راولپنڈی: (ویب ڈیسک) آرمی چیف جنرل عاصم منیر کی ہدایت پر پاک فوج کے 2 امدادی دستے ترکیہ روانہ کر دیئے گئے، عسکری قیادت نے ترکیہ میں زلزلے سے اموات پر اظہار تعزیت بھی کیا ہے۔
پاک فوج کے شعبہ تعلقات عامہ (آئی ایس پی آر) کے مطابق امدادی دستے پاک فضائیہ کے خصوصی طیارے سے روانہ ہوئے۔
آرمی ڈاکٹرز، نرسنگ سٹاف اور ٹیکنیشنز ترکیہ روانہ ہوئے، پاک فوج کی میڈیکل ٹیم 30 بستروں کا موبائل ہسپتال قائم کرے گی۔
آئی ایس پی آر کا کہنا ہے کہ دستے پاکستانی سفارت خانے کے ساتھ قریبی رابطہ رکھ کر کام جاری رکھیں گے، ریلیف کے کاموں کی تکمیل تک دستے وہاں موجود رہیں گے۔
ترجمان پاک فوج کے مطابق امدادی سامان میں خیمے، کمبل اور دیگر امدادی اشیاء بھی بھیجی گئی ہیں۔

اسلام آباد: (ویب ڈیسک) پنجاب اور خیبرپختونخوا کی صوبائی اسمبلیوں کے عام انتخابات کے معاملہ پر الیکشن کمیشن آف پاکستان کا اہم اجلاس آج ہوگا۔
چیف الیکشن کمشنر سکندر سلطان راجہ اجلاس کی صدارت کریں گے، اجلاس میں پنجاب اور خیبرپختوانخوا میں انتخابات سے متعلق امن وامان کی صورت حال کا جائزہ لیا جائے گا۔
اجلاس میں دونوں صوبائی چیف سیکرٹریز اور آئی جیز بھی شریک ہوں گے، چیف سیکرٹریز اور آئی جیز صوبوں میں امن وامان کی صورت حال پر بریفنگ دیں گے۔
خیال رہے کہ دونوں صوبائی گورنرز نے سیاسی جماعتوں سے مشاورت کے بعد الیکشن کمیشن کو پولنگ ڈے مقرر کرنے کی دارخوست کی ہے۔

