لاہور: (ویب ڈیسک) وزیراعظم شہباز شریف پاکستان کی تاریخ کی منفرد مثال بن گئے، شہباز شریف نے وزیراعظم ہاؤس میں نئی روایت قائم کر دی، وزیراعظم کو ملنے والے غیرملکی تحائف اب وزیراعظم ہاؤس میں مستقل طور پر رکھے جائیں گے۔
بیرونی ممالک سے ملنے والے تحائف اب عوام دیکھ سکیں گے، شہباز شریف نے ہدایت کی ہے کہ تحائف عوام کو دکھانے کا اہتمام کیا جائے تا کہ دوست ممالک کی پاکستان سے محبت سے عوام آگاہ ہوں، وزیراعظم شہباز شریف کی ہدایت پر وزیراعظم ہاؤس میں جگہ بھی مختص کر دی گئی ہے۔
رپورٹ کے مطابق وزیراعظم ہاؤس میں مختص جگہ پر یہ تحائف رکھے جائیں گے جنہیں عوام دیکھ سکیں گے، بیرون ممالک سے ملنے والے تحائف وزیراعظم نے سرکاری خزانے میں جمع کرا دئیے ہیں، توشہ خانے میں جمع کرائے گئے تحائف کی مالیت 27 کروڑ روپے ہے، وزیراعظم کو یہ قیمتی تحائف خلیجی ممالک کے دوروں کے دوران ملے تھے، تحائف میں ہیرے جڑی دو قیمتی گھڑیاں بھی شامل ہیں۔
ایک گھڑی کی مالیت 10 کروڑ اور دوسری کی قیمت 17 کروڑ بتائی گئی ہے، خلیجی ریاستوں کی جانب سے وزیراعظم شہباز شریف کو عمران خان سے زیادہ مہنگی گھڑیاں دی گئی ہیں، وزیراعظم نے قیمتی قلم، انگوٹھی، ‘کف لنک’ (بٹن) اور خوشبو کے تمام تحائف توشہ خانے میں جمع کرا دئیے۔
شہباز شریف وزیر اعلی پنجاب کے طور پر دس سال کے دوران ملنے والے تمام غیرملکی تحائف توشہ خانے میں جمع کرواتے رہے ہیں۔

ڈی آئی خان: (ویب ڈیسک) وزیر اعظم شہباز شریف نے کہا ہے کہ وقت مشکل ہے مگر سب ملکر ان حالات سے نکل جائیں گے۔
وزیرِاعظم شہباز شریف ڈیرہ اسماعیل خان کے دورے پر پہنچے جہاں انہوں نے سیلاب متاثرہ علاقوں کا دورہ کیا۔ وزیر اعظم نے شاہراہوں اور رابطہ سڑکوں کی بحالی کے کام کا جائزہ بھی لیا۔
اس موقع پر وزیر اعظم شہباز شریف نے تقریب سے خطاب کرتے ہوئے کہا کہ سیلاب نے ملک بھر میں تباہی مچائی۔ وقت مشکل ہے مگر سب مل کر ان حالات سے نکل جائیں گے۔ افواج پاکستان کا مشکور ہوں جنہوں نے وہاں تک رسائی حاصل کی جہاں ممکن نہ تھا۔
انہوں نے کہا کہ کچھ دن قبل قمبر شہداد کوٹ کا دورہ کیا ایسا محسوس ہوا جیسے سمندر ہر جانب پھیلاہوا ہو اور سوات میں جو صورتحال دیکھی اس میں انسانی غلطی کا زیادہ عمل دخل تھا۔ سوات میں دریا کے پیٹ میں تعمیر کیے گئے ہوٹلز سیلاب میں بہہ گئے اور اسی طرح انڈس ویلی میں لوئر کوہستان میں نقصان پہنچا۔ 5 افراد رسے کسے ہوئے کھڑے رہے اور چار پانچ گھنٹے تندوتیز لہروں کا مقابلہ کرتے رہے بالآخر اللہ کو پیارے ہو گئے۔
شہباز شریف نے کہا کہ ایک جگہ ریلا آیا اس نے گاؤں کو صفحہ ہستی سے مٹا دیا اور ایک ہی خاندان کے 8 افراد لقمہ اجل بن گئے۔ اسعد محمود نے ہیلی کاپٹر میں کہا کہ وزیر اعظم مخلوط حکومت کا ذکر کم کرتے ہیں تو میں نے اسعد محمود کو کہا کہ ساری دنیا جانتی ہے پاکستان میں ہماری مخلوط حکومت ہے۔
