اسلام آباد: (ویب ڈیسک) وفاقی حکومت نے پاکستان تحریک انصاف (پی ٹی آئی) کے لانگ مارچ کے خلاف سپریم کورٹ میں پٹیشن دائرکرنےکا فیصلہ کیا ہے۔
ذرائع کے مطابق سپریم کورٹ میں پٹیشن علی امین گنڈا پور کی مبینہ آڈیو لیک کی بنیاد پر دائر کی جائےگی، مبینہ آڈیو لیک کے مطابق لانگ مارچ میں اسلحہ بردار لائے جا رہے ہیں جس سے خون خرابےکا خدشہ ہے۔
ذرائع کا کہنا ہےکہ پٹیشن میں سپریم کورٹ سےلانگ مارچ کے دوران ممکنہ خون خرابے سے آگاہ کیا جائےگا، حکومت کی جانب سے درخواست کی تیاری کا کام شروع کردیا گیا ہے اور جلد سپریم کورٹ میں پٹیشن دائر ہوگی۔
خیال رہے کہ وفاقی وزیر داخلہ رانا ثنا اللہ نے آج اسلام آباد میں پریس کانفرنس کے دوران پاکستان تحریک انصاف کے رہنما و سابق وفاقی وزیر علی امین گنڈا پور کی مبینہ آڈیو سنائی تھی جس میں مبینہ طور پر علی امین گنڈا پور ایک شخص سے بندوقیں اور بندے لانے کا کہہ رہے ہیں۔

لاہور: (ویب ڈیسک) پاکستان تحریک انصاف (پی ٹی آئی) کے رہنما فرخ حبیب نے وزیر اطلاعات مریم اورنگزیب کو علاج کروانے کا مشورہ دے دیا۔
پی ٹی آئی رہنما فرخ حبیب نے کہا کہ مریم اورنگزیب عمران فوبیا میں مبلا ہیں وہ اپنا علاج کروائیں ان کی تمام کابینہ مجرم ہے جسے چور دروازے سے مسلط کیا گیا ہے۔
سابق وزیر نے کہا کہ امپورٹڈ سرکار پہلے سائفر کو جھٹلاتی رہی اور پھر خود ہی ڈرامائی انداز میں اسے تسلیم کرلیا ہے سائفر پر سیاست عمران خان نے نہیں امپورٹڈ سرکار نے کی تھی۔
فرخ حبیب کا کہنا تھا کہ نااہل سرکار نے ملک کو پتھروں کے زمانے میں دھکیلنے میں کوئی کسر نہیں چھوڑی ہے۔
ان کا کہنا تھا کہ ترقی کرتی معیشت کو تباہ و برباد کرکے عوام پر مہنگائی کے پہاڑ توڑے گئے ہیں، عوام کا جینا دوبھر کرکے اب یہ چور ان کے غم و غصے سے نہیں بچ سکتے۔

کراچی: (ویب ڈیسک) افریقی ملک ایتھوپیاکی قومی ائیرلائنز نے 18 سال کے بعد ایک بار پھر پاکستان کے لیے اپنی پروازیں بحال کر دی ہیں۔
پاکستان سول ایوی ایشن اتھارٹی کے نوٹیفکیشن کے مطابق ایتھوپین ائیرلائنز 2004 سے پاکستان کے لیے معطل اپنی پروازیں ایک بار پھر بحال کر رہی ہے، ایتھوپین ایرلائنز عدیس ابابا اور کراچی کے درمیان ہفتہ وار دو پروازیں چلائےگی، ساتھ ہی ایتھوپین حکومت نے پاکستانیوں کے لیے ائیرپورٹ پر آن آرائیول ویزا کی سہولت بھی بحال کردی ہے۔
بعض پاکستانیوں کے ایتھوپیا میں جعلی موبائل فونز اور پرفیومز فروخت کرتے ہوئے پکڑے جانے کے بعد دو سال قبل ایتھوپیا کی حکومت نے آن آرائیول ویزا کی سہولت ختم کردی تھی، یہ سہولت اب پاکستانی سفیر کی کوششوں سے بحال ہوگئی ہے۔
