نیویارک : (ویب ڈیسک) امریکا میں طوفان سے نظام زندگی بری طرح متاثرہے اور مختلف حادثات میں تین افراد ہلاک جبکہ کئی زخمی ہوگئے ۔
غیر ملکی میڈیا کے مطابق ریاست اوکلا ہوما میں چار، ٹیکساس میں دو اور مشی گن میں ایک بگولے نے تباہی مچائی ، جبکہ اوہائیو اور فلوریڈا میں بھی طوفانی بگولوں کی اطلاعات ہیں۔
طوفانی گولے جہاں سے گزرے،تباہی کی داستان چھوڑ گئے، طوفان سے اوکلا ہومااور ٹیکساس میں گزشتہ روز 43 ہزار افراد کو بجلی کی فراہمی معطل رہی، بگولوں سے بجلی کے کھمبے گرنے سے ٹریفک کا نظام درہم برہم ہوا ہے، متعدد گھروں کی چھتیں اُڑ گئیں اور کئی درخت اُکھڑ گئے۔
حکام کا کہنا ہے کہ متاثرہ علاقوں میں امدادی کارروائیوں کا سلسلہ جاری ہے ، دوسری جانب امریکی محکمہ موسمیات نے آج بھی شدید طوفان آنے کی پیش گوئی کی ہے ۔

ممبئی : (ویب ڈیسک) سمندری طوفان بپرجوائے نے بھارتی گجرات میں تباہی مچادی ، طوفان کے ساحلی علاقوں سے ٹکرانے کے بعد بڑے پیمانے پر نقصانات ہوئے ہیں۔
بحیرہ عرب میں بننے والے سمندری طوفان بپرجوائے سے بھارتی گجرات کے ضلع کچھ کے علاقوں جاکھو اور مانڈوی میں تیز ہواؤں اور شدید بارش سے مختلف درخت جڑ سے اکھڑ گئے ہیں اور مختلف علاقوں میں 3 ہزار 672 سے زائد بجلی کے کھمبے گرنے سے طویل دورانیے سے بجلی منقطع ہے۔
بھارتی میڈیا کے مطابق طوفان کے باعث ریاست گجرات کے ساحلی اضلاع میں کم از کم 20 افراد زخمی ہوئے ہیں جبکہ 23 مویشی بھی ہلاک ہوئے ہیں۔
بھارتی میڈیا کا بتانا ہے کہ اس وقت بھی تیز ہواؤں کے ساتھ موسلادھار بارش کا سلسلہ جاری ہے جبکہ ریلوے نے 70 ٹرینوں کو منسوخ یا ان کا روٹ تبدیل کر دیا ہے۔
بھارتی میڈیا کے مطابق سمندری طوفان بپرجوائے کی کیٹیگری انتہائی شدید سے شدید میں بدل گئی ہے ، گجرات میں ہواؤں کی رفتار 115 سے کم ہو کر 105 کلومیٹر فی گھنٹہ ہوگئی ہے ، طوفان کے باعث راجستھان میں آج شدید بارشوں کا امکان ظاہر کیا گیا ہے جبکہ متاثرہ علاقوں میں ریسکیو اور ریلیف آپریشن جاری ہے ۔
دوسری جانب بھارتی محکمۂ موسمیات نے کہا ہے کہ سمندری طوفان بپرجوائے آج شمال مشرق میں راجستھان کی طرف بڑھے گا، طوفان کے زیرِ اثر راجستھان میں شدید بارش کا امکان ہے۔
بھارتی محکمۂ موسمیات کے مطابق طوفان گزشتہ شام گجرات کے ساحلی اضلاع کچھ اور سوراشٹرا سے ٹکرایا، یہ طوفان آج شام تک ڈیپ ڈپریشن میں بدل جائے گا۔

لندن : (ویب ڈیسک) برطانیہ نے جین میریٹ کو پاکستان کے لیے نئی برطانوی ہائی کمشنر مقرر کردیا ہے۔
جین میریٹ جولائی کے وسط میں پاکستان میں اپنی ذمہ داریاں سنبھالیں گی ، جین میریٹ پاکستان میں پہلی خاتون برطانوی ہائی کمشنر ہوں گی۔
سوشل میڈیا پر اپنے پیغام میں جین میریٹ نے کہا کہ پاکستان میں ہائی کمشنر تقرری پر خوشی ہے، مستقبل میں پاک برطانیہ تعلقات مزید مضبوط ہوں گے۔
رپورٹس کے مطابق جین میریٹ اس سے قبل ستمبر 2019 سے جون 2023 تک کینیا میں ہائی کمشنر کے طور پر اپنی ذمہ داریاں سرانجام دے چکی ہیں۔

اوٹاوا: (ویب ڈیسک) کینیڈا میں ایک ٹرک اور بس کے درمیان ہونے والے تصادم کے نتیجے میں کم از کم 15 افراد ہلاک ہوگئے۔
غیر ملکی خبر رساں ادارے کے مطابق وسطی کینیڈا میں ایک ٹرک اور چھوٹی بس میں تصادم کے نتیجے میں کم از کم 15 افراد ہلاک جبکہ 10 زخمی ہوگئے، بس میں سوار مسافروں میں زیادہ تعداد بزرگوں کی تھی۔
حادثہ ونی پیگ سے 170 کلومیٹر مغرب میں جنوب مغربی مانیٹوبا میں کاربیری قصبے کے قریب دو بڑی سڑکوں کے سنگم پر پیش آیا۔
مانیٹوبا رائل کینیڈین ماؤنٹڈ پولیس کے کمانڈنٹ اسسٹنٹ کمشنر راب ہل نے کہا کہ تصادم کے نتیجے میں کم از کم 15 افراد کی ہلاکت کی تصدیق ہوئی ہے، افسوس کی بات ہے کہ یہ مانیٹوبا اور پورے کینیڈا میں ایک ایسا دن ہے جسے ایک المیہ اور ناقابل یقین دکھ کے طور پر یاد رکھا جائے گا۔
بس میں تقریباً 25 افراد سوار تھے اور پولیس نے بتایا کہ 10 افراد ہسپتال میں زیر علاج ہیں۔
پولیس نے کہا کہ دونوں گاڑیوں کے ڈرائیورز زندہ ہیں تاہم اس بارے تصدیق نہیں ہو سکی کہ حادثے کا ذمہ دار کون ہو سکتا ہے۔
سماجی رابطے کی ویب سائٹ ٹوئٹر پر جاری اپنے بیان میں وزیر اعظم جسٹن ٹروڈو نے ان لوگوں سے گہری تعزیت کا اظہار کیا جنہوں نے اپنے پیاروں کو کھو دیا جبکہ زخمی ہونے والے افراد کی جلد صحتیابی کے لئے دعا کی۔
ٹروڈو کا کہنا تھا کہ میں اس درد کا تصور نہیں کر سکتا جو متاثرہ لوگ محسوس کر رہے ہیں۔
مانیٹوبا کی پریمیئر ہیدر سٹیفنسن نے ٹویٹر پر کہا کہ کاربیری کے قریب المناک حادثے کی خبر سن کر میرا دل ٹوٹ گیا ہے۔
یاد رہے کہ کینیڈا کی تاریخ کا بدترین ٹریفک حادثہ 1997 میں اس وقت پیش آیا جب صوبہ کیوبیک میں ایک بس کھائی میں جا گری تھی جس کے نتیجے میں 44 افراد ہلاک ہو گئے تھے۔