اسلام آباد: (ویب ڈیسک) توشہ خانہ ریفرنس میں الیکشن کمیشن کے فوجداری کارروائی کے کیس کی سماعت کے دوران چیئرمین پی ٹی آئی اور سابق وزیرِ اعظم عمران خان پر فردِجرم عائد ہوگی یا نہیں؟ اس بات کا فیصلہ آج کچھ دیر بعد ہوگا۔
اسلام آباد کی ڈسٹرکٹ اینڈ سیشنز عدالت میں ‎توشہ خانہ ریفرنس کی سماعت ایڈیشنل سیشن جج ظفر اقبال کر رہے ہیں، عدالت نے الیکشن کمیشن کو چیئرمین تحریک انصاف عمران خان کے وکلاء کو تصدیق شدہ کاپیاں فراہم کرنے کی ہدایت کر دی۔
عدالت نے عمران خان کی آج حاضری سے استثنیٰ پر فیصلہ محفوظ کر لیا اور تصدیق شدہ کاپیاں فراہم کرنے تک سماعت میں وقفہ کر دیا۔
قبل ازیں سماعت کا آغاز ہوا تو عمران خان کی جانب سے توشہ خانہ ریفرنس میں الیکشن کمیشن کا فوجداری کارروائی کا کیس لڑنے کے لیے 4 وکلاء کی ٹیم تشکیل دے دی گئی۔
عمران خان کی جانب سے وکلاء علی ظفر، علی بخاری، خواجہ حارث، گوہر علی خان کیس لڑیں گے جن کی جانب سے وکالت نامہ عدالت میں جمع کرا دیا گیا۔
‎الیکشن کمیشن کے وکیل سعد حسن اور ‎عمران خان کے وکیل علی بخاری اور گوہر علی خان کمرہ عدالت پہنچ گئے، سابق وزیراعظم کی جانب سے طبی بنیادوں پر حاضری سے استثنیٰ کی درخواست دائر کر دی گئی۔
جج نے استفسار کیا کہ کیا مچلکے جمع کرا دیے؟، وکیل گوہر علی خان نے جواب دیا کہ جی عمران خان کے ضمانتی مچلکے گزشتہ روز جمع کرا دیئے گئے۔
جج نے ریمارکس میں کہا کہ ایسے حاضری سے استثنیٰ کی درخواست دائر ہوتی رہی تو فردِ جرم کیسے عائد ہوگی؟۔
وکیل علی بخاری نے اعتراض کیا کہ ہمیں مصدقہ کاپیاں فراہم نہیں کی گئیں، واٹس ایپ کے سکرین شارٹس لگا کر کاپیاں نہیں دی جاتیں۔
الیکشن کمیشن کے وکیل نے کہا کہ ہم نے عدالت کے سامنے پی ٹی آئی کے وکلاء کو مصدقہ کاپیاں فراہم کی ہیں، جج نے ہدایت کی کہ تمام ثبوتوں کی تصدیق شدہ کاپیاں عدالت اور پی ٹی آئی کو فراہم کریں۔
الیکشن کمیشن کے وکیل نے کہا کہ ہم آج ہی کمپلینٹ اور ثبوتوں کی مصدقہ کاپیاں دے دیں گے مگر عمران خان ابھی تک عدالت کیوں نہیں آئے؟ کنٹینرز پر عمران خان کو ناچتے ہوئے تو ہم نے دیکھا ہے۔
عمران خان کے وکیل علی بخاری نے کہا کہ ایسے بیانات نہ دیئے جائیں جس سے لگے کہ منشیوں والا کام کیا جا رہا ہے، قانون کی بات کی جائے، یہ نہ ہو کہ ہمیں بھی بولنا پڑے۔
عمران خان کے وکیل نے استدعا کی کہ 15 فروری کو جج رخشندہ شاہین کی عدالت میں عمران خان کی پیشی ہے، اس کے بعد کی تاریخ دے دیں۔
جج نے سوال کیا کہ کیا عمران خان نے 15 فروری کو جج رخشندہ شاہین کی عدالت میں آنا ہے؟ مجھے ایک تاریخ بتا دیں کہ عمران خان کب عدالت آئیں گے؟۔
عمران خان کے وکیل علی بخاری نے جواب دیا کہ عمران خان کی صحت نے اجازت دی تو آئیں گے، عدالت نے الیکشن کمیشن کو عمران خان کے وکلاء کو تصدیق شدہ کاپیاں فراہم کرنے کی ہدایت کر دی۔
عدالت نے عمران خان کی آج حاضری سے استثنیٰ پر فیصلہ محفوظ کر لیا اور تصدیق شدہ کاپیاں فراہم کرنے تک سماعت میں وقفہ کر دیا۔
واضح رہے کہ ایڈیشنل سیشن جج ظفر اقبال نے فردِ جرم عائد کرنے کے لیے عمران خان کو آج طلب کر رکھا ہے۔
گزشتہ سماعت پر عمران خان کو ضمانتی مچلکے جمع کرانے کی بھی ہدایت کی گئی تھی، عدالت کی ہدایت پر گزشتہ روز عمران خان کے وکیل علی بخاری نے 20 ہزار روپے کے ضمانتی مچلکے جمع کرائے تھے۔

