لاہور: (ویب ڈیسک) سابق وزیر مملکت فرخ حبیب نے کہا ہے کہ گزشتہ 10 ماہ سے بنیادی انسانی حقوق کو معطل کر دیا گیا ہے، امپورٹڈ حکومت نے آئین و قانون کی دھجیاں اڑا دی ہیں۔
لاہور میں میڈیا سے گفتگو کرتے ہوئے انہوں نے کہا کہ قانون و آئین کی حاکمیت کیلئے وکلا برادری عمران خان کے ساتھ ہے، پاکستان کے وکلا نے ہمیشہ آئین و قانون کی بالادستی میں اہم کردار ادا کیا، فاشسٹ حکومت صحافیوں کے خلاف بھی مقدمات درج کر رہی ہے۔
تحریک انصاف کے رہنما نے مزید کہا کہ عمران خان پر قاتلانہ حملہ کیا گیا، فواد چودھری، شیخ رشید کو گرفتار کیا گیا، میرے خلاف ڈکیتی کی جعلی ایف آئی آر درج کی گئی، آج ملتان میں عامر ڈوگر کو گرفتار کیا گیا، اعظم سواتی کو دروازے توڑ کر حراست میں لیا گیا۔
سابق وزیر مملکت فرخ حبیب نے کہا نیب ترمیم کر کے این آر او ٹو لیا گیا، شہباز شریف اور ان کے بیٹوں کے خلاف 16 ارب کا کیس تھا، آج زرداری اور شریف خاندان کے منشی اسحاق ڈارکے کیس معاف ہو رہے ہیں، ملک کو تباہی کے دہانے لاکھڑا کر دیا ہے۔

اسلام آباد: (ویب ڈیسک) آئی ایم ایف وفد نے وزیراعظم شہباز شریف سے ملاقات کی اس موقع پر وزیر خزانہ، معاون خصوصی خزانہ، وزارت خزانہ، وزارت توانائی کے حکام بھی موجود تھے۔
ملاقات کے دوران وزیراعظم نے آئی ایم ایف وفد سے معاشی صورتحال پر بات چیت کی، اس کے علاوہ معاہدے پر بھی تبادلہ خیال کیا گیا، وزیراعظم شہباز شریف نے وفد کو پروگرام مکمل کرنے اور اہداف پر عملدرآمد کی یقین دہانی کرا دی۔
ذرائع کے مطابق حکومت نے آئی ایم ایف وفد کو اعتماد بحال کرنے کیلئے ضروری اقدامات کی بھی یقین دہانی کروائی، وزیرخزانہ نے وفد کو معاشی صورتحال سے آگاہ کیا جبکہ توانائی حکام نے وزیراعظم کو نظرثانی شدہ گیس مینجمنٹ پلان پیش کیا۔

اسلام آباد: (ویب ڈیسک) پاکستان تحریک انصاف کے رہنما اور سابق وفاقی وزیر شاہ محمود قریشی نے کہا کہ آئین واضح ہے 90 روز سے ایک گھنٹہ بھی الیکشن آگے نہیں ہو سکتے۔
انہوں نے کہا کہ ملک میں امن عامہ کی صورتحال کا جواز دیا جا رہا ہے، اگر ضمنی الیکشن کے لیے امن عامہ درست ہے تو پھرعام انتخابات کے لیے کیوں نہیں؟ دوسرا جواز وسائل کی کمی کا بتایا جا رہا ہے، گزشتہ 9 ماہ سے حالات مزید خراب ہو رہے ہیں۔
شاہ محمود قریشی کا کہنا تھا کہ پابندی کے باوجود افسروں کی تبدیلیاں کی جا رہی ہیں، ضابطہ اخلاق کے تحت تبادلے نہیں کیے جا سکتے، تعجب کی بات ہے تبادلے ہو رہے ہیں اور سب خاموش ہیں، سوال یہ ہے کہ تبادلے کیا من پسند نتائج حاصل کرنے کے لیے کیے جا رہے ہیں۔
انہوں نے کہا کہ ہمارے پاس لیگل آپشن اور پرامن احتجاج کا آپشن ہے، ہم نے لیگل اور پرامن احتجاج کا آپشن استعمال کیا، عمران خان کو پرامن احتجاج کے دوران نشانہ بنایا گیا، عمران خان کی جے آئی ٹی کو بند کر دیا گیا ہے۔
پی ٹی آئی رہنما نے کہا کہ وفاق میں رہ کر ہم مزاحمت کر سکتے تھے، وفاقی حکومت الیکشن میں تاخیر کے حربے استعمال کر رہی ہے، اگر پنجاب میں ہم حکومت نہ چھوڑتے تو ہمیں مہنگائی کا ذمہ دار ٹھہرایا جانا تھا، پنجاب میں اگر ہماری حکومت ہوتی تو پکڑ، دھکڑ نہ ہوتی، ہم چاہتے ہیں عوام کو الیکشن میں فیصلہ کرنے دیا جائے۔
شاہ محمود قریشی نے کہا کہ اداروں پر بہت بڑی ذمہ داری آگئی ہے، اسٹیبلشمنٹ کو اندرونی و بیرونی چیلنجز کا پتا ہے، اسٹیبلشمنٹ کو اپنی ذمہ داری کا مظاہرہ کرنا ہو گا، آئین کا تحفظ عدلیہ کی ذمہ داری ہے، امید کرتے ہیں آئین کی پامالی پرعدلیہ آواز اٹھائے گی، تیسرا ادارہ الیکشن کمیشن ہے جس کا کام شفاف الیکشن کرانا ہے۔
انہوں نے کہا کہ الیکشن کمیشن کو شفاف الیکشن کرانا ہو گا تاکہ کوئی آواز نہ اٹھا سکے، نگران سیٹ اپ کا کام الیکشن کرانا ہے من پسند نتائج حاصل کرنا نہیں، انہوں نے کہا کہ تحریک انصاف اور ذی شعور سیاست دان، دانشور طبقہ ملک کو دلدل سے نکال سکتا ہے، تحریک انصاف دور میں کوئی سیاسی قیدی نہیں بنائے گئے، اگر کوئی جیل میں گیا توماضی کے کیسز کی وجہ سے گیا۔
سابق وفاقی وزیر کا کہنا تھا کہ نیب ترمیم کے بعد نیب کا ادارہ بے معنی ہو گیا ہے، اس وقت اپوزیشن لیڈرسرکارکا نمائندہ ہے، راجہ ریاض تحریک انصاف کی ٹکٹ پر منتخب ہوا انہیں تو مستعفی ہوجانا چاہیے تھا۔
انہوں نے کہا کہ آئین کےخلاف کوئی کام کریں گے تو غلط روایت ہو گی، سیاسی انتقام یا پولیٹیکل انجنیئرنگ غلط ہے، لیگل پراسس کے ذریعے ہونے والی کارروائی میں فرق ہوتا ہے۔
شاہ محمود قریشی کا نوازشریف کیس سےمتعلق سوال کے جواب میں کہنا تھا کہ توشہ خانہ میں باقی لوگوں کا ریکارڈ پیش کیوں نہیں کیا جا رہا، توشہ خانہ کا کیس ہمیں منیج دکھائی دے رہا ہے، عدالت کے کہنے کے باوجود تمام جماعتوں کے خلاف یکساں سلوک نہیں کیا جا رہا، لوگ ساری چیزوں کو نوٹ کر رہے ہیں۔

