڈپٹی کمشنرز اجلاس میں شریک ہوئے۔
اجلاس کے دوران چیف سیکرٹری نے کہا کہ صوبے میں آٹے اور فرٹیلائزر کی حکومتی نرخوں پر دستیابی کو یقینی بنایا جائے، امن و امان کے لئے انٹیلی جنس کمیٹیوں کے اجلاس باقاعدگی سے منعقد کیے جائیں۔
امداد اللہ بوسال نے کہا کہ ڈپٹی کمشنرز اپنے فرائض ایمانداری اور غیر جانبداری کے ساتھ سر انجام دیں، الیکشن کمیشن کی طرف سے نگران حکومت کے لئے ضابطہ اخلاق پر عمل درآمد یقینی بنایا جائے۔
اجلاس میں چیف سیکرٹری نے تمام ڈپٹی کمشنرز کو ماہ رمضان سے قبل اپنی تیاریاں مکمل کرنے کی بھی ہدایت کی۔

سیالکوٹ: (ویب ڈیسک) ڈکیتی کےد وران مزاحمت پر ڈاکوؤں نے فائرنگ کرکے نوجوان کو قتل کردیا۔
افسوسناک واقع تھانہ ستراہ کے علاقہ ستوکی میں پیش آیا جہاں دوران ڈکیتی مزاحمت پر ڈاکوؤں کی فائرنگ سے 24سالہ نوجوان جاں بحق ہوگیا، مقتول کی شناخت سونو مسیح کے نام سے ہوئی۔
اطلاع ملتے ہیں پولیس اور ریسکیو ٹیمیں جائے وقوعہ پر پہنچ گئیں، ریسکیو حکام نے نعش کو متعلقہ پولیس کے حوالے کردیا، جبکہ پولیس نے رپورٹ درج کرکے ملزم کی تلاش شروع کردی۔

لاہور: (ویب ڈیسک) خانیوال میں کاؤنٹر ٹیررازم ڈیپارٹمنٹ (سی ٹی ڈی) کا دہشت گردوں سے مقابلہ، فائرنگ کے تبادلے میں انتہائی مطلوب دہشت گرد، کالعدم تنظیم کا اہم کمانڈر عرفان اللہ ہلاک ہو گیا۔
سی ٹی ڈی کے مطابق عرفان اللہ راولپنڈی کار دھماکے کا ماسٹر مائنڈ تھا، ہلاک دہشت گرد ملک بھر میں ایف سی کے کئی جوانوں کی شہادت میں بھی ملوث تھا، حکام کا کہنا ہے کہ عرفان اللہ کالعدم تنظیم کا اہم کمانڈر تھا، مفرور ہونے والے 2 سے 3 دہشت گردوں کی تلاش جاری ہے۔
حکام کے مطابق سی ٹی ڈی اور دہشت گردوں کے درمیان 20 منٹ تک فائرنگ کا تبادلہ ہوا، مبینہ دہشت گرد اپنے 3 ساتھیوں کے ہمراہ حساس ادارے پر حملے کی منصوبہ بندی کر رہا تھا، ہلاک دہشت گرد عرفان اللہ کے قبضے سے کلاشنکوف، دستی بم اور دیگر سامان برآمد ہوا۔

واشنگٹن: (ویب ڈیسک) امریکا نے دہشتگردی کے خلاف جنگ میں پاکستان کا ساتھ دینے کا عزم کرتے ہوئے کہا ہے کہ پاکستان دہشت گردی کے خلاف امریکا کا اہم شراکت دار رہے گا۔
امریکی محکمہ خارجہ کے ترجمان نیڈ پرائس نے صحافیوں سے گفتگو کرتے ہوئے کہا کہ امریکا دہشت گردی کے خلاف جنگ میں پاکستان کے ساتھ کھڑا ہے کیونکہ اس حوالے سے پاکستان امریکا کا اہم شراکت دار ہے، دہشت گردی کے خاتمے کے حوالے سے امریکا پاکستان کو ہرطرح کی مدد فراہم کرے گا، ہم کسی بھی دہشت گرد حملے کی شدید الفاظ میں مذمت کرتے ہیں۔
نیڈ پرائس نے کہا کہ پشاور حملے کے نتیجے میں سینکڑوں بے گناہ شہریوں کے ساتھ ساتھ سرکاری ملازمین، ایسے افراد ہلاک ہوئے جنہوں نے اپنے ہم وطن پاکستانی شہریوں کی حفاظت کیلئے اپنی زندگیاں وقف کر رکھی تھیں، دہشت گردی ایک لعنت ہے جو پاکستان، بھارت اور افغانستان کو متاثر کر رہی ہے اور یہی چیز ہے جس پر ہم خطے میں توجہ مرکوز کر رہے ہیں۔
امریکی محکمہ خارجہ کے ترجمان نے مزید کہا کہ جب پاکستان کی بات آتی ہے تو وہ امریکا کا اہم شراکت دار ہے، ہم نے حال ہی میں ان سکیورٹی خطرات کے پیش نظر پاکستان کے ساتھ کھڑے ہونے کے اپنے عزم بارے بات کی ہے۔

لاہور: (ویب ڈیسک) سابق وزیر مملکت فرخ حبیب نے کہا ہے کہ گزشتہ 10 ماہ سے بنیادی انسانی حقوق کو معطل کر دیا گیا ہے، امپورٹڈ حکومت نے آئین و قانون کی دھجیاں اڑا دی ہیں۔
لاہور میں میڈیا سے گفتگو کرتے ہوئے انہوں نے کہا کہ قانون و آئین کی حاکمیت کیلئے وکلا برادری عمران خان کے ساتھ ہے، پاکستان کے وکلا نے ہمیشہ آئین و قانون کی بالادستی میں اہم کردار ادا کیا، فاشسٹ حکومت صحافیوں کے خلاف بھی مقدمات درج کر رہی ہے۔
تحریک انصاف کے رہنما نے مزید کہا کہ عمران خان پر قاتلانہ حملہ کیا گیا، فواد چودھری، شیخ رشید کو گرفتار کیا گیا، میرے خلاف ڈکیتی کی جعلی ایف آئی آر درج کی گئی، آج ملتان میں عامر ڈوگر کو گرفتار کیا گیا، اعظم سواتی کو دروازے توڑ کر حراست میں لیا گیا۔
سابق وزیر مملکت فرخ حبیب نے کہا نیب ترمیم کر کے این آر او ٹو لیا گیا، شہباز شریف اور ان کے بیٹوں کے خلاف 16 ارب کا کیس تھا، آج زرداری اور شریف خاندان کے منشی اسحاق ڈارکے کیس معاف ہو رہے ہیں، ملک کو تباہی کے دہانے لاکھڑا کر دیا ہے۔