کراچی: (ویب ڈیسک) کراچی پولیس نے کالعدم تنظیم کے 2 دہشتگردوں کو گرفتار کر لیا، ملزمان تاجروں سے بھتہ لینے میں ملوث ہیں۔
پولیس کے مطابق سائٹ سپر ہائی وے کے علاقے سے کالعدم تنظیم کے دو دہشتگردوں کو 2 کلاشنکوف سمیت گرفتار کر لیا گیا ہے، گرفتار ملزمان میں احمد عرف بشیر اور نعمت اللّٰہ شامل ہیں۔
گرفتار ملزمان کالعدم تنظیم کے نام پر تاجروں سے بھتہ بھی لیتے تھے اور بھتہ نہ دینے پر تاجروں پر فائرنگ میں بھی ملوث رہے ہیں۔
پولیس کا کہنا ہے کہ ہفتہ کے روز دھنی بخش گوٹھ سے ملنے والا اسلحہ بھِی ملزمان نے چھپایا تھا، ملزمان ٹریننگ کے لیے متعدد بار افغانستان بھی جا چکے ہیں۔

اسلام آباد: (ویب ڈیسک) وزیر اعظم شہباز شریف سے سابق اراکین پنجاب اسمبلی نے ملاقاتیں کی ہیں۔
سابق اراکین پنجاب اسمبلی نے وزیراعظم محمد شہباز شریف کے ساتھ ملاقاتوں کے دوران صوبہ کی مجموعی سیاسی صورتحال پر تبادلہ خیال کیا۔
ذرائع وزیراعظم آفس کے مطابق ملاقات کرنے والے سابق اراکین پنجاب اسمبلی میں خواجہ سلمان رفیق، رابعہ نسیم فاروقی اور میاں مرغوب احمد شامل ہیں جنہوں نے وزیر اعظم محمد شہباز شریف سے الگ الگ ملاقات کی۔
ملاقاتوں میں صوبہ پنجاب کی موجودہ پل پل بدلتی ہوئی مجموعی سیاسی صورت حال پر تبادلہ خیال کیا گیا۔

اسلام آباد: (ویب ڈیسک) وفاقی وزیر منصوبہ بندی و ترقی پروفیسر احسن اقبال نے کہا ہے کہ کتب بینی باشعور معاشرے کا طرہ امتیاز ہوتی ہے، کتب بینی کو فروغ دینے کے لئے اسلام آباد میں بین الاقوامی معیار کی پبلک لائبریری تعمیر کی جائے گی۔
اسلام آباد میں جدید پبلک لائبریری کی تعمیر کے حوالہ سے اجلاس کی صدارت کرتے ہوئے وفاقی وزیر نے کہا کہ لائبریری کو ہر طرح کی سہولیات سے مزین اور ہم عصر علوم پر مبنی کتب سے لیس بنانے کے لئے اقدامات کئے جائیں۔
احسن اقبال نے کہا کہ قطر نیشنل لائبریری کی طرز پر جدید لائبریری تعمیر کی جائے گی، سی ڈی اے لائبریری کے لئے موزوں جگہ کا انتخاب کرے، لائبریری کو کتابوں کا قبرستان بنانے کے بجائے کمیونٹی مرکز بنانا ہے۔

