اسلام آباد: (ویب ڈیسک) عالمی مالیاتی فنڈز (آئی ایم ایف) نے 2 پاور پلانٹس اور سٹیل مل کی فوری نجکاری کا مطالبہ کر دیا۔
آئی ایم ایف نے مطالبہ کیا ہے کہ جون تک حویلی بہادر شاہ اور بلوکی پاور پلانٹس کی نجکاری کی جائے ، نجکاری کمیشن دونوں پاور پلانٹس کی فوری نجکاری کا پلان دے، پاور پلانٹس کی نجکاری کا پلان کل تک آئی ایم ایف کیساتھ فائنل کیا جائے گا۔
ذرائع نے کہا کہ آئی ایم ایف نے سٹیل ملز کی بھی فوری نجکاری کرنے کا مطالبہ کیا ہے، آرڈیننس میں ٹیکس اقدامات کا فیصلہ بھی کل تک ہو جائے گا۔

اسلام آباد: (ویب ڈیسک) وزیراعظم شہباز شریف نے توانائی کی بچت سے متعلق اقدامات کیلئے نیشنل انرجی ایفیشینسی اینڈ کنزرویشن اتھارٹی کی ازسرِ نو بحالی اور استعداد بڑھانے کا حکم دیدیا۔
وزیراعظم شہبازشریف کی زیرِ صدارت ملک میں توانائی کی بچت کیلئے اقدامات پر جائزہ اجلاس ہوا جس میں سابق وزیراعظم شاہد خاقان عباسی، وفاقی وزراء اسحاق ڈار، خرم دستگیر خان، مشیر وزیراعظم احد چیمہ، وزیر مملکت برائے پیٹرولیم ڈاکٹر مصدق ملک، معاونین خصوصی جہانزیب خان، سید فہد حسین اور متعلقہ اعلیٰ حکام نے شرکت کی۔
اجلاس میں شرکاء کو نیکا کی موجودہ استعداد اور میندیٹ پر بریفنگ دی گئی اور بتایا گیا کہ NEECA کی استعداد بڑھانے کیلئے کوئی خاطر خواہ اقدامات نہیں کئے گئے، اجلاس کو نیکا کے بجٹ کے حوالے سے بھی آگاہ کیا گیا۔
اجلاس کو مزید بتایا گیا کہ قومی نیشنل انرجی ایفیشینسی اینڈ کنزرویشن پالیسی کا مسودہ بہت جلد کابینہ اجلاس میں منظوری کیلئے پیش کیا جائے گا۔
وزیرِ اعظم نے نیکا میں اصلاحات کیلئے سابق وزیراعظم شاہد خاقان عباسی کی سربراہی میں بین الوزارتی اسٹیرنگ کمیٹی قائم کردی۔ وزیراعظم نے کمیٹی کو NEECA کی اصلاحات کے حوالے سے جامع منصوبہ بندی کرکے ضروری اقدامات یقینی بنانے کی تاکید کی۔
وزیرِ اعظم نے NEECA کی کارکردگی پر اظہارِ برہمی کرتے ہوئے کہا کہ ملک میں وسائل کا بلا دریغ زیاں ہو رہا ہے اور ادارے بند پڑے ہیں، نیکا کو فوری طور پر فعال بنانے کیلئے بین الوزارتی کمیٹی اقدامات کرے۔ نیکا کی افرادی قوت میں اضافہ کرتے ہوئے شفافیت کے پہلو کو اولین رکھا جائے۔
وزیراعظم نے کہا نیکا کے ماہرین تعمیراتی، صنعتی، مواصلات، پاور اور زراعت کے شعبے میں توانائی کی بھرپور بچت کیلئے وزارتوں کو لائحہ عمل دیں۔

ورجینیا: (ویب ڈیسک) امریکا میں ایک لائبریری سے نکلوائی گئی کتاب 43 تقریباً سال بعد واپس لوٹا دی گئی۔
امریکی ریاست ورجینیا کی نیو پورٹ نیوز پبلک لائبریری نے ایک انسٹاگرام پوسٹ میں بتایا کہ لائبریری کے گریسم لائبریری برانچ میں موجود ’ریٹرن ڈراپ باکس‘ میں یہ غیر معمولی دریافت حال ہی میں ہوئی۔
اے جے پی ٹیلر کی کتاب ’ہاؤ وارز بِگن‘ 23 مارچ 1980 کو واپس کی جانی تھی۔
لائبریری کے عملے کو کتاب کے ساتھ کوئی بھی ایسی چیز موصول نہیں ہوئی جس سے یہ معلوم ہو سکے کہ کتاب کی واپسی میں تاخیر کیوں ہوئی۔
پوسٹ میں کہا گیا کہ لائبریری کے پاس چیک آؤٹ ریکارڈ موجود نہیں جس سے یہ معلوم ہو سکے کہ کتاب کس نے نکلوائی تھی۔ تاہم، لائبریری کی جانب سے تاب لوٹانے والے کا شکریہ ادا کیا گیا۔