پاکستان سول ایوی ایشن اتھارٹی کے نوٹیفکیشن میں ملکی ائیرپورٹس پر تعینات تمام متعلقہ اداروں سے کہا گیا ہےکہ وہ ایتھوپیا جانے والے مسافروں پر کڑی نظر رکھیں تاکہ مستقبل میں کسی بد مزگی سے بچا جاسکے۔

لاہور: (ویب ڈیسک) پنجاب حکومت نے کیپیٹل سٹی پولیس آفیسر (سی سی پی او) لاہور غلام محمود ڈوگر کی خدمات وفاق کو دینے سے انکار کردیا۔
ذرائع کے مطابق پنجاب کی جانب سے سی سی پی او کی خدمات واپس کرنے کیلئے تیسری بار انکار کیا گیا ہے۔
سیکرٹری سروسز پنجاب نے وفاق کو تحریری طور پر آگاہ کردیا ہے اور خط میں کہا گیا ہے کہ غلام محمود ڈوگرکو وزیراعلیٰ پنجاب صوبے میں رکھنا چاہتے ہیں۔
خیال رہے کہ گزشتہ روز وفاقی حکومت نے سی سی پی او لاہور غلام محمود ڈوگر کو تین دن میں رپورٹ کرنے کا حکم دیا تھا۔ لیٹر میں کہا گیا تھاکہ تبادلے کےاحکامات پر 3 روز میں عمل نہ کیا تو انضباطی کارروائی ہوگی۔
واضح رہے کہ گزشتہ دنوں سی سی پی او لاہور غلام محمود ڈوگر کے تبادلے پر وفاق اور پنجاب میں ٹھن گئی تھی اور وزیراعلیٰ پنجاب پرویز الٰہی نے غلام محمودڈوگرکو چارج چھوڑنے سے روک دیا تھا۔

اسلام آباد: (ویب ڈیسک) وفاقی وزیر داخلہ رانا ثناء اللہ نے پاکستان تحریک انصاف کے سینئر رہنما علی امین گنڈا پور کی مبینہ آڈیو لیک ہونے کے بعد کہا ہے کہ وفاقی دارالحکومت پر کسی صورت مسلح جتھے کو چڑھائی نہیں کرنے دیں گے۔ خیبرپختونخوا کے چیف سیکرٹری، آئی جی کو خبردار کرتا ہوں اس بات کا نوٹس لے، دونوں کو گرفتارکیا جائے۔ ایسے فسادیوں کے ساتھ کوئی مذاکرات نہیں ہوسکتے۔
نیوزکانفرنس کرتے ہوئے وفاقی وزیر داخلہ نے کہا کہ فتنہ مارچ قوم کو تقسیم اور فساد برپا کرنے کی سازش ہے، عمران خان نوجوانوں کو گمراہ کرنا چاہتے ہیں، گھرکے بھیدی کو عمران خان نے پارٹی سے نکال دیا، مارچ میں اپنے بندوں کی لاشیں گرا کے اداروں پرالزام لگائیں گے، عمران خان کو کوئی فکرنہیں کہ ملک کو کیا نقصان ہو سکتا ہے۔ آج آپ کے سامنے ایک ثبوت پیش کرنے جا رہا ہوں، عمران خان اسلام آباد میں صرف جلسہ کرنے نہیں کرنےآ رہا، سابق وزیرعلی امین گنڈا پور کی گفتگو کو نظر انداز نہیں کیا جا سکتا، علی امین گنڈا پورکی ایک نامعلوم شخص سے فون پر گفتگو ہوئی، علی امین گنڈا پوراس شخص سے پوچھتا ہے کیا پوزیشن اوربندوقیں کتنی ہیں۔
