بدین: (ویب ڈیسک) سندھ میں سانگھڑ، نوابشاہ، جھڈو اور دیگر شہروں کو ڈبونے والا سیلابی ریلا ضلع بدین میں داخل ہوگیا۔
سیلابی ریلے نے پران ندی میں کئی مقامات پر شگاف ڈال دیے جس کے باعث بالائی علاقوں سے آنے والا سیلابی پانی اب ضلع بدین کے دیہاتوں میں بھی داخل ہوگیا۔
ریلے کے باعث متعدد دیہاتوں سے لوگوں نے نقل مکانی شروع کر دی ہے۔ منچھر جھیل پر پانی کا دباؤ برقرار ہے اور دانسترنہر کے دروازوں سے پانی اوور فلو ہونے کا سلسلہ جاری ہے جس کے باعث قریبی آبادیوں کو انخلا کیلئے تیار رہنے کی ہدایت کی گئی ہے۔
این ڈی ایم اے کی رپورٹ کے مطابق ملک بھر میں حاليہ بارشوں اورسيلاب سے مزيد 57 افراد جاں بحق ہوگئے اور اب تک ہلاکتوں کی کل تعداد 1265 ہوگئی، تین کروڑ 30 لاکھ 46 ہزار سے زائدافراد اور 80 اضلاع اب بھی متاثر ہيں۔

کراچی: (ویب ڈیسک) ایران اور افغانستان سے ٹماٹر اور پیاز کی آمد شروع ہوگئی ہے۔
گزشتہ دو روز کے دوران 120 ٹرالرز کراچی سبزی منڈی پہنچ چکے ہیں جن کی آمد سے سبزی منڈی میں ٹماٹر اور پیاز کی تھوک قیمتوں میں نمایاں کمی واقع ہوئی۔
تاہم شہر کے مختلف علاقوں میں ٹماٹر تاحال 200 جبکہ پیاز 120 سے 160 روپے کلو فروخت کی جارہی ہے.
سابق وائس چیئرمین سبزی منڈی مارکیٹ کمیٹی آصف احمد کے مطابق کراچی سبزی منڈی میں پیاز کے 70 ٹرالر اور ٹماٹر کے 50 سے زائد ٹرالر پہنچ گئے، سبزی منڈی کی سطح پر پیاز اور ٹماٹر کی تھوک قیمت میں نمایاں کمی واقع ہوئی ہے، تھوک سطح پر پیاز 50 روپے کلو فروخت کی گئی، ٹماٹر تھوک سطح پر 100 سے 110 روپے کلو فروخت ہوا۔
انہوں نے سندھ حکومت اور شہری انتظامیہ سے مطالبہ کیا کہ درآمدی پیاز ٹماٹر کی سستے داموں فروخت یقینی بنائیں ۔
ادھر پاکستان فروٹ اینڈ ویجیٹیبل ایسوسی ایشن کے سرپرست اعلی وحید احمد کے مطابق ایران اور افغانستان سے آنے والے پیاز اور ٹماٹر کے ٹرالرز کو سرحدی کسٹم پوسٹس پر کلیئرنس میں تاخیر کا سامنا ہے ٹماٹر جلد تلف ہونے والا آئٹم ہے اور پیاز کا معیار بھی درجہ حرارت بڑھنے سے خراب ہوتا ہے اس لیے وفاقی حکومت اور کسٹم حکام سے اپیل ہے کہ سبزیوں ٹماٹر اور پیاز لے کر آنے والے ٹرالرز کی الگ قطار بنائی جائے اور ان کی ترجیحی طور پر کلیئرنس کی جائے۔
امپورٹرز کے مطابق اب تک 1150 ٹن سے زائد پیاز اور ٹماٹر کے درآمدی اجازت نامے جاری ہوچکے ہیں ، آنے والے دنوں میں ایرانی ٹماٹر اور پیاز سمیت براستہ افغانستان وسط ایشیائی ریاستوں سے آنے والی پیاز ٹماٹر سے مقامی مارکیٹ میں رسد بہتر اور قیمتوں میں مزید کمی واقع ہوگی۔

لاہور: (ویب ڈیسک) ملک بھر کے متعدد علاقوں میں بارشوں کی پیشگوئی کر دی گئی۔
ترجمان محکمہ موسمیات کے مطابق بحیرہ عرب سے کم شدت کی مون سون ہوائیں ملک کے بالائی اوروسطی علاقوں میں داخل ہو رہی ہیں ۔ جس کے باعث ہفتہ(رات)سےمنگل کے دوران کشمیر،گلگت بلتستان،اسلام آباد، راولپنڈی، مری ، اٹک، چکوال، جہلم، سیالکوٹ، نارووال، لاہور، گوجرانوالا، گجرات، شیخوپورہ، میانوالی، خوشاب،سرگودھا، حافظ آباد، منڈی بہاؤالدین، جھنگ اور فیصل آباد میں تیز ہواؤں اور گرج چمک کے ساتھ بارش اور چند مقامات پر موسلادھار بارش کا بھی امکان ہے۔
محکمہ موسمیات کے مطابق اتوار اور پیر کے دوران دیر، سوات، کوہستان، مانسہرہ، ایبٹ آباد، ہری پور، ملاکنڈ، باجوڑ، پشاور، مردان، چارسدہ، صوابی ، نوشہرہ، کرم، کوہاٹ اور وزیرستان میں تیز ہواؤں اور گرج چمک کے ساتھ بارش اور چند مقامات پر موسلادھار بارش کی توقع ہے۔
بیان کے مطابق آئندہ تین سے 4 روز کے دوران سندھ، بلوچستان اور جنوبی پنجاب میں موسم گرم اور مرطوب رہے گا ۔ کشمیر،خیبرپختونخوا کے پہاڑی علاقوں،گلیات اور مری میں لینڈ سلائیڈنگ کا خدشہ ہے۔