لاہور: (ویب ڈیسک) سابق وزیر اعظم عمران خان نے کہا ہے کہ پنجاب اور خیبرپختونخوا میں حکومتیں آئین کے تحت تحلیل کیں۔
اپنے ویڈیو پیغام میں چیئرمین پاکستان تحریک انصاف عمران خان نے کہا کہ ملک بحران اور سیاسی عدم استحکام کا شکار ہے، مہینہ ہو گیا لیکن اسلام آباد میں بلدیاتی انتخابات نہیں ہو رہے، عدالت نے اسلام آباد بلدیاتی الیکشن 48 گھنٹے میں کرانے کا حکم دیا۔
سابق وزیر اعظم نے کہا جیل بھرو تحریک سے حقیقی آزادی اور حقیقی جمہوریت حاصل کریں گے، پرامن جدوجہد کے طور پر جیل بھرو تحریک کا فیصلہ کیا، ملک میں معاشی بحران ہے اس لئے ہڑتال نہیں کر رہے، ایک راستہ یہ ہے کہ ہڑتال کریں، پہیہ جام کریں۔
چیئرمین پی ٹی آئی عمران خان نے مزید کہا مریم نواز کو پانامہ انکشاف کے بعد جیل میں رکھا گیا، کوئی تشدد نہیں ہوا، جن پر کرپشن کے مقدمات تھے انہیں جیل میں شاہانہ انداز میں رکھا گیا، اگر 90 دن سے الیکشن آگے گئے تو آئین میں واضح ہے کہ آرٹیکل 6 لگے گا۔
عمران خان نے کہا کہ 20 سے 25 دن ہو گئے الیکشن کمیشن اور گورنرز نے الیکشن کی تاریخ نہیں دی، ہم نے 2 حکومتوں کی قربانی دی، آئین میں واضح ہے کہ 90 دن میں الیکشن ہوں گے، نظریہ ضرورت سے ملک کا نیچے جانے کا سفر شروع ہوا، قوم عدالتوں کی طرف دیکھ رہی ہے۔
انہوں نے مزید کہا کہ قوم کا آئین اور قانون پر اعتماد اٹھتا جا رہا ہے، 25 مئی کو پرامن احتجاج کرنے والوں پر تشدد کیا، ایک ٹویٹ پر لوگوں کو اٹھایا گیا اور تشدد کیا گیا، کئی لوگوں کا تشدد کے بعد ذہنی توازن ٹھیک نہیں ہوا۔

اسلام آباد: (ویب ڈیسک) دہشت گردی پر کل جماعتی کانفرنس کا مقام بھی تبدیل کر دیا گیا، اے پی سی وزیراعظم آفس کی بجائے 9 فروری کو صبح 11 بجے پارلیمنٹ ہاؤس میں منعقد ہو گی۔
ذرائع کے مطابق کل جماعتی کانفرنس کا انعقاد پارلیمنٹ ہاؤس کمیٹی روم نمبر 2 میں ہو گا، ایک اپوزیشن جماعت کے مطالبہ پر تاریخ اور مقام تبدیل کیا گیا، اجلاس کے ایجنڈا میں دہشت گردی کے مسئلہ کے حل کے علاوہ معاشی مسائل پر بات ہو گی۔
عسکری قیادت دہشت گردی کی حالیہ لہر کے حوالے سے اجلاس کو بریفنگ دے گی جبکہ افغانستان سمیت دیگر ممالک سے معاملہ پر رابطوں کے بارے میں سیکرٹری خارجہ بریفنگ دیں گے، کانفرنس میں دہشتگردی اور درپیش چیلنجز کے مقابلے کی مشترکہ حکمت عملی مرتب کی جائے گی۔
ذرائع کا مزید کہنا تھا کہ دہشت گردی سے موثر طور پر نمٹنے کے لئے نیشنل ایکشن پلان پر نظرثانی ہو گی، حکومت کی طرف سے معاشی مسائل سے نمٹنے کے لئے اکنامک روڈ میپ پیش کیا جائے گا، وزیر خزانہ اور ان کی ٹیم آئی ایم ایف سے مذاکرات پر شرکا کو اعتماد میں لے گی۔
اے پی سی میں ملک کی تمام قومی و سیاسی قیادت کو مدعو کیا گیا ہے، عسکری قیادت کو بھی شرکت کی دعوت دی گئی ہے۔

لاہور: (ویب ڈیسک) سابق وزیر اعلیٰ پنجاب چودھری پرویز الہٰی سے امریکی ڈیمو کریٹ پارٹی کے سینئر رہنماء طاہر جاوید نے ملاقات کی جس میں دوطرفہ تعلقات کو فروغ دینے اور اوورسیز پاکستانیوں کے مسائل کے حل کے حوالے سے تبادلہ خیال کیا گیا۔
دونوں رہنماؤں کے درمیان امریکہ اور پاکستان کے باہمی تعلقات پر بھی گفتگو کی گئی، اس موقع پر طاہر جاوید نے کہا کہ جنرل باجوہ خاص طور پر اہم مسئلوں پر بلاتے اور مشاورت کرتے، امریکہ پاکستان میں کسی غیر آئینی کام کا حصہ نہیں بنے گا۔
چودھری پرویز الہٰی نے گفتگو کرتے ہوئے کہا کہ پاکستان اور امریکہ کے درمیان تجارت سمیت باہمی رابطے مزید موثر ہونے چاہئیں، پاکستان اس وقت معاشی بحران کا شکار ہے، مشکل کی اس کھڑی میں دوست ممالک کے ساتھ تجارت سمیت دیگر امور کو بڑھانا ہو گا۔
سابق وزیر اعلیٰ پنجاب نے مزید کہا بحران سے نکلنے کیلئے ملک میں فوری انتخابات کروائے جائیں، پاکستان میں انتخابات سے راہ فرار اختیار کی جا رہی ہے، پنجاب اور خیبر پختونخوا اسمبلیاں تحلیل ہو چکی ہیں لیکن ابھی تک انتخاب کی تاریخ نہیں دی جا رہی۔
چودھری پرویز الہٰی نے کہا انتخابات کروانے کے بجائے انتقامی مقدمات اور گرفتاریوں کا سلسلہ جاری ہے، حکومت کی توجہ اپوزیشن کے خلاف منفی ہتھکنڈوں پر مرکوز ہے، اوورسیز پاکستانی بیرون ملک ہمارا اثاثہ ہیں، بطور وزیراعلیٰ ان کے مسائل حل کرنے کی بھرپور کوشش کی۔