اپنی بات کو جاری رکھتے ہوئے رانا ثناء اللہ نے تحریک انصاف پر تنقید کرتے ہوئے کہا کہ اب یہ کس منہ سے کہہ رہا ہے کہ پرامن مارچ کررہا ہوں، اسے شرم آنی چاہیے، بندوقیں، بندے اسلام آباد، راولپنڈی کے بارڈر پر کس لیے لا رہا ہے؟ بندوقوں کے ساتھ کیا یہ امن کا پیغام پھیلائیں گے، اس سے ظاہرہوتا ہے یہ شیطانی مارچ اور فتنہ،فساد، لاشیں گرا کر ایک قومی سانحہ پیدا کرنا چاہتے ہیں، اپنے مقصد کے لیے ایک صحافی کی تصویروں کو کینٹینر پر استعمال کیا گیا، اب کوئی شک نہیں رہا یہ ملک کو فساد، فتنہ سے دو چار کرنا چاہتا ہے، اس فتنے کا سر ابھی سے کچلنا چاہیے ورنہ یہ قوم کو کسی حادثے سے دو چار کر دے گا، بطورِ وزیرداخلہ یہ میری ذمہ داری ہے، اگر ہم کوئی قدم اٹھاتے ہیں تو پھر یہ آوازیں نہیں آنی چاہیے کہ پُر امن احتجاج کی اجازت دی جانی چاہیے، یہ بندہ توآئین وجمہوریت کوتسلیم ہی نہیں کرتا۔
انہوں نے کہا کہ یہ کہتا ہے میں چھوڑوں گا نہیں، ہماری،اداروں کی ذمہ داری ہے، یا تو پی ٹی آئی والے مبینہ آڈیو گفتگو کو غلط ثابت کرے، اس کا فورنزک آڈٹ کرا لیتے ہیں، اگر یہ گفتگو درست ثابت ہوجاتی ہے تو ایکشن لینا درست ہے، ہم ہرقیمت پر دارالحکومت میں شہریوں کی تمام املاک کی حفاظت کو یقینی بنائیں گے، دارالحکومت پر کسی صورت مسلح جتھے کو چڑھائی نہیں کرنے دیں گے۔ خیبرپختونخوا کے چیف سیکرٹری، آئی جی کو خبردار کرتا ہوں اس بات کا نوٹس لے، دونوں افراد اس وقت خیبرپختونخوا میں موجود ہیں، گرفتارکیا جائے۔ اگر اس قسم کا کوئی گروہ اسلام آباد کی حدود میں داخل ہوا تو براہ راست آپ ذمہ دارہونگے، پنجاب کے چیف سیکرٹری، آئی جی سے کہوں گا عمران خان کے ساتھ مسلح لوگ موجود ہیں، گجرات سے اس قسم کے لوگوں کے شامل ہونے کی اطلاعات ہیں، گجرات میں بھی بندے جوڑے جارہے ہیں، چیف سیکرٹری،آئی جی پنجاب ایسے لوگوں کے خلاف فوری کریک ڈاؤن کریں۔
وفاقی وزیر داخلہ کا کہنا تھا کہ بدبخت شیطان اس ملک میں انارکی چاہتا ہے، چیف سیکرٹری، آئی جی پنجاب ایکشن لیں، وفاقی ادارے پوری طرح الرٹ ہیں آنے والے دنوں میں بھرپورایکشن لیں گے، کچھ لوگوں کواس نے گمراہ کیا ہوا ہے، وہی 10 سے 12 افراد کا ٹولہ ہر جگہ پہنچا ہوتا ہے، یہ وہی ٹولہ ہے جو جلسوں، لبرٹی چوک میں ہوتا ہے، لاہور کے شہریوں نے اس فتنہ مارچ کو بُری طرح مسترد کیا ہے، لاہور میں 8 سے 13 ہزارسے تعداد زیادہ نہیں بڑھی، انہی لوگوں کووہ اسلام آباد لیکرپہنچے گا، والدین سے اپیل ہے اپنے بچوں، عزیزوں کو سمجھائیں، والدین بچوں کو شیطانی،خونی مارچ میں حصہ لینے سے روکیں، ہم اپنا فرض پوری ذمہ داری سے نبھائیں گے کوئی کسرنہیں اٹھارکھیں گے۔