کراچی: (ویب ڈیسک) سول ایوی ایشن اتھارٹی (سی اے اے) نے روجھان ریڈار کو 13 ستمبر تک بند رکھنے کا فیصلہ کرلیا۔
سی اے اے کے مطابق سیلاب تاحال ریڈارتنصیبات میں موجودہے، جس کے باعث بند رکھنے کا فیصلہ کیا گیا۔
سی اے اے نے بتایا کہ روجھان ریڈار سے متعلق تمام ائیر لائنز کو آگاہ کردیا گیا ہے۔
روجھان ریڈار 220 ناٹیکل میل تک سی اے اے کوبھارت اور دیگر ایشیائی ممالک سے آنے والے طیاروں سے متعلق رہنمائی دیتا ہے۔
کراچی ائیرٹریفک اورلاہورائیرٹریفک کنٹرول ریڈار روجھان کےدرمیان ائیر ٹریفک مشترکہ کنٹرول کریں گے۔

لاہور: (ویب ڈیسک) وزیراعظم شہباز شریف نے کہا ہے کہ سیلاب سے متاثرہ علاقوں میں ضروری خدمات کی فراہمی کے لئے بڑے پیمانے پرکوششیں جاری ہیں۔
سماجی رابطے کی ویب سائٹ ٹویٹر پر انہوں نے لکھا کہ پاکستان نیشنل ہائی وے اتھارٹی، ڈسکوز، ٹیلی کمیونیکیشن اٹھارٹی اور دیگر وفاقی محکمے مشکلات کے باوجود بہترین کام کیا ہے۔ وفاقی ادارے بڑی تعداد میں متاثر ہونے والا انفراسٹرکچر کی بحالی میں مصروف عمل ہیں۔ تمام سرکاری افسرن اور ملازمین کو خراج تحسین پیش کرتا ہوں۔
ایک اور ٹویٹ میں وزیر اعظم شہبازشریف نے کہا کہ سیلاب سے بلوچستان،سندھ اور خیبرپختونخوا میں بجلی کے نظام کو شدید نقصان پہنچا، متاثرہ علاقوں میں بجلی کی فراہمی یقیناً بہت بڑا چیلنج تھا۔ میں خاص طور پر سیکرٹری پاور ڈویژن راشد لنگڑیال اور ان کی ٹیم کو مبارکباد دیتا ہوں کہ جنہوں نے دن رات محنت کرکے بجلی کی بحالی کو یقینی بنایا۔

کراچی: (ویب ڈیسک) کراچی کے علاقےکلفٹن اور ڈیفنس میں کسٹم انفورسمنٹ نے کارروائی کرتے ہوئے کروڑوں روپے مالیت کی 2 گاڑیاں تحویل میں لے لیں، برآمد ہونے والی گاڑیوں میں سے ایک لندن سے چور ی ہوئی تھی۔
کسٹم انفورسمنٹ اینٹی اسمگلنگ کے افسران نے خفیہ اطلاع پر کراچی کے علاقے ڈیفنس فیز 2 میں چھاپہ مار کر ایک قیمتی گاڑی برآمد کرلی،گھر کے مالک کی شناخت جمیل شفیع کے نام سے ہوئی ہے۔
ملزم سے جب گاڑی کی دستاویزات طلب کی گئی تو اس نے بتایا کہ گاڑی اسے نوید بلوانی نامی شخص نے دلائی تھی جب کہ گاڑی کی تمام دستاویزات نومبر کے مہینے تک فراہم کرنے کی یقین دہانی کرائی گئی تھی۔
کسٹمز حکام کی جانب سے نوید بلوانی کو بھی طلب کیا گیا تاہم نوید بلوانی تسلی بخش جواب نہ دے سکا، ادھر گاڑی پر لگی نمبر پلیٹ بھی جعلی نکلی ، جس کا کوئی ریکارڈ ایکسائز میں نہیں ملا۔
کسٹمز حکام نے جمیل شفیع اور نوید بلوانی کو گرفتار کرلیا ہے جب کہ نوید یامین اور دو نامعلوم افرادکے خلاف بھی تفتیش کا آغاز کردیا گیا ہے، برآمد ہونے والی گاڑی کو تحویل میں لےکر کسٹمز ویئر ہاؤس منتقل کردیا گیا ہے۔
کسٹمز حکام کے مطابق ڈیفنس کے گھر سے برآمد گاڑی لندن سے چوری ہوئی تھی اور اسے ایک یورپی ملک کے سفارت خانے کی جعلی دستاویزات پر پاکستان لایا گیا تھا۔
دوسری کارروائی میں کسٹمز حکام نے کلفٹن کی رہائشی عمارت میں چھاپہ مار کرکروڑوں روپے مالیت کی نان کسٹم پیڈگاڑی تحویل میں لے لی۔
گاڑی لاک ہونے کے باعث اپنی جگہ سے ہل نہیں سکتی تھی جسے لفٹر کی مدد سے کسٹمز کے دفتر منتقل کردیا گیا۔