پشاور: (ویب ڈیسک) امیر جماعت اسلامی سراج الحق نے کہا ہے کہ امریکا ہمیں کمزور کرنا چاہتا ہے تاکہ ایٹمی اثاثوں کو اپنے قبضے میں کر لے، اس کام کیلئے انہوں نے مصنوعی قیادت مسلط کی ہے۔
پشاور میں گفتگو کرتے ہوئے انہوں نے کہا دھماکا ہوتا ہے تو حکمران گھروں کے دیوار اونچے کرنے میں لگ جاتے ہیں، سکیورٹی اداروں کے پاس کس چیز کی کمی ہے جو تحفظ دینے میں ناکام ہیں، اگر آپ امن قائم نہیں کرسکتے تو صاف کہہ دو، لوگ مر رہے ہیں اور یہ لوگ آپس میں وزارتیں بانٹ رہے ہیں۔
سراج الحق نے کہا کہ جنرل فیض کے کئے گئے معاہدے کے تحت خیبرپختونخوا میں امن برباد ہوا، دھماکوں میں صوبے کے عوام نے قربانیاں پیش کیں، وفاقی حکومت نے ہمیشہ یہاں عوام کے ساتھ سوتیلی ماں جیسا سلوک کیا، افغانستان حکومت کا پاکستان میں امن قائم کرنا دینی فرض نہیں؟۔
امیر جماعت اسلامی نے کہا کہ افغانستان کا دورہ کرنا خیبرپختونخوا کے عوام کی ضرورت ہے لیکن وہ نہیں کیا جا رہا، امریکا پاکستان اور افغانستان کی جنگ چاہتا ہے تاکہ وہ تماشا کر کے کاروبار شروع کر سکے، شرم کی بات ہے کہ خیبرپختونخوا میں آٹا مہنگا اور موت سستی ہے۔
انہوں نے مزید کہا کہ پاکستان کے عوام کا اعتماد اداروں اور عدالتوں پر نہیں، ہم نے کون سا گناہ کیا ہے کہ خیبرپختونخوا بارود کا ڈھیر بنا ہوا، عمران خان، شہباز شریف اور آصف زرداری اس کا ذمہ دار ہے، خیبر پختونخوا میں امن قائم ہونے تک ہم اسلام آباد میں بیٹھیں گے۔
سراج الحق نے کہا کہ پولیس کے جتنے شہداء ہیں ان کے بچوں کی کفالت جماعت اسلامی کرے گی، ہم شہداء کے بچوں کو این جی او اور بین الاقوامی اداروں کے رحم و کرم پر نہیں چھوڑیں گے، پنجاب اور خیبرپختونخوا کے لوگوں کے خون میں فرق کیوں ہے۔
امیر جماعت اسلامی نے مزید کہا تمام ضلعی اور تحصیل ہیڈ کوارٹر میں امن مارچ کریں گے، اگر امن قائم نہ کیا گیا تو حکومت کا گریبان اور ہمارا ہاتھ ہوگا، مسلم لیگ (ن) اور پی ٹی آئی کی حکومتوں میں مسننگ پرنسز کا کاروبار ہوا، پی ڈی ایم حکومت میں انہیں انصاف نہ ملا سکا۔