رانا ثناء اللہ نے کہا کہ قانون نافذ کرنے والے ادارے الرٹ ہیں، ہمیں پوری تسلی ہے علی یہ وہی بندہ ہے، ہمیں تو پتا ہے بندوقیں کہاں سے لے رہا ہے، یہ بڑا حساس معاملہ ہے، ہماری رپورٹس ہے یہ اس طرح کا سین بنائیں گے اور لوگوں کی لاشیں گرانے کا یہ لوگ کام کریں گے، لاشیں یہ گرائیں گے تو تصادم قانون نافذ کرنے والے اداروں سے ہو گا، عمران نیازی نے لاشیں گرانے کا پروگرام بنایا ہوا ہے، علی امین گنڈا پور اس وقت خیبرپختونخوا میں ہے اگراسلام آباد ہوتے تو گرفتار کر چکے ہوتے، کیا آپ جب کوئی واقعہ ہو گا تو پھر ان لوگوں کو روکیں گے، ہم پہلے ان کو روکیں گے، ایسی کسی سازش کو کامیاب نہیں ہونے دیں گے، اس بات کومیڈیا میں شیئرکرنا بھی ضروری تھا، وفاقی حکومت نے آئین وقانون کے مطابق ہی افسران کے خلاف کارروائی کرنی ہے، گجرات کی ایکٹویٹی میسج دے رہی ہے چودھری پرویزالہیٰ کے نوٹس میں ہو گا، وزیراعلیٰ پنجاب کو نوٹس لینا چاہیے، یہ ملک کو نقصان پہنچانے کے لیے ہرحربہ استعمال کریں گے۔
مذاکرات کے حوالے سے انہوں نے کہا کہ میری سربراہی میں 13 رہنماؤں کی کمیٹی بنائی گئی ہے، کمیٹی کا مقصد تمام صورتحال پر بات چیت کی جائے، وزیراعظم نے کہا کمیٹی سے رہنمائی لیکر ذمہ داری کو پورا کرونگا، 13رکنی کمیٹی میں تمام سینئرز لوگ موجود ہیں، کمیٹی کا مقصد فتنہ مارچ کے تمام معاملات کو رکھا جائے، یہ بندوقیں اکٹھی اورہم کیا ان سے مذاکرات کے لیے جائیں گے، دودن پہلے فواد چودھری نے خود مذاکرات کا کہا، ہماری طرف سے کہا گیا سیاست میں مذاکرات بہتر عمل ہوتا ہے، آج فواد چودھری کہتے ہیں یہ گھبراگئے ہیں، مریم اورنگزیب نے درست کہا ہماری طرف سے کوئی مذاکرات نہیں ہونگے، ایسے فسادیوں کے ساتھ کوئی مذاکرات نہیں ہوسکتے۔
انہوں نے مزید کہا کہ اسلام آباد کی حدود میں مسلح، غیر مسلح ہوٹلوں میں نہ ٹھہریں، اس حوالے سے سیکیورٹی مکمل الرٹ ہے، اگرکوئی بندہ پنجاب، خیبرپختونخوا کی حدود میں ہے تو وفاقی تحقیقاتی ادارے کسی بھی جگہ ایکشن کر سکتے ہیں، اس سے پہلے آئین وقانون کا تقاضا ہے صوبے کے چیف ایگزیکٹو کو پہلے کارروائی کا کہا جائے، مسلح جتھوں کوکسی قیمت پرمعاف اورکسی قسم کی کوئی رعایت نہیں دی جائے گی۔

اسلام آباد: (ویب ڈیسک) مشکل وقت میں چین نے ایک مرتبہ پھر پاکستان کیساتھ دوستی کا حق ادا کرتے ہوئے ہنگامی بنیادوں پر اضافی 50 کروڑ یوآن (6 کروڑ 89 لاکھ 41 ہزار 700 سے زائد امریکی ڈالر) امداد دینے کا فیصلہ کیا ہے۔
ذرائع کے مطابق وزیراعظم شہباز شریف کے اگلے ماہ چین کے دورے سے قبل چین نے بڑا فیصلہ کرتے ہوئے سیلاب زدہ علاقوں میں تعمیر نو کے لیے 50 کروڑ یوآن امداد دینے کا فیصلہ کیا ہے۔
