اسلام آباد (خبریں ڈیجیٹل) عالمی مالیاتی فنڈ (آئی ایم ایف) سے معاہدے پر عملدرآمد کرتے ہوئے حکومت نے عوام کو بجلی کا دوسرا جھٹکا لگانے کی تیاری کر لی۔

ذرائع کے مطابق بجلی کے نرخ میں مزید 3 روپے فی یونٹ اضافہ کیا جائے گا، اضافہ کے بعد بجلی کی اوسط قیمت 29 روپے سے بڑھ کر 33 روپے فی یونٹ ہو جائے گی، اگر اس میں ٹیکسز بھی شامل کر لئے جائیں تو بجلی کا فی یونٹ ففٹی کراس کر کے 53 روپے ہونے کا امکان ہے۔

ذرائع نے بتایا ہے کہ حکومت نے بجلی 8 روپے فی یونٹ بڑھانے کی آئی ایم ایف کو یقین دہانی کرائی تھی، چند روز قبل بجلی 4 روپے 96 پیسے مہنگی کی گئی، اب 3 روپے ایک پیسے یونٹ بڑھائی جائے گی، حکومت بجلی کی قیمتوں میں اضافے کا ورکنگ پیپر نیپرا کو بھجوائے گی۔

ذرائع کا مزید کہنا ہے کہ نیپرا سے منظوری کے بعد قیمتوں میں اضافے کا نوٹی فکیش جاری کیا جائے گا، حکومت کو رواں مالی سال میں 3 ہزار 495 ارب روپے ریونیو کی ضرورت ہے۔

یاد رہے کہ گزشتہ روز حکومت کی جانب سے بجلی بلوں میں ٹی وی فیس کی طرز پر ریڈیو فیس کی وصول کا بھی اعلان کیا گیا ہے جس کے تحت صارفین کو ہر بل میں 15 روپے ریڈیو فیس بھی ادا کرنا ہوگی۔

لاہور(خبریں ڈیجیٹل) اسپیشل پراسیکیوٹر فرہاد علی شاہ  کا کہنا ہے کہ جناح ہاؤس مقدمے کی تفتیش میں چیئرمین پی ٹی آئی قصور وار قرار پائے گئے ہیں۔

لاہور میں  میڈیا سے گفتگو کے دوران اسپیشل پراسیکیوٹر فرہاد علی شاہ نے کہا کہ چیئرمین پی ٹی آئی کی حد تک تفتیش مکمل کرلی گئی ہے، جناح ہاؤس مقدمے کی تفتیش میں چیئرمین پی ٹی آئی قصور وار قرار پائے گئے  ہیں۔

اسپیشل پراسیکیوٹر فرہاد علی شاہ نے کہا کہ چیئرمین پی ٹی آئی کے خلاف ثبوت اکٹھے کرلیے گئے ہیں، وہ تمام کیسز میں گناہ گار ہیں۔

اسپیشل پراسیکیوٹر کا کہنا تھا کہ چیئرمین پی ٹی آئی کو اعانت جرم میں چارج کیا جا رہا ہے، چیئرمین پی ٹی آئی کو گرفتار نہ کیا گیا تو ثبوت صفحہ مثل پر لانے میں رکاوٹ ہو گی لہٰذا چیئرمین پی ٹی آئی کو گرفتار کیا جائے یہ ضمانت کا کیس ہی نہیں ہے۔

اسلام آباد (خبریں ڈیجیٹل) وفاقی وزیر قانون اعظم نذیر تارڑ نے کہا ہے کہ سائفر کیس کو آئین و قانون کے مطابق منطقی انجام تک پہنچایا جائے گا، سائفر والا کیس اوپن اینڈ شٹ کیس ہے، کلاسیفائیڈ ڈاکیومنٹ کو ذاتی مفاد میں استعمال کیا گیا تو سزا 14 سال قید ہوتی ہے۔

اسلام آباد میں پریس کانفرنس کرتے ہوئے اعظم نذیر تارڑ نے کہا ہے کہ سائفر کے معاملے پر بہت زیادہ بحث ہو رہی ہے، سابق وزیر اعظم نے سائفر کو اپنی تحویل میں لیا، کلاسفائیڈ دستاویز کو پبلک نہیں کیا جا سکتا، چیئرمین پی ٹی آئی نے قومی سلامتی کو نقصان پہنچایا، سائفر کا قومی سلامتی کو پس پشت ڈال کر بے دریغ استعمال کیا گیا، چیئرمین پی ٹی آئی نے سائفر کو جلسے میں استعمال کیا۔

وزیر قانون نے مزید کہا ہے کہ سائفر کسی سے شیئر بھی نہی ں کیا جا سکتا، سائفر کی وجہ سے دوست ممالک سے تعلقات متاثر ہوئے، معاملہ مزید کارروائی کیلئے ایف آئی اے کو بھیج دیا ہے، چیئرمین پی ٹی آئی کو 25 جولائی کو طلب کیا ہے، اب دیکھتے ہیں وہ کیا جواب دیتے ہیں، انکوائری، تفتیش میرٹ پر ہو گی، اگر چیئرمین پی ٹی آئی تعاون نہیں کریں گے تو گرفتاری ہو سکتی ہے۔

اعظم نذیر تارڑ نے کہا ہے کہ ایف آئی اے آفیشل سیکرٹ ایکٹ سامنے رکھتے ہوئے انکوائری کرے گی، اعظم خان کے بیان کو قانونی تحفظ حاصل ہے، ان کا معاملہ ایف آئی اے دیکھے گی، ذاتی مقاصد کیلئے سفارتی ڈاکیومنٹ گم کیا جائے تو عمر قید اور اس سے زائد سزائیں بھی ہیں، اس کیس کا فیصلہ میڈیا یا حکومت نہیں عدالت نے کرنا ہے۔