انہوں نے کہا کہ ماضی کی حکومت نے وسائل برباد کیے اور تفصیل میں جانے کا آج موقع نہیں ہے، سیاست چھوڑ کر خدمت کے فرض کو نبھانا ہے۔ گزشتہ روز کابینہ اجلاس میں سیلاب سے ہوئے نقصانات کا محتاط اندازہ لگایا۔ وفاقی کابینہ اجلاس میں بتایا گیا کہ سیلاب سے نقصانات کا تخمینہ 28 ارب سے بڑھ کر 70 ارب ہے۔
وزیر اعظم نے کہا کہ سیلاب سے تباہ کاری کے باقی اخراجات اس کے علاوہ ہیں لیکن اب 42 ارب روپے کہاں سے آئیں گے، اللہ کی ذات اس کا انتظام کرے گی، سیلاب سے متاثرہ فی خاندان میں 25 ہزار روپے شفاف طریقے سے تقسیم کیے جا رہے ہیں۔
انہوں نے کہا کہ جوں جوں سیلاب کی تباہی بڑھتی گئی تو نقصانات کا تخمینہ بھی بڑھتا گیا۔ سیلاب سے لاکھوں ایکڑ لگی فصل، کپاس، چاول سب تباہ ہو گئیں۔ خوشی ہوئی کہ آرمی چیف یہاں تشریف لائے تھے انہوں نے کہا یہ پل بنایا جائے۔ این ایچ اے، چیئرمین این ایچ اے اور باقی سب لوگ کام کر رہے ہیں۔

لاہور: (ویب ڈیسک) مسلم لیگ ن کے رہنما اور وزیر اعظم کے معاون خصوصی عطا تارڑ نے کہا ہے کہ پاکستان تحریک انصاف (پی ٹی آئی) پاکستان میں بھارت کا ایجنڈا چلا رہی ہے۔
وزیر اعظم کے معاون خصوصی عطا تارڑ نے میڈیا سے گفتگو کرتے ہوئے کہا کہ سیلاب سے 3 کروڑ سے زائد لوگ متاثر ہیں اور ہزاروں لوگ بے گھر ہیں۔ مشکل حالات دیکھ چکے ہیں مگر پنجاب حکومت نظر نہیں آ رہی۔
انہوں نے کہا کہ وفاقی حکومت جہاں تک پہنچ سکتی تھی پہنچی بھی ہے لیکن پنجاب حکومت عوام کی مدد کے لیے تیار نہیں۔
عطا تارڑ نے کہا کہ شاندانہ نے ایک انٹرویو میں کہا کہ پاکستان کو امداد نہ دیں وہ حقداروں تک نہیں پہنچے گی، یہ وہی لوگ ہیں جنہوں نے عالمی مالیاتی ادارے (آئی ایم ایف) معاہدے کو سبوتاژ کرنا چاہا۔
انہوں نے کہا کہ پی ٹی آئی والے پاکستان میں بھارت کا ایجنڈا چلا رہے ہیں۔ کیا جلسے کا پیسہ کسی بیوہ کو راشن دینے کے لیے استعمال نہیں ہوسکتا ؟ اور کیا یہ پیسہ دریائے سندھ کے کنارے بیٹھے شخص کے علاج میں استعمال نہیں ہوسکتا ؟

اسلام آباد: (ویب ڈیسک) وزیر خزانہ مفتاح اسماعیل کا کہنا ہے کہ ملک کو دیوالیہ ہونے سے بچانے کیلئے مشکل فیصلے کرنا پڑے۔اب معیشت درست سمت میں جارہی ہے۔ گروتھ لانا مشکل نہیں ہے لیکن مستحکم گروتھ ہونی چاہیے۔
وزیر خزانہ مفتاح اسماعیل نے ملکی معاشی صورتحال پر سیمینار سے خطاب میں کہا ہے کہ ملک کو دیوالیہ ہونے سے بچانے کیلئے مشکل فیصلے کرنا پڑے۔ہماری حکومت بنی تو کل 44 ہزار ارب روپے کا قرض تھا۔جب حلف اٹھایا تو اس وقت 10.3 ارب ڈالر کے زرمبادلہ ذخائر تھے۔