ذرائع کا کہنا ہے کہ چین نے اضافی ایمرجنسی معاونت کی پیشکش سے پاکستان کو آگاہ کر دیا ہے، وزیراعظم شہباز شریف کے دورہ چین میں ایم او یو پر دستخط کئے جائیں گے ستمبر2022 میں چین نے پاکستان کیلئے 30 کروڑ یوآن دینے کا اعلان کیا تھا، تعمیر نو کیلئے چین کی مجموعی امدادی رقم بڑھ کر80کروڑ یو آن ہوجائے گی۔

اسلام آباد: (ویب ڈیسک) وفاقی وزیر داخلہ رانا ثناء اللہ لانگ مارچ میں پی ٹی آئی رہنما علی امین گنڈا پور اور نامعلوم شہری کی مبینہ بندے اور بندوقوں کی مبینہ آڈیو سامنے لے آئے۔
وفاقی وزیر رانا ثناء اللہ نے نیوز کانفرنس کے دوران ایک مبینہ آڈیو سامنے لے آئے، جس میں پاکستان تحریک انصاف کے رہنما علی امین گنڈا پور کسی نامعلوم شخص سے بات کر رہے ہیں۔
پی ٹی آئی رہنما اور سابق وفاقی وزیر علی امین گنڈا پور کی نامعلوم شخص سے بندوقیں اور بندے لانے کی آڈیو لیک کا متن!
نامعلوم شخص نے علی امین گنڈا پور سے پوچھا جی علی خان ، جس پر پی ٹی ائٓی رہنما نے کہا کہ صدر صاحب کیا پوزیشن ہے ؟ اس پر نامعلوم شخص کہتے ہیں سر پوزیشن تو اے ون ہے، آپ سنائیں، اس پر سابق وفاقی وزیر علی امین گنڈا پور کہتے ہیں، بندوقیں کتنی ہیں؟
اس پر نامعلوم شخص جواب میں کہتا ہے کہ بہت ہیں، علی امین گنڈا پور سوالیہ انداز میں پوچھتے ہیں لائسنس ہیں؟ جس پر سابق وفاقی وزیر کہتے ہیں بندے ہیں ؟ جس پر نامعلوم شخص کہتا ہے کہ بندے بھی جتنے چاہیں گے ہوں گے سر، اسی دوران پی ٹی آئی رہنما مزید کہتے ہیں اچھا! ہم یہاں کیمپ لگا رہے ہیں، ساتھ ہی قریب کالونی میں ، نامعلوم شخص کہتا ہے جی !
اسی دوران علی امین گنڈا پور کہتے ہیں یہاں قریب ترین جگہ کون سی ہے؟ آخر میں ؟ کون سی کالونی ساتھ لگ رہی ہے۔ نامعلوم شخص جواب دیتا ہے، ہمارے ہاں؟ اس پر پی ٹی آئی سینئر رہنما کہتے ہیں بارڈر پر ، بارڈر پر، اسلام آباد کے بارڈر پر، ٹول پلازے کے ساتھ لیفٹ سائیڈ پر، کون سی جگہ ہے، ٹاپ سٹی ہے یا کیپٹل ، اس پر نامعلوم شخص کہتے ہیں، ٹاپ بھی، کیپیٹل بھی ہے، بہت ساری ہیں، بتائیں
اس پر علی امین گنڈا پور کہتے ہیں، ٹاپ تو ایئر پورٹ پر ہے ناں، نامعلوم شخص جواب دیتا ہے ٹاپ تو ایئر پورٹ والی سائیڈ پر ہے ناں، میں نے پورا نقشہ بھیجا تھا آپ کو ۔
اس موقع پر علی امین گنڈا پور مزید کہتے ہیں وہ ملا ہوا ہے مجھے، وہ ہے میرے پاس، تیار ہوں، بس بندے اور سامان آپ رکھیں وہاں پر۔ اس پر نامعلوم شخص کہتا ہے سر کوئی مسئلہ نہیں ہے، انشاء اللہ، علی امین گنڈا پور کہتے ہیں، بس پھر رابطے میں ہیں، انشاء اللہ، نامعلوم شخص ، جی سر ، انشاء اللہ۔