کوئٹہ: (ویب ڈیسک) وزیراعلیٰ بلوچستان میر عبدالقدوس بزنجو کے زیر صدارت صوبائی ایپکس کمیٹی کا اجلاس ہوا، اجلاس میں صوبے میں امن و امان کے قیام، دہشتگردی کی روک تھام اور عوام کے جان و مال کے تحفظ کے حوالے سے اہم فیصلے کیے گئے۔
ایڈیشنل چیف سیکرٹری داخلہ زاہد سلیم نے اجلاس کونیشنل ایکشن پلان کے تناظر میں ایپکس کمیٹی کے بارہویں اجلاس کے فیصلوں پر عملدرآمد کی پیشرفت پر تفصیلات سے آگاہ کیا، اجلاس میں پولیس، سی ٹی ڈی اور سپیشل پروٹیکشن یونٹ کی کارکردگی اور استعداد کار میں اضافےکا فیصلہ کیا گیا۔
اجلاس میں منشیات، انسانی سمگلنگ اور غیر قانونی اسلحہ کے خلاف کاروائیوں کو مزید موثر بنانے کا فیصلہ ہوا، قومی شاہراہوں پر ہونے والے حادثات پر تشویش کا اظہار کیا گیا اور مجرمانہ فعل کے مرتکب ٹرانسپورٹرز اور ڈرائیوروں کے خلاف کارروائی کا فیصلہ کیا گیا۔
اجلاس میں وزیراعلیٰ میر عبدالقدوس بزنجو کی ہدایت کی روشنی میں قومی شاہراہوں پر غیر ضروری چیک پوسٹوں کے فوری خاتمے اور بی ایریا میں امن و امان برقرار رکھنے کیلئے لیویز فورس کے کردار میں اضافے کا فیصلہ کیا گیا۔
وزیر اعلیٰ میر عبدالقدوس بزنجو نے ہدایت کی کہ دہشت گرد عناصر، ان کے سرپرستوں اور دہشت گردی کی نرسریوں کو بھی ختم کیا جائے، انہوں نے کہا کہ امن و امان کے قیام کے لئے قبائلی، سیاسی اور سماجی عمائدین کو اعتماد میں لے کر ان کا تعاون حاصل کیا جائے۔
وزیراعلیٰ بلوچستان نے کہا کہ ہم عوام کے جان و مال کے تحفظ کے ذمہ دار ہیں اور اللہ کو جوابدہ ہیں، ہمیں اپنی یہ ذمہ داریاں ہر صورت ادا کرنی ہیں۔

لاہور: (ویب ڈیسک) پولیس نے گجرات میں سابق وزیر اعلیٰ پنجاب چودھری پرویز الہی کی رہا ئش گاہ کا محاصرہ کر لیا۔
پولیس کی جانب سے سابق وزیر اعلیٰ پنجاب چودھری پرویز الٰہی کی رہائش گاہ کے اندر جانے کی کو شش کی جا رہی ہے، پولیس کی بھاری نفری گجرات میں پرویز الہی کی رہائش گا ہ کے باہر موجود ہے۔
پولیس سیڑھیاں لگا کر چودھری پرویز الٰہی کی رہائش گا ہ کے اندر جانے کی کوشش کر رہی ہے۔
دوسری جانب مونس الٰہی نے رہائشگاہ کے باہر کی سی سی ٹی وی فوٹیج ٹوئٹ کرتے ہوئے کہا کہ پولیس، ایف آئی اے اور دیگر ایک بار پھر کنجاہ ہاؤس میں بغیر وارنٹ کے چھاپے ماررہے ہیں، ہمارے گھر پر چھاپہ مار کر آپ کو لگتا ہے کہ آپ ہمیں عمران خان کو چھوڑنے پر مجبور کر سکتے ہیں؟ دوبارہ سوچ لو!!۔
واضح رہے کہ 5 روز قبل بھی پولیس نے پرویز الٰہی کی رہائش گاہ کا محاصرہ کیا تھا، جس پر سابق وزیر اعلیٰ کی رہائش گاہ پر ملازمین نے گیٹ کو اندر سے بند کر دیا تھا۔
خاندانی ذرائع کے مطابق گجرات رہائش گاہ پر فیملی کا کوئی فرد گھر میں موجود نہیں، پرویز الٰہی لاہور رہائشگاہ پر موجود ہیں، سابق وفاقی وزیر مونس الہیٰ بیرون ملک مقیم ہیں۔
پولیس ذرائع کے مطابق رہائشگاہ پر چھاپہ 2 روز قبل تعینات ہونے والے ڈی پی او اسد مظفر کی سربراہی میں مارا گیا، پولیس سمیت ایلیٹ فورس کی بھاری نفری نے رہائشگاہ کا محاصرہ کیا ہوا ہے، گجرات پولیس کے 10 سے زائد تھانوں نے گھر کا محاصرہ کیا ہوا ہے۔