اسلام آباد: (ویب ڈیسک) ڈی نوٹیفائی ہونے والے پی ٹی آئی کے مزید 9 سابق ممبران نے پارلیمنٹ لاجز رہائش خالی کردیے۔
اس حوالے سے ذرائع نے بتایا کہ شیخ راشد شفیق، ڈاکٹر نوشین حامد، تفشین صفدر، آفتاب صدیقی، عالمگیر خان اور راجہ خرم شہزاد، آصمہ قدیر، سبط اللہ اور شیر افگن نے رہائش گاہیں خالی کردیں۔ ذرائع نے مزید بتایا کہ مجموعی طور پر خالی ہونے والے لاجز کی تعداد 24 ہوگئی۔
واضح رہے کہ سی ڈی اے ڈائریکٹر کی جانب سے سی ڈی اے مجسٹریٹ کو آپریشن میں معاونت کا خط لکھا گیا تھا۔ خط کے متن کے مطابق آپریشن میں کسی بھی غیر معمولی صورتحال سے نمٹنے کے لیے معاونت کی جائے، پی ٹی آئی کے ڈی نوٹیفائی ممبران کو 24 جنوری کوسرکاری رہائشیں خالی کرنے کا نوٹس دیا تھا۔
خط میں کہا گیا تھا کہ رہائشیں خالی نہ کرنے پر آپریشن کرنا ہے لہٰذا کسی بھی ناخوشگوار واقع سے نمٹنے کے لیے اقدامات کیے جائیں۔
ذرائع کے مطابق سابق اسپیکر قومی اسمبلی اسد قیصر، آفتاب جہانگیر سمیت متعدد اراکین نے متعدد بار نوٹس کے باوجود تاحال پارلیمنٹ لاجز خالی نہیں کیے۔

اسلام آباد: (ویب ڈیسک) وفاقی وزیر اطلاعات مریم اورنگزیب نے کہا ہے کہ عمران خان پہلے خود گرفتاری دیں پھر کارکنوں کو اپیل کریں۔
چیئرمین پی ٹی آئی کے جیل بھرو تحریک کے اعلان پر ردعمل دیتے ہوئے وزیر اطلاعات نے کہا عمران خان پہلے وقت، دن اور تاریخ کا اعلان کریں کہ کس کیس میں اور کس عدالت میں گرفتاری دیں گے۔
مریم اورنگزیب نے کہا کہ جیل بھرو تحریک ڈیلی ویجرز اور دیہاڑی داروں کو پیسے دے کر امن و امان کی صورتحال خراب کرنے کی کوشش ہے، عمران خان جان بوجھ کر حالات خراب کرنا چاہتے ہیں، جیل بھرو تحریک ملک میں فساد اور انتشار پیدا کرنے کی سازش ہے۔
وزیر اطلاعات مریم اورنگزیب نے مزید کہا کہ اپنی ضمانتوں کیلئے روتے ہیں، پھر کہتے ہیں جیل بھرو تحریک چلائیں گے، عمران خان بہروپیا ہے، بات کچھ اور کام کچھ اور کرتا ہے، جیل بھرو تحریک سے پہلے ضمانتیں کینسل کروائیں۔

اسلام آباد: (ویب ڈیسک) وزیراعظم شہباز شریف نے ترکیہ میں زلزلے کے بعد آفت زدہ علاقوں میں ریسکیو ٹیمیں بھیجنے کی ہدایات جاری کر دیں۔
اس حوالے سے دفتر خارجہ نے کہا ہے کہ نیشنل ڈیزاسٹر مینجمنٹ اتھارٹی تمام دستیاب وسائل کو متحرک کر رہی ہے، تربیت یافتہ اربن سرچ، ریسکیو ٹیموں کو آلات، ادویات کے ساتھ ترکیہ روانہ کیا جا رہا ہے۔
ترجمان دفترخارجہ کے مطابق انقرہ میں ہمارا مشن متعلقہ ترک حکام کے ساتھ مسلسل رابطے میں ہے، زلزلے کی آفت کے بعد بحالی اور تعمیر نو کے مراحل میں ترکیہ کے ساتھ کام جاری رکھیں گے۔

کراچی: (ویب ڈیسک) بلدیہ ٹاؤن میں 5 اوباش نوجوانوں نے نوعمر لڑکی کو خالی مکان میں لیجاکر اجتماعی زیادتی کا نشانہ بنا ڈالا۔
بلدیہ تھانے میں درج مقدمے کے متن کے مطابق مدعیہ نے اپنے بیان میں کہا ہے کہ وہ بلدیہ سرحدی کالونی میں حقانی مسجد کے قریب کی رہائشی ہے۔ تین جنوری کو شام ساڑھے پانچ بجے وہ اپنی والدہ کو بتاکر دادی کے گھر (جو دو تین گلیوں کے فاصلے پر ہے) جارہی تھی کہ راستے میں ایک تنگ گلی میں ایک لڑکا جس کا نام ساجد عرف جوجو ہے اور اسی محلے میں رہتا ہے موجود تھا جس نے مجھے روکا اور زبردستی گلی کے کونے تک کھینچتا ہوا لے گیا۔
لڑکی نے بتایا کہ گلی کونے پر ایک رکشا پہلے سے کھڑا تھا جس میں 4 لڑکے موجود تھے جنہوں نے مجھے زبردستی رکشے میں بٹھایا اور مواچھ موڑ سپارکو روڈ کی جانب ایک خالی مکان میں لے گئے جہاں انہوں نے مجھے پانی پلایا جس میں کوئی چیز ملی ہوئی تھی، بعد ازاں چاروں لڑکوں نے میرے ہاتھ پاؤں پکڑے اور ساجد عرف جو جو نے مجھے زبردستی زیادتی کا نشانہ بنایا جس کے بعد چاروں لڑکوں نے بھی باری باری زیادتی کی۔
لڑکی کے مطابق وہ شور شرابہ کرتی رہی لیکن انہوں نے مجھے نہیں چھوڑا اور رات دیر ہونے پر وہ مجھے چھوڑ کر چلے گئے جس کے بعد میں اپنے گھر پہنچی، پولیس نے نوعمر لڑکی کی مدعیت میں مقدمہ درج کرنے کے بعد نامزد ساجد عرف جو جو کو گرفتار کرلیا ہے اور اس کے دیگر ساتھیوں کی تلاش میں چھاپے مارے جا رہے ہیں۔