اسلام آباد: (ویب ڈیسک) الیکشن کمیشن نے ممنوعہ فنڈنگ کیس میں جواب جمع کرانے کیلئے تحریک انصاف کو آخری موقع دے دیا ، چیف الیکشن کمشنر نے ریمارکس دئیے کیا اس کیس کوبھی آٹھ سال چلانا ہے۔
چیف الیکشن کمشنر کی سربراہی میں ممنوعہ فنڈنگ کے کیس کی سماعت کے دوران پی ٹی آئی کے وکیل شاہ خاور نے 4 ہفتے کی مزید مہلت کی استدعا کر دی۔
وکیل کا کہنا تھا کہ بیرون ملک سےبعض دستاویزات ابھی تک نہیں ملیں، ،سمندرپارپاکستانیوں کےنائیکوپ اوردیگرتفصیلات کاانتظارہے۔
چیف الیکشن کمشنر نے کہاکہ کیا اس کیس کوبھی آٹھ سال چلانا ہے؟ یقینی بنایا جائے آخری مرتبہ وقت لیا جا رہا ہے، الیکشن کمیشن نے تحریک انصاف کو جواب جمع کروانے کے لیے دو ہفتے کا وقت دیتے ہوئے سماعت 19 ستمبر تک ملتوی کردی۔

لاہور: (ویب ڈیسک) پاکستان مسلم لیگ ن کی نائب صدر مریم نواز نے سابق وزیراعظم عمران خان پر تنقید کرتے ہوئے لکھا ہے کہ ہمیں اس سے نمٹنا پڑے گا۔
پاکستان تحریک انصاف کے چیئر مین پر تنقید کرتے ہوئے سماجی رابطے کی ویب سائٹ ٹویٹر پر پاکستان مسلم لیگ ن کی نائب صدر نے لکھا کہ عمران خان کا پاکستان کے بارے میں موقف مشروط ہے اگر فوج غیر جانبدار رہی تو کیچڑ اچھالوں گا۔ اگر عدالتوں نے میرے جرائم کو قانونی قرار نہ دیا تو ان کے خلاف بولوں گا۔
انہوں نے مزید لکھا کہ اگر الیکشن کمیشن نے غیر ملکی فنڈنگ کی چوری کو بے نقاب کیا تو ان کی سالمیت پر حملہ کروں گا، اس لعنت سے نمٹنا پڑے گا۔
ایک اور ٹویٹ میں مریم نواز نے لکھا کہ ان ماؤں کو سلام جو اپنی گود میں بیٹوں کو دھرتی کی حفاظت کا درس دیتی ہیں، ان کی شہادت پر دعا کرتی ہیں وطن ہمیشہ قائم رہے، ان بیٹوں کو سلام جو وردی پر پرچم لگا کر جاتے ہیں اور پرچم میں لپٹ کر واپس آتے ہیں۔ یہ قوم شہیدوں کی، ان کے گھر والوں کی مقروض ہے۔ پاکستان پائندہ باد
ایک اور ٹویٹ میں انہوں نے ایک شعر بھی لکھا کہ
اے راہِ حق کے شہیدو وفا کی تصویرو
تمہیں وطن کی ہوائیں سلام کہتی ہیں

لاہور: (ویب ڈیسک) تحریک انصاف سینٹرل پنجاب کے جنرل سیکرٹری و سابقہ وفاقی وزیر میاں حماد اظہر سے سابقہ ایم این اے تصدیق مسعود، چوہدری مقبول گجر ایم ایل اے، ڈاکٹر عامر حسین، علی حسن عباس بابا اور چوہدری خالد گجر نے ملاقات کی ملاقات میں باہمی دلچسپی کے امور پر تبادلہ خیال کیا گیا۔ اس موقع پر میاں حماد اظہر نے کہاکہ پوری قوم حقیقی آزادی کی تحریک میں حصہ لینے کے لئے عمران خان کی کال کی منتظر ہے حقیقی آزادی کی تحریک میں رکاوٹ بننے والوں کو عوام عبرت کا نشان بنائیں گے۔ پی ڈی ایم کے کرپٹ ٹولے کی حکومت عوام پر مہنگائی کے پہاڑ توڑ رہی ہے پی ڈی ایم کا کرپٹ ٹولہ سیلاب میں بھی منفی سیاست کرنے میں مصروف ہے ۔ حماد اظہر کا مزید کہنا تھاکہ ملک کی موجودہ صورتحال کا واحد حل نئے الیکشن کے انعقاد میں ہے چیئرمین عمران خان ہی ملک کو موجودہ صورتحال سے نکال سکتے ہیں۔

اسلام آباد: (ویب ڈیسک) جاپان نے پاکستان میں تباہ کن سیلابی صورت حال کے دوران متاثرین اور بحالی کے کاموں کے لیے 7 ملین امریکی ڈالر کی ہنگامی امداد کا اعلان کیا ہے۔
پاکستان کے لیے ہنگامی امداد سے متعلق منصونے کا اعلان جاپانی وزیر برائے امور خارجہ ہیاشی یوشیماسا نے کیا۔ علاوہ ازیں پاکستان میں جاپانی سفیر واڈا میتسوہیرو نے کہا ہے کہ میں حکومتِ جاپان پاکستانی عوام کی مدد کے لیے تیار ہے۔ مشکل کی اس گھڑی میں ہم متاثرہ افراد کے ساتھ کھڑے ہیں۔
جاپانی سفیر کا کہنا تھا کہ بارش اور سیلاب سے قیمتی انسانی جانوں کا ضیاع ہوا، اس کے علاوہ اہم انفرا اسٹرکچر اور وسیع پیمانے پر نظام زندگی درہم برہم ہو چکا ہے۔ قدرتی آفت سے لاکھوں لوگ بے گھر ہوگئے۔ انہوں نے کہا کہ فلڈ ریسپانس پلان 2022 کے ایک حصے کے طور پر ہم اجتماعی اور مربوط کارروائیوں کے ذریعے اپنی امداد میں توسیع کریں گے۔
انہوں نے کہا کہ اقوام متحدہ کی ایجنسیوں کے ساتھ مل کر صحت، خوراک،غذا، پانی ،صفائی ستھرائی اور پناہ گاہوں سمیت دیگر ہنگامی ضروریات کے لیے مدد فراہم کی جائے گی۔

کوئٹہ: (ویب ڈیسک) آرمی چیف جنرل قمر جاوید باجوہ امدادی کاموں کا جائزہ لینے بلوچستان کے سیلاب سے متاثرہ علاقوں میں پہنچ گئے۔
پاک فوج کے شعبہ تعلقات عامہ (آئی ایس پی آر) کے مطابق سپہ سالار جنرل قمر جاوید باجوہ نے بلوچستان کے سیلاب سے متاثرہ علاقوں کا دورہ کرکے امدادی کاموں کا جائزہ لیا ہے۔
آئی ایس پی آر نے جاری بیان میں کہا ہے کہ آرمی چیف نے ضلع جعفر آباد کے علاقے اوستہ محمد بھی پہنچے اور متاثرین سیلاب اور امدادی سرگرمیوں میں مصروف ٹروپس سے ملاقات کریں گے۔
خیال رہے کہ بلوچستان میں سیلاب کے باعث اب تک 260 افراد لقمہ اجل بن چکے ہیں، مرنے والوں میں 125 مرد، 56 خواتین اور 76 بچے شامل ہیں۔