اسلام آباد: (ویب ڈیسک) وزیراعظم میاں شہباز شریف کی زیرصدارت بلائی گئی آل پارٹیز کانفرنس (اے پی سی) ایک بار پھر موخر کر دی گئی، نئی تاریخ کا اعلان بعد میں کیا جائے گا۔
یاد رہے کہ وزیراعظم شہباز شریف کی زیر صدارت 9 فروری کو آل پارٹیز کانفرنس ہونا تھی۔
سماجی رابطے کی ویب سائٹ ٹوئٹر پر وفاقی وزیر مریم اورنگزیب نے کہا کہ وزیراعظم شہباز شریف کل صبح انقرہ روانہ ہوں گے، وہ صدر اردوان سے زلزلے کی تباہی، جانی نقصان پر افسوس اور تعزیت، ترکیہ کے عوام سے یک جہتی کریں گے۔
وفاقی وزیر کا کہنا تھا کہ وزیراعظم کے دورہ ترکیہ کی وجہ سے جمعرات 9 فروری کو بلائی گئی اے پی سی مؤخر کی جا رہی ہے، اتحادیوں کی مشاورت سے نئی تاریخ کا اعلان ہوگا۔

اسلام آباد: (ویب ڈیسک) وزیراعظم شہباز شریف نے کہا ہے کہ ترکی اور شام میں تباہ کن زلزلے کے 24 گھنٹے بعد ہلاکتیں اور تباہی کے مناظر دماغ کو سن کر رہے ہیں۔
سماجی رابطے کی ویب سائٹ ٹوئٹر پر اپنے پیغام میں وزیراعظم شہباز شریف نے کہا کہ بڑے پیمانے پر انسانی المیہ دلی دکھ اور صدمے کا باعث ہے۔
وزیراعظم کا مزید کہنا تھا کہ یکجہتی اور بروقت امداد سے دکھی انسانیت کی مدد کرنی چاہیے۔

لاہور: (ویب ڈیسک) منی لانڈرنگ ریفرنس میں نیب کورٹ نے وزیراعظم شہبازشریف کے داماد ہارون یوسف کی عبوری ضمانت میں 17 فروری تک توسیع کر دی۔
احتساب عدالت لاہور میں منی لانڈرنگ ریفرنس میں شہبازشریف کے داماد ہارون یوسف کی عبوری ضمانت پر سماعت ہوئی۔
دوران سماعت نیب کے تفتیشی افسر نے ہارون یوسف کی گرفتاری سے متعلق بیان دے دیا، تفتیشی افسر کا کہنا تھا کہ ہارون یوسف کی گرفتاری درکار نہیں ہے۔
عدالت نے ہارون یوسف اور طاہر نقوی کی عبوری ضمانت میں 17 فروری تک توسیع کر دی۔

اسلام آباد: (ویب ڈیسک) وزیراعظم میاں شہباز شریف کی زیر صدارت وفاقی کابینہ کا اجلاس آج ہوگا۔
ذرائع کا کہنا ہے کہ وزیراعظم کی زیرصدارت اجلاس میں سیاسی و معاشی صورتحال کا جائزہ لیا جائے گا، وفاقی کابینہ 3 نکاتی ایجنڈے پر غور کرے گی۔
اجلاس میں وفاقی کابینہ صدر نیشنل بینک کی تقرری کی منظوری دے گی، وزارت انسانی حقوق امتیاز بی بی کیس فیصلے پر عملدرآمد پر بریفنگ دے گی۔
ذرائع کے مطابق وفاقی کابینہ اجلاس میں کریمنل لاز ترمیمی بل 2023 کی منظوری بھی دی جائے گی۔

اسلام آباد: (ویب ڈیسک) قومی ادارہ صحت ( این آئی ایچ) نے کہا ہے کہ گزشتہ 24 گھنٹوں کے دوران ملک بھر میں 2 ہزار 406 کورونا ٹیسٹ کئے گئے ہیں۔
این آئی ایچ کی جانب سے جاری کردہ اعداد و شمار کے مطابق گزشتہ 24 گھنٹوں کے دوران 2 ہزار 406 کورونا ٹیسٹ کئے گئے جن میں سے 13 افراد کے کورونا ٹیسٹ مثبت آئے ہیں۔
اس طرح گزشتہ 24 گھنٹوں میں کئے گئے مثبت کورونا ٹیسٹ کی شرح 0.54 فیصد رہی ہے، مزید برآں اس دوران کورونا وائرس سے کوئی بھی مریض جاں بحق نہیں ہوا جبکہ 11 مریضوں کی حالت تشویشناک ہے۔

کراچی: (ویب ڈیسک) پاکستان پیپلز پارٹی (پی پی پی) کی جانب سے میئر کراچی کیلئے اپنے امیدوار کا اعلان جلد کیے جانے کا امکان ہے۔
میئر کراچی کے نام کیلئے پیپلز پارٹی کی قیادت نے منتخب نمائندوں سے مشاورت شروع کر دی ہے، میئر کراچی، حیدرآباد کیلئے تجاویز زیر غور ہیں۔
فریال تالپور کی زیر صدارت ہر ضلع کی الگ الگ میٹنگز کا سلسلہ آج سے شروع ہوگا، بلدیاتی کونسلز میں میئر، ڈپٹی میئر، چیئرمینز اور ضلع میں چیئرمین ڈسڑکٹ کونسل کا انتخاب ہونا ہے۔

کراچی: (ویب ڈیسک) سابق صدر جنرل (ر) پرویز مشرف کی نماز جنازہ اور تدفین آج کراچی میں ہوگی۔
سابق صدر پرویز مشرف کی نماز جنازہ ایک بج کر 45 منٹ پر پولو گراؤنڈ ملیر کینٹ کراچی میں ادا کی جائے گی، فوجی قبرستان میں ان کی قبر تیارکرلی گئی ہے۔
پرویز مشرف کی نماز جنازہ میں شرکت کیلئے شناختی کارڈ ساتھ لانا لازم قرار دیا گیا۔
گزشتہ شب سابق صدر پرویز مشرف کی میت کو لے کر خصوصی طیارہ دبئی سے کراچی پہنچا تھا، سابق صدر کے جسد خاکی کے ساتھ ان کی اہلیہ، بیٹی اور بیٹا بھی کراچی پہنچے۔
واضح رہے کہ سابق صدر و آرمی چیف جنرل (ر) پرویز مشرف طویل علالت کے بعد 79 برس کی عمر میں دبئی میں انتقال کر گئے تھے، وہ دبئی کے نجی ہسپتال میں زیر علاج تھے۔