انہوں نے کہا کہ سابق وزیر قانون نے سائفر معاملے کو اسمبلی فلور پر منفی انداز میں استعمال کیا، پارلیمان میں سائفر پر اس وقت کی حکومت نے عجیب موقف اپنایا، سابق ڈپٹی سپیکر نے تحریک عدم اعتماد کو ڈیڑھ منٹ کے اندر ختم کیا، صدر نے اسمبلی توڑ دی جسے سپریم کورٹ نے بحال کیا۔

آرمی ایکٹ کے حوالے سے گفتگو کرتے ہوئے وزیر قانون نے کہا ہے کہ سویلین کے فوجی ٹرائل پانچ دہائیوں سے ہو رہے ہیں، 2015 میں فوجی عدالتیں بنائی گئیں، سانحہ اے پی ایس کے بعد فوجی عدالتوں کے حوالے سے قانون سازی کی گئی تھی، آرمی ایکٹ میں اپیل کا حق موجود ہے، آرمی چیف اپیل خود سنتے ہیں، عسکری تنصیبات پر حملوں سے متعلق کارروائی بھی آرمی ایکٹ کے تحت ہوتی ہے۔

اعظم نذیر تارڑ نے مزید کہا کہ اگراسمبلی اپنی مدت پوری کرتی ہے تو الیکشن کمیشن 60 روز کے اندر الیکشن کرائے گا، نگران وزیر اعظم کے آنے تک موجودہ وزیر اعظم عہدے پر رہیں گے، اپوزیشن لیڈر اور وزیر اعظم نگران وزیر اعظم کے نام پر اتفاق نہیں کرتے تو معاملہ کمیٹی میں جائیگا۔

لاہور (خبریں ڈیجیٹل) احتساب عدالت نے وزیراعظم شہباز شریف اور حمزہ شہباز کو منی لانڈرنگ مقدمے میں بری کردیا۔

احتساب عدالت میں منی لانڈرنگ کیس کی سماعت ہوئی، عدالت نے منی لانڈرنگ ریفرنس میں شہباز شریف اور حمزہ شہباز کی بریت کی درخواست منظور کر لی۔

احتساب عدالت کے جج قمرالزمان نے محفوظ فیصلہ سناتے ہوئے وزیراعظم شہباز شریف اور حمزہ شہباز کو منی لانڈرنگ مقدمے میں بری کر دیا، احتساب عدالت کے جج قمر الزماں نے وکلا کے دلائل مکمل ہونے کے بعد فیصلہ محفوظ کیا تھا۔

عدالت نے منی لانڈرنگ کیس میں وزیراعظم شہبازشریف، حمزہ شہباز کے علاوہ جویریہ ، رابعہ عمران سمیت تمام افراد کو بری کردیا ہے۔

عدالتی فیصلے میں کہا گیا کہ ریفرنس کی تحقیقات میں منی لانڈرنگ کا الزام ثابت نہیں ہو سکا، ملزمان پر 7 ارب روپے منی لانڈرنگ کا الزام تھا۔

الیکشن کمیشن آف پاکستان کے اسپیشل سیکرٹری ظفر اقبال نے ایک  تقریب سے خطاب میں کہا ہے کہ 12 اگست کو مدت مکمل ہونے پر اسمبلی تحلیل ہوئی تو 11 اکتوبر سے پہلےالیکشن کرادیں گے۔

ظفراقبال نے مزید کہا کہ ہمیں سکیورٹی اہلکار لازمی ملیں گے، پرانی حلقہ بندیوں پر الیکشن ہو گا، الیکشن کیلئے واٹر مارک پیپر لے لیا، تمام اداروں سے رابطہ ہے، ڈی آر او اور آر او کے لیے عدلیہ سے رجوع کیا ہے، الیکشن کیلئے مکمل تیار ہیں، مواد تیار کر رکھا ہے، رجسٹرار ہائی کورٹس سے آر اوز کے لیے درخواست کی ہے۔

اسپیشل سیکرٹری الیکشن کمیشن ظفر اقبال نے کہا کہ الیکشن کمیشن انتظامی افسران ، اپنے افسران اور جوڈیشل افسران کو استعمال کر سکتا ہے، نئی انتخابی اصلاحات کے مطابق الیکشن کرائیں گے۔

علاوہ ازیں سیکرٹری الیکشن کمیشن عمر حمید نے تقریب سے خطاب میں کہا کہ پی ٹی آئی فارن فنڈنگ کا معاملہ عدالت میں ہے، سیاست میں کالے دھن سے سسٹم کو نقصان ہو  رہا ہے، ایک سال میں تدارک نہیں کیا جا سکتا، ٹیکس قوانین کو  بہتر کرنا  ہے۔

خیال رہے کہ گزشتہ روز وزیراعظم شہباز شریف نے ایم کیو ایم پاکستان کو یقین دہانی کروائی ہے کہ انتخابات پرانی مردم شماری پر کروانےکا تاحال کوئی فیصلہ نہیں ہوا۔

قبل ازیں اپنے ایک اور بیان میں وزیراعظم شہباز شریف نے واضح کیا تھا  ہماری حکومت کی مدت اگست میں  ختم ہوجائے گی، الیکشن اکتوبر، نومبر میں جب بھی ہوں گے الیکشن کمیشن اس کا اعلان کرےگا۔