ان کا کہنا ہے کہ تین ماہ سے کم درامدی بل کے برابر زرمبادلہ کے ذخائر ہوں تو کوئی ملک یا ادارہ قرض نہیں دیتا۔درامدی بل کے لحاظ سے 21 ارب ڈالر ہوتے توقرضہ مل سکتا تھا۔جی ٹوئنٹی ممالک نے مجموعی طور پر 5 ارب ڈالر کے قرض موخر کیے۔شہباز شریف سمیت ہم سب کو پتہ تھا کہ آکر سب سے پہلے تیل کی قیمتیں بڑھانی ہیں۔
انہوں نے کہاہے کہ رواں مالی سال 21 ارب ڈالر قرض ادائیگیاں کرنی ہیں۔12 ارب ڈالر سے زائد کا کرنٹ اکاؤنٹ خسارہ تھا۔جب اقتدار میں ائے تو اگلے سال جون تک 36 ارب ڈالر کی ضرورت تھی۔ہم نےسیلز ٹیکس نہیں بڑھایا، اِنکم ٹیکس 38 فیصد سے بڑھ رہی ہے۔
ان کا کہنا ہے کہجب حکومت میں آئے تو اندازہ تھا کہ مشکل فیصلے کرنا ہوں گے۔اب معیشت درست سمت میں جارہی ہے۔ گروتھ لانا مشکل نہیں ہے لیکن مستحکم گروتھ ہونی چاہیے۔گروتھ کے بعد ہم ڈیفالٹ کے خطرے کی جانب چلے جاتے ہیں۔
انہوں نے کہا ہے کہ پالیسی ٹھیک نہ ہونے کی وجہ سے پاکستان ڈیٹ ٹریپ میں ہیں۔سخت فیصلے کی قربانی اتنی بڑی نہیں جتنی ڈیفالٹ کرنے سے ملک کو نقصان ہوتا ہے۔پاکستان کی ترقی مستحکم نہیں ہے ہماری گروتھ کی بنیاد درآمدات ہیں۔
ان کا کہنا ہے کہ پہلی بار سپر ٹیکس لگایا بڑے اداروں اور شعبوں پر لگایا ہے۔سابقہ حکومت نے امیر ترین طبقے کو پانچ سو ارب روپے کے سستے قرضے فراہم کیے۔
انہوں نے کہا ہے کہ سیلاب کے متاثرین کی مدد کرنے میں آئی ایم ایف کوکوئی اعتراض نہیں ہوگا۔مجھے ڈر ہے کہ تعمیر نو کے دوران سیمنٹ سیکٹر کو کچھ رعایتوں کا مطالبہ نہ کردیا جائے۔سیمنٹ پر سبسڈی دینے کا زیادہ فائدہ سیمنٹ کارخانوں کو ہوگا۔فرٹیلائزر پر سبسڈی سے کسانوں کو فائدہ کم اور کاخانہ داروں کو زیادہ ہوا۔

لاہور: (ویب ڈیسک) آنے والے دنوں میں سموگ کے خدشے کے پیش نظروزیراعلیٰ چودھری پرویز الٰہی نے محکمہ ماحولیات کے اینٹی سموگ سکواڈ کے پائلٹ پراجیکٹ کا افتتاح کر دیا، چوہدری پرویزالٰہی کا کہنا تھا کہ اینٹی سموگ سکواڈ شہر میں دھواں چھوڑنے والی گاڑیوں کو باقاعدگی سے چیک کرے گا۔
وزیراعلیٰ آفس میں اینٹی سموگ سکواڈ کی افتتاحی تقریب کا انعقاد کیا گیا، وزیراعلیٰ چودھری پرویز الٰہی نے اینٹی سموگ سکواڈ کا معائنہ کیا، چودھری پرویز الٰہی نے گاڑیوں کے دھویں کی چیکنگ کے عمل کا جائزہ لیا، وزیراعلیٰ نے اینٹی سموگ سکواڈ کے عملے سے ملاقات کی اور عملے کو محنت اور جذبے سے سرکاری فرائض کی انجام دہی کی تلقین کی۔
وزیراعلیٰ پنجاب کا کہنا تھا کہ اینٹی سموگ سکواڈ مقررہ حد سے زیادہ دھواں چھوڑنے والی گاڑیوں کے خلاف بلاامتیاز کارروائی کرے گا، لاہور شہر کے داخلی راستوں پر بھی اینٹی سموگ سکواڈ گاڑیوں کی چیکنگ یقینی بنائے۔
سیکرٹری ماحولیات نے وزیراعلیٰ چودھری پرویز الٰہی کو اینٹی سموگ سکواڈ کے بارے میں بریفنگ دی۔